Mavingu 11 - Tshwa Bible

¹ Jehova wa venga xikalu ya mawunwa; anilezi a lipimo li lulamileko la mu xalalisa.

² Loku a matshanza mata, ku huma ni tingana; anilezi a wutlhari gi na ni lava va ti tsongahatako.

³ A wunene ga valulamileko gi ta va rangela; anilezi a kubiha ka lava va nga tsumbekangiko ku ta va lovisa.

⁴ A wukosi a gi vuni nchumu sikwini ga zanga; anilezi a kululama ka tlhatlhisa kufeni.

⁵ A kululama ka loyi a mbheleleko ku ta lulameta ndlela yakwe; anilezi a wa kubiha i ta wiswa hi kubiha kakwe.

⁶ A kululama ka vanhu va nene ku ta va ponisa, anilezi a vangatsumbekangiko va ta phasiwa hi kugoha kabye.

⁷ Loku a wa kubiha afa, a kutsumba kakwe ku ta lova; i kulangutela ka munhu a nga basangiko ku ta lova.

⁸ A wa kululama wa tlhatlhiswa zikaratweni zakwe; wa kubiha a enghena wutshanwini gakwe.

⁹ A mukhohlisi hi nomu wakwe wa lovisa muakelane wakwe; anilezi a valulamileko va tlhatlhiswa hi wutivi.

¹⁰ Loku a vakululama va humelela a muti wa nengela; oku a va kubiha va lova ku kona kuhlalela.

¹¹ A zikatekiso za va kululama zi tlakusa a muti; anilezi a milomu ya va kubiha ya wu hangalasa.

¹² Loyi a kanyisako muakelane wakwe a nga na wutlhari; anilezi a munhu wa kupimisisa wa ti miyelela.

¹³ Loyi a xuxako hi mahlevo wa bhoxa mifihlakalo; anilezi loyi a nga ni moya wa kutsumbeka wa fihla timhaka.

¹⁴ Laha ku nga hava wusungukati, a vanhu vawa; anilezi loku masungukati ma tele a kupona ku kona.

¹⁵ Loyi a ti enghenisako nanzwini ni loyi a nga mu tiviko, i ta hlokiswa ha wona; anilezi loyi a vengako ku ti boha, i le kuruleni.

¹⁶ A wasati wa tipswalo i na ni wudzunzo; vanhu va tihanyi va kuma wukosi.

¹⁷ A munhu wa wuxinji i maha zinene ka muhefemulo wakwe; anilezi a wa kubiha wa hlokisa a nyama yakwe wutsumbu.

¹⁸ A hakhelo ya wa kubiha ya khohlisa; anilezi loyi a byalako kululama i ta kuma nchachazelo wu nene. Hos. 10:12; Jak. 3:18

¹⁹ Loyi a tiyileko kululameni wa bhinzula wutomi; ilezo, loyi a lanzelako kubiha i ti yisa kufeni.

²⁰ Jehova wa venga lava va timbilu to biha; anilezi wa tsakela lava va mbheleleko mahanyeleni yabye.

²¹ A wa kubiha cima a nga ta pona ku tsayiswa; anilezi a pswalo wa loyi a lulamileko wu ta hlangutwa.

²² A wasati wa lipswitla loyi a nga hiko na kupima, fanana ni sinza ga nzalama nhovini ya khumba.

²³ A valulamileko va xuvisisa zinene ntsena; anilezi a va kubiha va langutela zanga.

²⁴ I kona loyi a nyikako hi matsenya, kasi wa engeteliwa; i loyi a tsonako ku hunza mpimo, kanilezi a maha xisiwana.

²⁵ A muhefemulo wa wuhana wu ta kuluka; oyi a cheletelako mati i ta cheletelwawu,

²⁶ Loyi a tsonako mavele, a vanhu va ta mu ruka; anilezi a zikatekiso zi tava hlokweni ya loyi a ma xavisako.

²⁷ Loyi a ti karatako ku hlota zinene, i ti lavela tipswalo; anilezi loyi a hlotako kubiha, ku tata kakwe.

²⁸ Loyi a tsumbako wukosi gakwe i tawa; anilezi a valulamileko va anza kukotisa liravi.

²⁹ Loyi a vangako hlomulo mutini wakwe, a mheho yi tava tshomba yakwe; i xipumbu xi tava nanza ga loyi a nga ni mbilu ya wutlhari.

³⁰ A mbhanzo ya loyi a lulamileko i sinya ya wutomi; i loyi a tlharihileko wa kanyara mihefemulo.

³¹ Langutani, a valulamileko va ta kuma nchachazelo laha misaveni; u ta kuyini ka wa kubiha ni muonhi! 1 Ped. 4:17