Mateu 5 - Tshwa Bible

Jesu a xumayela le xitsungeni.

¹ Laha Jesu na wona zidlemo, i lo kanziha xitsungeni; laha na a tshatirile lahasi a vapizani vakwe va lo tshinela ka yena. Mar. 3:13

² Zonake i lo vulula nomu wakwe a va gonzisa, aku:

³ Va katekile a zisiwana moyeni, hakuva mufumo wa le tilweni ngwabye. Lu. 6:20

⁴ Va katekile lava va rilako, hakuva va ta chavelelwa.

⁵ Va katekile lava va kurula, hakuva va taga tshomba ya misava. Tis. 37:11; Rom. 4:13

⁶ Va katekile lava va nga ni ndlala ya leʼzo lulama ni tora ga zona, hakuva va ta xuriswa. Isa. 55:1

⁷ Va katekile lava va nga ni wuxinji, hakuva va ta mahelwa wuxinji. Tis. 41:1; Maheb. 6:10; Jak. 2:13

⁸ Va katekile lava va kubasa timbilu, hakuva va ta wona Nungungulu. 1 Kor. 13:12; Maheb. 12:14; 1 Joh. 3:2, 3

⁹ Va katekile lava va lamulako, hakuva va ta vitanwa vana va Nungungulu.

¹⁰ Va katekile lava va xaniswako hi kota ya kululama, hakuva mufumo wa le tilweni ngwabye. 2 Tim. 2:12; 1 Ped. 3:14

¹¹ Mu katekile loku va mu rukatela, va mu xanisa, va mu lumbeta kontlhe kubiha hi kota ya mina. Lu. 6:22; 1 Ped. 4:14

¹² Tsakani, mu nengela nguvu, hakuva ngwa hombe a nchachazelo wa nwina le tilweni; hakuva va lo xanisisa lezo a vaprofeti lava va mu rangeleko. Neh. 9:26; Miti. 5:41; 1 Ped. 4:13

Mu munyu wa misava ni kuwonekela ka tiko.

¹³ Nwina mu munyu wa misava; kanilezi loku munyu wu pswhama, wu ta lungwa hi yini? A wa ha vuni nchumu ntsena ku hoxiwa lahandle wu kanzihelwa hi vanhu. Mar. 9:50; Lu. 14:34, 35

¹⁴ Nwina mu kuwonekela ka tiko; a muti lowu wu nga hehla ka xitsunga a wu na ku sirelwa. Mav. 4:18; Fil. 2:15

¹⁵ Ni kandiya, a yi lumekwi yi vekiwa lahasi ka xirunzu, kanilezi yi hayekwa le hehla, yi woninga vontlhe lava va nga lomu ndlwini. Mar. 4:21; Lu. 8:16; 11:33

¹⁶ Hizalezo ngha na kuwonekela ka nwina ku woninga mahlweni ka vanhu, kasi va wona mitiro ya nwina yo saseka, va dumisa a Raru wa nwina wa le tilweni. Joh. 15:8; 1 Kor. 14:25; 1 Ped. 2:12

A nayo ni vaprofeti.

¹⁷ Mu nga alakanyi muku nzi tele ku ta fuvisa nayo hambu ni vaprofeti; a nzi telangi ku ta fuvisa, kanilezi ku ta tatisa. Rom. 3:31; Gal. 3:24

¹⁸ Hizinene nziku ka nwina: Ku ta kala ku hunza a tilo ni misava, na cima ku nga fuvangi a nzhatana munwe kutani xidokho xinwe xa nayo, kala zontlhe lezi zi maheka. Lu. 16:17

¹⁹ Hikwalaho kani hi mani a ta nga hambunyeta munwe wa milayo leyi yi tsongwani, a gonzisa vanhu ku maha lezo, i ta hlayiwa loyi tsongwanyani mufunweni wa le tilweni. Kanilezi loyi a hlayisako milayo a yi gonzisa, i ta hlayiwa wahombe mufunweni wa tilo. Jak. 2:10

²⁰ Hakuva nza mu byele, nziku; Loku a kululama ka nwina ku nga hunzi a kululama ka vatsali ni vaFarisi, cima mu nga ta enghena mufunweni wa tilo. Rom. 9:31

A zanga ni kudaya.

²¹ Mu zi zwile lezi zi nga wuliwa ka vakale, za ku ngalo; U nga dayi; loyi a dayako i yimelwe hi ku lamulwa hi hubye. Ekso. 20:13; Deut. 5:17

²² Kanilezi mina nziku ka nwina: Kani hi mani a zangarelako makabye wakwe i yimelwe hi ku lamulwa hi hubye; kani hi wihi a ta nga wula ka makabye wakwe, aku: Xipumbu, i yimelwe hi ku lamulwa hi hlengeletano; kani hi wihi a wulako aku: Wena u phuphulu, i yimelwe hi ku hoxiwa Gehena ga nzilo. Jak. 2:20; 1 Joh. 3:15

²³ Hikwalaho loku u humesa muphahlo wa wena laha alatini, u alakanya kona lezaku nakuloni i na ni mhaka na wena,

²⁴ siya a muphahlo wa wena mahlweni ka alati, u famba u ya wuyisana ni nakuloni kuranga, zonake wuya u ta humesa a muphahlo wa wena.

