Mateu 28 - Tshwa Bible

A kuvuka ka Jesu.

¹ A kumbheleni ka sabado ku lota Maria wa le Magdala ni munwani Maria ku ta wona nkele na ga hi mpunzu hi siku go ranga ga viki. Mar. 16:1; Lu. 24:1; Joh. 20:1

² Zonake ku wa hi kona a kutsekatseka ka hombe ka misava, hakuva a ngelosi ya Hosi yi lo relela hi le tilweni, yi ta wumbuluta a ribye, yi tshama hehla ka gona. Lu. 24:4; Joh. 20:12

³ Yi lo woneka khwatsi kuhatima, a tinguwo ta yona ti wa basile kota gapongo. Dan. 10:6

⁴ Hi ku yi chava a varinzeli va lo rurumela, vaku khwatsi hi vafileko.

⁵ A ngelosi yi lo wula ka vavasati, yiku: Mu nga chavi; hakuva nza zi tiva lezaku mu lava Jesu, loye a nga belelwe.

⁶ A nga kona laha, hakuva i vukile, kota lezi a nga wulile. Tanani, mu ta wona a wutshamu laha a Hosi yi nga etlele kona. Xip. 12:40; 20:19

⁷ Hatlisani mu famba, mu ya byela vapizani vakwe, muku: I vukile hi ka vafileko. Wa mu rangela a ku ya Galilea; mu ta mu wona kona. Mangabye, nzi mu byelile. Xip. 26:32; Mar. 16:7

⁸ Va lo hatlisa va suka nkeleni hi kutsaka ka hombe, va tsutsuma va ya byela vapizani vakwe.

⁹ Na va haya Jesu i lo va tlhangaveta, aku: Xeweni! Va lo tshinela, va khoma milenge yakwe, va mu khozela. Joh. 20:14

¹⁰ Jesu aku kabye: Mu nga chavi; fambani mu ya byela a vamakabye va mina lezaku vaya Galilea, hi laho va ta nga nzi wona kona. Rom. 8:29; Maheb. 2:11

¹¹ Makunu na va kari va famba, a varinzeli vanwani va lo chikela mutini, va ya bikela vapristi va hombe zontlhe lezi zi mahekileko.

¹² Vona na va tsombene ni masingalakati, va lo tsema khungo, va nyika masochwa a mali yo tala,

¹³ vaku: Wulani muku: A vapizani vakwe va lota ni wusiku, va ta mu yiva na hi etlele wurongo.

¹⁴ Loku zi zwiwa hi mufumeli, hi ta mu kholwisa yena, hi mu vikela.

¹⁵ Lezo va lo teka a mali, va ya maha lezi va leletelweko. A kuwula loku ku lo hangalaka xikari ka vaJuda kala ni nyamutlha lezi. Jesu a woneka ka vapizani vakwe.

¹⁶ Kanilezi a vapizani va khume ni munwe va loya Galilea, le xitsungeni lexi Jesu a nga va byelile xona. Vesi 7; Xip. 26:32

¹⁷ Laha va nga mu wona, va lo mu khizamela, kanilezi vanwani va kanakana.

¹⁸ Zonake Jesu i lo tshinela ka vona, aku kabye: Wu nyikilwe ka mina a ntamu wontihe a tilweni ni laha misaveni; Dan. 7:13; Lu. 10:22; Miti. 2:36; Efe. 1:21; Maheb. 1:2

¹⁹ hikwalaho fambani, mu va maha vapizani a matiko wontihe, mu va bapatiza hi vito ga Dadani ni ga Nʼwana ni ga Moya wa ku Basa; Isa. 52:10; Mar. 16:15; Kol. 1:23

²⁰ mu va gonzisa a ku gonga zontlhe lezi nzi mu layileko zona. Mangabye, nzi na nwina a masiku wontihe, na kona kugumelweni ka xikhati. Miti. 2:42