Mavingu 10 - Tshwa BibleA tindlela ta kululama ni ta kubiha. 1 A mavingu ya Solomoni nʼwana a tlharihileko i tsakisa dadani wakwe: anilezi a nʼwana wa xipumbu i hlomulo ka nyine wakwe. 2 A titshomba ta kubiha a ti vuni nchumu; anilezi a kululama ku tlhatlhisa kufeni. 3 Jehova a nga ta tsika muhefemulo wa a lulamileko wuzwa ndlala, anilezi wa ala a kunavela ka wa kubiha. 4 Loyi wa woko go loloha wa maha xisiwana; anilezi a canja ga loyi a pangamileko gi vanga wukosi. 5 A nʼwana wo tlhariha wa hlengeletela xikhatini xa ximumu, anilezi loyi a etlelako xikhatini xa kutshovela, wa vanga tingana. 6 A zikatekiso zi le tihlokweni ta valulamileko, anilezi a nomu wa loyi wa kubiha wu na ni mona. 7 Kualakanyiwa ka loyi a lulamileko ku katekile; anilezi a vito ga wa kubiha gi ta bola. 8 A munhu a nga ni mbilu yo tlhariha wa vumela zileletelo; anilezi loyi a nga ni nomu wa zidomudomu i tawa. 9 Loyi a fambako hi kululama i famba hi kurula; anilezi loyi a fambako hi tindlela ta hava i ta tibyiwa. 10 Loyi a tsopetako hi tihlo wa vanga wusiwana: anilezi loyi a nga ni nomu wa zidomudomu i tawa. 11 A nomu wa a lulamileko i hlowo ya wutomi; anilezi a nomu wa loyi wa kubiha wu na ni mona. 12 A livengo li vuxa timholova, anilezi a liranzo li fenengeta zihambunyeto zontlhe. 13 A wutlhari gi kumiwa ka milomu ya munhu a nga ni kupima; anilezi a nhonga yi fanele a hlana wa loyi a nga hiko na kupimisisa. 14 A titlhari ti hlengeletela wutivi; anilezi a nomu wa zipumbu wu yisa kulobyisweni. 15 A wukosi ga munhu a fumileko hi muti wakwe wo tiya, Kanilezi a kulobyiswa ka zisiwana, mbusiwana ga zona. 16 A ntiro wa loyi a lulamileko wu mu kumela kuhanya; anilezi a bhinzu ga loyi wa kubiha gi yisa xionhweni. Lu. 16:19 17 Loyi a hlayisako gonziselelo i lomu ndleleni ya wutomi; anilezi loyi a alako ku lulekwa wa lahleka. 18 Loyi a fihlako livengo i na ni nomu wa mawunwa, i loyi a hlevako, xipumbu. 19 A ka loyi a wulawulako nguvu a ku vumaleki xionho; anilezi loyi a khomako nomu wakwe i tlharihile. 20 A lirimi la a lulamileko i siliva yi basileko: mbilu ya wa kubiha a yi vuni nchumu. 21 A milomu ya a lulamileko yi gisa vanyingi; anilezi a zipumbu zifa hi ku vumala wutlhari. 22 A zikatekiso za Jehova za fumisa munhu; ima a nga engeteli wusiwana ha zona. 23 A ka xipumbu a ku maha kubiha ku khwatsi ku hlakana; anilezi a wutlhari litsako ka loyi a nga ni kupimisisa. 24 Lexi a xi chavako a wa kubiha xi ta mu wela; anilezi a wa kululama i ta mahelwa mixuvo yakwe. 25 Loku xipupuri xi hunzile a wa kubiha a nga ha hi kona; anilezi a wa kululama xiseketelo xa simasima. 2 Tim. 2:19 26 A munhu wa lolo i kotisa vinagre menweni, ka lava va mu rumako, ni musi mahlweni yabye. 27 A ku chava Jehova ku engetela masiku; anilezi a malembe ya wa kubiha ma ta komaniswa. 28 A kutsumba ka wa kululama ku tava kutsaka; anilezi a kulangutela ka wa kubiha ku ta lova. 29 A ndlela ya Jehova yi hi khokhola ga valulamileko; anilezi yi hi kulobyiswa ka vamahi va kubiha. 30 A wa kululama cima a nga ta tsekatseka; anilezi a wa kubiha a nga ta aka tikweni. 31 A nomu wa a lulamileko wu humesa wutlhari; anilezi a lirimi la kukanganyisa li ta tsemiwa. 32 A milomu ya wa kululama ya tiva lezi zi amukelekako; anilezi a milomu ya wa kubiha yi wulawula kukanganyisa. |
Tshwa Bible © Bible Society in Mozambique, 1972, 2007.
Bible Society of Mozambique