Mateu 8 - Tshwa Bible

Jesu a hanyisa a wa hlokonho.

¹ Laha na a relele hi le xitsungeni a zidlemo za hombe zi lo mu lanzela.

² Zonake ku lota kakwe a wa hlokonho a ta mu khizamela, aku: Hosi, loku u zi ranza, wa zi kota ku nzi basisa.

³ Jesu i lo nawuluta a canja gakwe, a mu khumba, aku: Nza zi ranza, basiswa wena! Zalezo a hlokonho yakwe yi lo basiswa.

⁴ Jesu aku ngalo kakwe: U nga byeli munhu; kanilezi famba u ya ti kombisa ka mupristi, u nyikela a munyikelo lowu Mosi a nga wu yimisa, wuva wukustumunyu ka vona. Levi 14:3; Mar. 5:43; Lu. 5:14

Ku hanyiswa a nanza ga nduna ya zana.

⁵ Laha na enghenile le Kapernaume, ku lota kakwe a nduna ya zana, yi ta mu khongotela, Lu. 7:1

⁶ yiku: Hosi, a nanza ga mina gi etlele lomu ndlwini ya mina, gi file reve ga tlhelo, ga xaniseka nguvu.

⁷ Jesu aku kakwe: Nzi tata nzi ta mu hanyisa.

⁸ A nduna ya zana yi lo hlamula, yiku: Hosi, a nzi fanelwi lezaku u enghena lomu ndlwini ya mina; kanilezi wula a gezu ginwe ntsena, a nanza ga mina gi ta hanya. Tis. 107:20; Lu. 15:19, 21

⁹ Hakuva na mina nzi munhu a fumi wako; na nzi hi ni masochwa ma nga lahasi ka mina. Loku nziku ka loyi: Famba, wa famba; ni ka munwani: Ngone, ata; ni ka xitiri xa mina: Maha lexi, xi xi maha.

¹⁰ Laha Jesu na a zi zwile, i lo hlamala, aku ka lava va mu lanzelako: Hizinene nziku ka nwina, a nzi se ku kuma a kukholwa ka hombe ko kota loku, hambu ni ka Israeli.

¹¹ Nziku ka nwina: A vanyingi va tata hi Mutsuwuka-gambo ni Muhlwa-gambo, va ta tshama na Abrahama, na Isaka, na Jakobe, mufunweni wa tilo; Gen. 12:3; Isa. 2:2, 3; Efe. 3:6

¹² kanilezi a vanana va mufumo va ta hlongolwa lahandle le munyameni; laha mikosi yi ta ngava kona ni kugetsela ka meno. Xip. 21:43; 13:42, 50; Lu. 13:28

¹³ Jesu aku ka nduna ya zana: Famba, a zi maheke ka wena khwatsi hilezi u kholilweko. Ni nanza gi lo hanyiswa hi xikhati xwalexo.

Kuhanyiswa ka mukokati wa Pedro.

¹⁴ Laha Jesu na a tile ndlwini ya Pedro, i lo kuma mukokati wakwe na etlele na a babya hi feveri. Mar. 1:29; Lu. 4:38; 1 Kor. 9:5

¹⁵ I lo khumba canja gakwe, ni feveri yi lo mu tsika; i lo suka, a va tirela.

¹⁶ Laha na gi hlwile, va lo neha ka Jesu vanyingi lava va nga hi ni madimoni; i lo hlongola mimoya hi gezu gakwe ntsena, a hanyisa vontlhe lava va nga kari va babya;

¹⁷ kasi ku fela ku tatiseka lezi zi nga wuliwa hi muprofeti Isaya, a ku ngalo: I lo ti rwexa a gome ga hina, a rwala a tinghumbe ta hina. Isa. 53:4; 1 Ped. 2:24

Lava va ranzako ku lanzela Jesu.

¹⁸ Makunu laha Jesu na a wona zidlemo zi mu ranzeleko, i lo byela vapizani a kuva va suka vaya tlhatuko.

¹⁹ Ku lota mutsali, aku ngalo kakwe: Hosi, nzi ta ku lanzela ni kwihi laha u yako kona. Lu. 9:57, 58

²⁰ Jesu aku ngalo kakwe: A vahlati va na ni timhako, ni tinyanyani ta tilo ti na ni zisaka; kanilezi a Nʼwana wa munhu a nga nako laha a nga vekako kona hloko yakwe.

²¹ Munwani wa vapizani vakwe aku ka yena: Hosi, nzi vumele nzi ranga hi ku ya lahla dadani. Lu. 9:59, 60

²² Kanilezi Jesu aku kakwe: Nzi lanzele, u tsika a vafileko va lahla vafileko vabye.

Jesu a miyeta bhubhutsa.

²³ Laha na khilele ngalaveni, a vapizani vakwe va lo enghena zinwe naye.

²⁴ Languta, ku lo vuka a bhubhutsa ga hombe le bimbini, lezaku kasi a mabyandlati ma phandlukela ngalaveni; kanilezi Jesu i wa etlele. Mar. 4:37; Lu. 8:23

²⁵ Va lo tshinela kakwe; va mu vuka, vaku: Hosi, hi hanyise, ha lova.

²⁶ Yena aku kabye: Nwina va kukholwa ku tsongwani, hi yini mu chavako? Zonake i lo vuka, a kawuka mheho ni bimbi, ku lova ni malenga ya hombe. Tis. 65:7

²⁷ Ni vavanuna va lo hlamala, vaku: Munhu wa ku yini loyi, waku hambu mheho ni bimbi zi mu ingisa ke?

Kuhumestea ka madimoni le Gadara.

²⁸ Laha na a chikele tlhatuko le tikweni ga vaGadara, i lo tlhangavetwa hi vanhu vambiri va nga hi ni madimoni, na va huma zilahleni; va wa leva nguvu, laha kakuva ku nga hi na munhu a nga tiya ku hunza hi ndlela leyo. Mar. 5:1; Lu. 8:26

²⁹ Va lo kanyuluka, vaku: I mhaka muni hi nga nayo na wena, Nʼwana wa Nungungulu? U tile laha ku ta hi xanisa na xi nga se ku chikela xikhati ke?

³⁰ Makunu ku wa hi kona a ntlhambi wa hombe wa makhumba ma nga kari maga kule navo.

³¹ A madimoni ma lo mu khongotela, maku: Loku u hi hlongola, hi rumele ntlhambini wa makhumba.

³² Zonake aku ka wona: Yanani! Ma lo huma, ma ya enghena makhumbeni. Languta, a ntlhambi wontihe wu lo tsutsumela nzhelelweni wa bimbi, wu su yo ncu lomo matini.

³³ A varisi va makhumba va lo tsutsuma vaya mutini, va ya hlawutela zontlhe, nguvunguvu lezi zi mahekileko ka lava va nga hi ni madimoni.

³⁴ Zonake vontlhe va muti va lo huma a ku ta khinga Jesu; laha na va mu wonile, va lo mu khongotela a ku suka tikweni gabye.