Mateu 9 - Tshwa Bible

Kuhanyiswa ka munhu wofa reve ga tlhelo.

¹ Yena i lo enghena ngalaveni a tlhatuka, aya mutini wabye. Xip. 4:13

² Ku lo nehiwa kakwe a munhu a nga file reve ga tlhelo, na etlele sangweni. Jesu na a wona kukholwa kabye i te ngalo ka loyi a nga file reve ga tlhelo; Nwananga, tiya hlana. A zionho za wena zi tsetselelwe. Mar. 2:3; Lu. 5:18; Xip. 8:10

³ A vo kari va vatsali va lo alakanya timbilwini tabye, vaku: Loyi munhu i wula nzhukano.

⁴ Jesu na a tiva kualakanya kabye, aku ngalo: Hi yini mu alakanyako kubiha timbilwini ta nwina? Tis. 139:2; Xip. 12:25; Lu. 5:22

⁵ Hi xihi xihehukako, aku ngalo: Zionho za wena zi tsetselelwe; kutani ku ngalo: Suka, u famba?

⁶ Kanilezi kasi ma fela ku zi tiva lezaku a Nʼwana wa munhu i nani ntamu misaveni a ku tsetselela zionho, (aku ka loyi a fileko reve): Vuka, u teka sango ga wena, u famba kaya;

⁷ A su vuka, aya kaya kabye.

⁸ Laha vanhu va nga zi wona, va lo rewuka va dumisa Nungungulu, loyi a nyikileko ntamu wa kunghahi ka vanhu.

A kuvitanwa ka Mateu.

⁹ Laha Jesu na a suka laho, i lo wona a munhu a vitwako Mateu, na a tshamile wutshanwini go hlengisa; i te ngalo kakwe: Nzi lanze. Yena i lo suka, a mu lanzela. Mar. 2:14; Lu. 5:27

¹⁰ Zonake laha na a tshamile kugeni lomu ndlwini yakwe, a vahlengisi vanyingi ni vaonhi va lo ta tshama zinwe na Jesu ni vapizani vakwe laha kugeni.

¹¹ Laha vaFarisi va nga zi wona, vaku ka vapizani vakwe: Hikuyini a mugonzisi wa nwina a gako ni vahlengisi ni vaonhi ke? Xip. 11:19; Lu. 5:30; Gal. 2:15

¹² Laha Jesu na zi zwile, i te ngalo: Lava va hanyako a va lavi nʼanga, kanilezi sine lava va babyako.

¹³ Fambani mu ya gonza lezaku zi wula yini leʼzo ngalo: Nzi ranza wuxinji, a nzi ranzi miphahlo. Hakuva a nzi telangi a ku ta vitana a valulamileko, kanilezi a vaonhi. Hos. 6:6; Xip. 12:7; 1 Tim. 1:15

Xikhati xa kuyila.

¹⁴ Zonake ku lota kakwe a vapizani va Johani, va taku: Hikuyini hina ni vaFarisi hi tala ku yila, kasi a vapizani va wena a va yili? Mar. 2:18; Lu. 5:33

¹⁵ Jesu aku ngalo kabye: A vanghana va muteki va zi kota ku rila, a muteki na a ha hi navo ke? Kanilezi a masiku ma tata, laha muteki a ta nga suswa ka vona, hi kona va ta nga rila. Joh. 3:29; Miti. 13:2, 8; 1 Kor. 7:5

¹⁶ A ku na munhu a rungelako a xitiva xiswa ngubyeni ya kale, hakuva a xitiva xa kunghaho xi nga tlhukula nguwo, xi engetela kuhanzuka.

¹⁷ Tlhatakumbiri, a vanhu a va cheli vinya giswa mikwameni ya kale; loku ku mahiwa lezo a mikwama yi ta hanzuka, a vinya gi halaka, ni mikwama yi onheka. Kanilezi va chela vinya giswa mikwameni yiswa, zi hlayiseka hi wumbiri ga zona.

Kuhanyiswa ka nhanyana wa Jairo.