²⁵ Hatlisa u vumelana ni loyi a ku kecarako na wa ha hi naye laha ndleleni; ku nga taku a mukecari wa wena a ku yisa ka mulamuli, a mulamuli a ku nyikela ka nyakasani u valelwa paxweni. Mav. 25:8; Lu. 12:58, 59

²⁶ Hizinene nziku ka wena: Cima u nga ta huma kona, u kala u riha mali yontlhe.

A ku navela wasati.

²⁷ Mu zwile lezaku ku wulilwe ku ngalo: U nga bhayi.

²⁸ Kanilezi mina nziku ka nwina: Kani hi mani a cuwukako wasati a mu navela, i sina a bhayile naye mbilwini yakwe. Mav. 6:25

²⁹ Loku a tihlo ga wena ga xinene gi ku maha u khubeka, gi xokole, u gi hoxa kule; hakuva zi ku sasekele lezaku xiro xinwe xa wena xi lova, lezaku kasi a miri wa wena wontihe wu nga hoxiwi Gehena. Xip. 18:8, 9; Mar. 9:43-47; Rom. 8:13

³⁰ Ni loku canja ga wena ga xinene gi ku maha u khubeka, gi tseme, u gi hoxa kule; hakuva zi ku sasekele lezaku xiro xinwe xa wena xi lova, lezaku kasi a miri wa wena wontihe wu ngayi Gehena.

Ku hambanyisa wukati.

³¹ Ku wa wulilwe kambe ku ngalo: Loku munhu a hlongola sati wakwe, a mu nyike a papilo ga kuhambana. Deut. 24:1; Jer. 3:1; Mar. 10:2

³² Kanilezi mina nziku ka nwina: Kani hi mani a hlongolako a sati wakwe, ahandle ka mhaka ya wubhayi, wa mu bhayisa; kani hi wihi a ta nga mu teka laha pa hlongolwe wa bhaya. Lu. 16:18; Rom. 7:3; 1 Kor. 7:10, 11

Ku hlantbanya.

³³ Kambe mu zwile lezi zi nga wuliwa ka vakale ku ngalo: U nga hlambanyi hi mawunwa, kanilezi u ta tatisa ka Hosi a zifungo za wena. Ekso. 20:7; Levi 19:12; Deut. 23:23

³⁴ Kanilezi mina nziku ka nwina: Mu nga hlambanyi ni kanwe; hambu hi tilo, hakuva xitshamu xa wuhosi xa Nungungulu; Isa. 66:1; Xip. 23:16

³⁵ hambu hi misava, hakuva xikhegetelo xa mikonzo yakwe; hambu hi Jerusalema, hakuva hi muti wa Hosi ya hombe.

³⁶ U nga hlambanyi hi hloko ya wena; hakuva a ku zi koti ku hunzula a sisi munwe wu maha wo basa kutani wa ntima.

³⁷ Kanilezi kuwulawuleni ka nwina, loku muku, Ina, a kuve ina; a Ahihi ava ahihi; kani hi xihi xa ku hunza lezi xita hi ka loyi wa kubiha. Kol. 4:6; Jak. 5:12 Ku ti photela.

³⁸ Nwina mu zi zwile lezaku ku wa wulilwe ku ngalo; A tihlo gi rihiwa hi tihlo, a tino hi tino; Ekso. 21:24; Levi 24:20; Deut. 19:21

³⁹ kanilezi mina nziku ka nwina: Mu nga tsimbeteli loyi wa kubiha; kanilezi kani hi mani a ku phakatako a rama ga xinene, hunzuluka u mu nyika ginwani kambe. Isa. 50:6; Lu. 6:29; Rom. 12:17, 19

⁴⁰ Loku munhu a lava ku ku kecara kasi ku ku tekela hembe, mu nyike ni bhaji ga wena.

⁴¹ Loku munhu a ku kurumeta ku mu heleketa pfhuka munwe, famba naye mipfhuka mimbiri. Xip. 27:32; Mar. 15:21

⁴² Mu nyike loyi a ku kombelako, ni loyi a ku lombako u nga mu fulareli. Deut. 15:8; Lu. 6:30, 35

Ku ranza valala.

⁴³ Mu zwile lezaku ku wulilwe ku ngalo: U ta ranza muakelane wa wena, u venga nala wa wena. Levi 19:18; Deut. 23:6

⁴⁴ Kanilezi mina nziku ka nwina: Ranzani valala va nwina, mu kombelela lava va mu xanisako; Lu. 6:27, 35; 23:34; Miti. 7:60

⁴⁵ kasi mu fela kuva vana va Raru wa nwina loyi a nga le tilweni; hakuva wa tsuwukisa gambo gakwe hehla ka vobiha ni ka vosaseka, a nisa vula hehla ka valulamileko ni ka va nga lulamangiko.

⁴⁶ Hakuva loku mu ranza lava va mu ranzako, i nchachazelo muni mu nga nawo ke? Hambu a vahlengisi a va mahi lezo ke? Lu. 6:32

⁴⁷ Loku mu losa vamakabye va nwina ntsena, mu va hunza hi yini a vanwani? Na vona vamatiko a va mahi lezo ke?

⁴⁸ Hikwalaho ngha na nwina mu mbhelela, khwatsi hi Raru wa nwina wa le tilweni a mbheleleko. Gen. 17:1; Efe. 5:1; Jak. 1:4