Mateu 4 - Tshwa Bible

A katingwa ka Jesu.

¹ Zonake Jesu i lo yiswa hi Moya xiwuleni, lezaku kasi a ya ringwa hi Satani. Mar. 1:12; Lu. 4:1; Miti. 8:39

² Laha na yilile a 40 wa masiku ni 40 wa wusiku i lozwa ndlala.

³ Zonake a muringi i lota, a taku ka yena: Loku wena u hi Nʼwana wa Nungungulu, laya a maribye lawa lezaku ma maha zibaba.

⁴ Kanilezi i lo hlamula aku ngalo: Ku tsalilwe lezaku: A munhu a nga ta hanya hi xibaba xoce, kanilezi hi timhaka tontlhelele leti ti humako nonwini wa Nungungulu. Deut. 8:3

⁵ Zonake Satani i lo mu yisa mutini wo basa, a mu yimisa xixungweni xa tempeli,

⁶ aku ka yena: Loku wena u hi Nʼwana wa Nungungulu, ti tsikelete laha, hakuva ku tsalilwe ku ngalo: I ta ruma tingelosi takwe Lezaku ti ku tlakula hi mandla ya tona, Kasi u nga gumuli a konzo wa wena ribyeni. Tis. 91:11, 12

⁷ Jesu i te ngalo ka yena: Kambe ku tsalilwe ku ngalo: U nga ringi Hosi Nungungulu wa wena. Deut. 6:16

⁸ Zonake Satani i lo mu yisa xitsungeni xo leha nguvu, a mu kangeta yontlhe mifumo ya misava ni wukosi ga yona;

⁹ aku ngalo kakwe: Nzi ta ku nyika zontlhe lezi zilo, loku uwa lahasi u nzi khozela.

¹⁰ Kanilezi Jesu aku ngalo kakwe: Suka Satani; hakuva ku tsalilwe ku ngalo: Wena u ta khozela Hosi Nungungulu wa wena, hi yena yece u to mu tirela. Deut. 6:13; 10:20

¹¹ Zonake Satani i lo mu tsika; languta, a tingelosi ti lota ka Jesu ti ta mu khozela. Maheb. 1:14

¹² Makunu laha Jesu na Zwile lezaku Johani i valelwe paxweni, i loya Galilea.

¹³ Na suka Nazareta, i lo ta tshama Kapernaume, ku nga hi le bimbini, le matikweni ya Zebuloni na Naftali;

¹⁴ kasi ku fela ku tatiseka lezi zi nga kanelwe hi muprofeti Isaya, aku:

¹⁵ A tiko ga Zebuloni ni tiko ga Naftali, Hi tlhelo ga bimbi, tlhatukweni wa Jordani, A Galilea ga vamatiko, Isa. 9:1, 2

¹⁶ A vanhu va nga tshamile munyameni va lo wona a kuwonekela ka hombe, Ni lava va nga tshamile tikweni ga nzhuti wa kufa, A kuwonekela ku woningile hehla ka vona. Isa. 42:7; Lu. 2:32

Jesu a sangula a ntiro wakwe.

¹⁷ A ka xikhati lexo Jesu i lo sangula ku kanela, aku: Hunzulukani, hakuva a mufumo wa tilo wu tshinele. Mar. 1:14, 15; Xip. 10:7

¹⁸ Na kari a famba fungwini wa bimbi ga Galilea, i lo wona vavanuna vambiri, Simoni loyi a vitwako Pedro, ni nakulobye Andreu, na va peta likoka bimbini, hakuva va wa hi vakukuti. Mar. 1:16-18; Joh. 1:42

¹⁹ I te ngalo ka vona: Nzi lanzeleni, nzi ta mu maha vakukuti va vanhu. Lu. 5:10, 11

²⁰ Zalezo va lo siya tikoka tabye, va mu lanzela.

²¹ Na a ha suka hi kwalaho i lo wona vanwani vavanuna vambiri, Jakobe nʼwana Zabedi, ni nakulobye Johani, va nga tshamile ngalaveni zinwe ni raru wabye, na va rungetela tikoka tabye; i lo va vitana. Mar. 1:19, 20; Lu. 5:10

²² Zalezo va lo siya a ngalava ni raru wabye, va lanza Jesu.

²³ Jesu i lo nzulanzula le Galilea gontlhe, na a gonzisa masinagogeni yabye, na a kanela ivangeli ya mufumo, a chuma tixaka tontlhe ta tinghumbe, ni tixaka tontlhe ta mababyi xikari ka vanhu. Xip. 24:14; Mar. 1:34; Lu. 4:14

²⁴ A wudumo gakwe gi lo zwala Siria gontlhe. Va neha kakwe vontlhe va nga kari va babya, va nga hi ni tinghumbe ti tsalangeneko ni kubayisa, na va hi ni madimoni, ni zitsuri, ni zikhurubu, i lo va hanyisa.

²⁵ A xidlemo xa hombe xi lo mu lanzela ha xita hi le Galilea, ni le Dekapoli, ni Jerusalema ni le Judia ni le tlhatukweni wa Jordani. Mar. 3:7