¹⁸ Na a ha wulawula timhaka leti, ku lota a mufumeli a ta mu khizamela, aku: A nhanyana wa mina wa hi kufa zalezi; kanilezi tana u ta tlhateka canja ga wena hehla kakwe, yena i ta hanya. Mar. 5:22; Lu. 8:41

¹⁹ Jesu i lo suka, a mu lanzela zinwe ni vapizani vakwe.

²⁰ Languta, a wasati loyi a nga hi ni wubabyi go huma nkhata a 12 wa malembe, i lo tshinela kakwe hi lenzhaku, a khumba a machakafula ya nguwo yakwe; Levi 15:25-27; Lu. 8:43

²¹ hakuva i waku mbilwini yakwe: Loku nzi khumba a nguwo yakwe ntsena, nzi ta hanya.

²² Kanilezi Jesu na a hunzuluka i lo mu wona, aku: Nwananga, tiya hlana; a kukholwa ka wena ku ku hanyisile. A ka xikhati xwalexo a wasati i lo hanyiswa. Lu. 7:50; 8:48; 17:19

²³ Laha Jesu na a chikelendlwini ya mufumeli, i lo wona lava va ngaba tinjhele, ni lava va nga tsombene va hlaluka,

²⁴ aku kabye: Sukani; hakuva a nhanyana a nga fangi, i etlele. Va lo mu hleka. Miti. 20:10

²⁵ Kanilezi loku xidlemo xi humesilwe, yena i lo enghena, a mu khoma hi canja; ni nhanyana i lo vuka.

²⁶ A wudumo ga kona gi lo zwala tikweni lego gontlhe.

Zikhumu zimbiri zi hanyiswa.

²⁷ Jesu na a ha suka laho, a zikhumu zimbiri zi lo mu lanza, zi vitana ziku: Nʼwana Davida, hi mahele wuxinji! Xip. 15:22; Mar. 10:47, 48; Lu. 18:38, 39

²⁸ Laha na a enghenile ndlwini, a zikhumu zi lota kakwe. Jesu i te ngalo ka zona: Ma kholwa lezaku nza zi kota ku maha leʼzi ke? Ziku kakwe: Ina, Hosi.

²⁹ Zonake i lo khumba a mahlo yabye, aku: A ku maheke ka nwina kotisa kukholwa ka nwina.

³⁰ A mahlo yabye ma lo vululeka. Jesu i lo va layisisa, aku: Wonani, zi nga tibyiwi hi munhu.

³¹ Kanilezi va lo huma, va su hangalasa a wudumo gakwe ka gontlhe lego tiko. Mar. 7:33

Kuhumeswa ka moya wa mbeveve.

³² Na va kari va huma; ku lo tiswa kakwe a munhu wa mbeveve, loyi a nga hi ni dimoni.

³³ Laha a dimoni na gi humesilwe, a mbeveve yi lo wulawula. A zidlemo zi lo hlamala, ziku: Cima a ku na nga wonwa zo kota lezi ka Israeli!

³⁴ Kanilezi a vaFarisi vaku: I humesa madimoni hi hosi ya madimoni. Xip. 12:24; Mar. 3:22; Lu. 11:15

³⁵ Jesu i lo nzulanzula mitini yontlhe ni zimitaneni, a gonzisa masinagogeni, na a kanela Ivangeli ya mufumo, a chuma tontlhe tixaka ta tinghumbe ni tixaka tontlhe ta mababyi. Mar. 6:6; Lu. 13:22

³⁶ Kanilezi laha na a wonile zidlemo, i lo zi zwela wusiwana, hakuva va wa xaniseka na va hangalakile, kota tiyivu ti nga hava murisi. Mitse. 27:17; Ezek. 34:5

³⁷ Hi laha a ngaku ngalo ka vapizani vakwe: A kutshovela ka hombe nguvu, kanilezi a zitiri zi tsongwani. Lu. 10:2; Joh. 4:35

³⁸ Hikwalaho kombelani a Hosi ya kutshovela, lezaku yi rumela a zitiri kutshoveleni ka yona.