Mateu 7 - Tshwa Bible

Ku lamula vanwani.

¹ Mu nga lamuli, kasi ma kala ku lamuliwa. Lu. 6:37; Rom. 2:1

² Hakuva mu ta lamuliwa hi kulamula loku mu lamulako ha kona vanwani; ni xiringaniso lexi mu ringanisako vanwani ha xona, mu ta ringaniswawu ha xona. Mar. 4:24; Lu. 6:38

³ Hi yini u cuwukisako a xitoti lexi xi nga lomu tihlweni ga makabye wa wena, kanilezi u nga woni a tsanza lowu wu nga tihlweni ga wena nwinyi ke?

⁴ U ta wulisa kuyini ka makabye wa wena, uku: Khwatsi, nzi susa a xitoti xi nga lomo tihlweni ga wena; kasi lezo ku na ni tsanza ka ga wena tihlo?

⁵ Wena muxengeteli, susa kuranga a tsanza lomo tihlweni ga wena nwinyi, zonake u ta wona ku te dlunya a ku susa xitoti xi nga tihlweni ga makabye wa wena.

⁶ Mu nga nyiki timbyana lezi zi basileko, hambu ni ku hoxa maperola ya nwina ka makhumba, ma nga taku ma ma kanzihela lahasi hi mikonzo ya wona, ma mu hunzulukela ma mu hanzula. Mav. 9:7, 8; Miti. 13:45, 46

Ku kambela.

⁷ Kombelani, mu ta nyikiwa; lavani, mu ta zi kuma; gongonzani, mu ta vululelwa. Mar. 11:24; Lu. 11:9, 10; Jak. 1:5, 6

⁸ Hakuva kani hi mani a kombelako, wa nyikiwa; ni loyi a lavako wa zi kuma; ni loyi a gongonzako i ta vululelwa. Mav. 8:17; Jer. 29:12

⁹ Xana himani xikari ka nwina loyi a to nyika nʼwana wakwe a ribye, loku a kombela xibaba,

¹⁰ kutani loku a kombela xidluwani a mu nyika a nyoka ke?

¹¹ Hikwalaho loku nwina, na mu bihile, mu zi tiva ku nyika leʼzo saseka ka vanana va nwina, nguvunguvu a Raru wa nwina wa le tilweni a nga ta va nyika zilo zo saseka lava va mu kombelako ke?

¹² Hikwalaho zontlhe lezi mu ranzako a kuva vanhu va zi maha ka nwina, va maheleniwo zona; hakuva lezi i nayo ni vaprofeti. Levi 19:18; Lu. 6:31; Rom. 13:8

A tindlela timbiri.

¹³ Enghenani hi nyangwa yo hlongana; hakuva a nyangwa yi yako kulobyisweni yi anamile, ni ndlela yi komamako kona yi kulile; mbanyingi va fambako ha yona. Lu. 13:24

¹⁴ Kanilezi a nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako.

A mitiro yi tibyiwa hi mihanzu ya yona.

¹⁵ Chavani a vaprofeti va mawunwa, lava va tako ka nwina na va ambele a tinguwo ta tiyivu, kanilezi timbilwini tabye va hi timhisi leti ti pamako. Deut. 13:3; Jer. 23:16; Rom. 16:17

¹⁶ Mu ta va tiva hi mihanzu yabye. Kunene a vanhu vakota mauva mizweni ke, ni makuwu le makahweni ke?

¹⁷ Zinghaho ni tisinya tontlhe to saseka ti pswala mihanzu yo nanziha; kanilezi a sinya yo biha yi pswala mihanzu ya kubiha.

¹⁸ A sinya yo saseka a yi zi koti ku pswala mihanzu ya kubiha, hambu ni sinya yo biha a yi zi koti ku pswala mihanzu yo nanziha.

¹⁹ A sinya yinwe ni yinwani leyi yi nga pswaliko mihanzu yo nanziha, yi tsemiwa, yi hoxiwa nzilweni. Xip. 3:10; Lu. 3:9; Joh. 15:2, 6

²⁰ Hikwalaho hi mihanzu yabye mu ta va tiva.

²¹ A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni. Miti. 19:13; Rom. 2:13; Jak. 1:22

²² A vanyingi va taku ka mina hi lego siku: Hosi, Hosi, a hi profetangi hi vito ga wena ke; hi vito ga wena a hi hlongolangi madimoni ke; a hi mahangi zirewukiso zo tala hi vito ga wenake? Joh. 11:51; 1 Kor. 13:2

²³ Zonake nzi taku ka vona: Cima nzi wa nga mu tivi; sukani ka mina, nwina vaonhi: Tis. 5:5; Lu. 13:25, 27; 2 Tim. 2:19

Ziseketelo zimbiri.

²⁴ Hikwalaho kani hi mani loyi a zwako a timhaka leti ta mina, a ti maha, i ta fanana ni munhu a tlharihileko, loyi a nga aka yindlu yakwe laha ribyeni. Lu. 6:47

²⁵ Zonake yina vula, ni mintalo yi lota; ni timheho ti lo bhubhutsa, ti taba yindlu leyo, kanilezi a yi wangi, hakuva yi wa gingilwe ribyeni.

²⁶ Ni kani hi mani loyi a zwako a timhaka ta mina, a nga ti mahi, i ta fanana ni munhu wa phuphulu, loyi a nga aka yindlu yakwe vunyeni.

²⁷ Zonake yi lona vula, ni mintalo yi lota, ni timheho ti lo bhubhutsa, ti taba yindlu leyo, yiwa; ku wa hi ka hombe a kuwa ka yona.

²⁸ Ku te laha Jesu na mbhetile leti timhaka, a zidlemo zi lo hlamala hi kugonzisa kakwe; Xip. 13:54; Mar. 1:22; Lu. 4:32

²⁹ hakuva i lo va gonzisa kota munwe a nga ni ntamu, na ku nge khwatsi hi vatsali vabye. Joh. 7:46