Mateu 27 - Tshwa Bible

Jesu a lamulwa hi Pilatu.

¹ Laha na gi cile, vontlhe vapristi va hombe ni masingalakati ya vanhu va lo xuxa makungo ha Jesu ya ku mu daya. Tis. 2:2; Mar. 15; Lu. 22:66

² Va lo mu boha, va famba naye, va ya mu nyikela ka mufumeli Pilatu. Miti. 3:13

³ Zonake Judasi, loyi a mu tokometileko, laha na a wonile lezaku Jesu i konilwe, i lo ti sola a tlhelisa a 30 wa macheleni ka vapristi va hombe ni ka masingalakati,

⁴ aku: Nzi onhile lezi nzinyikeleko munhu a nga onhangiko nchumu. Kanilezi va te ngalo: Xini lexo ka hina? I mhaka ya wena!

⁵ Lezo i lo hoxa a mali lomo tempeleni; i lo suka, a famba a ya ti sunga. 2 Sam. 17:23; Miti. 1:18

⁶ A vapristi va hombe va lo teka a macheleni, vaku: A ma fanelwi ku vekwa lomu ka minyikelo, hilezi i nzhiho wa nkhata.

⁷ Va lo xuxa a kungo, va xava ha yona a simu ga muwumbi, kasi ku lahla kona a vamatiko.

⁸ Hilezo a simu lego ni nyamutlha lezi gi Vitiwa, A simu ga nkhata. Miti. 1:19

⁹ Hi laha ku nga tatiseka lezi muprofeti Jeremia a nga kanela, aku: Va lo teka a 30 wa zipanze za siliva, a tsengo wa loyi a nga pimilwe, loyi a vo kari va vana va Israeli va nga mu pimela. Zak. 11:12, 13

¹⁰ Va lo xava ha zona a simu ga muwumbi, kota lezi a Hosi yi nzi layileko.

¹¹ Laha Jesu a nga wa yimile mahlweni ka mufumeli, yena i lo mu wutisa, aku: Wena u hosi ya vaJuda ke? Jesu aku ngalo kakwe: U wula zona. Mar. 15:2; Lu. 23:3; Joh. 18:37

¹² Laha a nga kecariwa hi vapristi va hombe ni masingalakati, a nga hlamulangi nchumu. Joh. 19:9

¹³ Pilatu aku kakwe: A ku zizwi zontlhe lezi va ku kecarako ha zona ke? Joh. 19:10

¹⁴ Cima a nga mu hlamulangi nchumu, hambu ni mhaka yinwe; hi ka lezo a mufumeli i lo hlamala nguvu.

¹⁵ Laha mubuzweni a mufumeli i wa tolovele ku tlhatlhisela vanhu a peresu yinwe, leyi va yi ranzako. Mar. 15:6; Lu. 23:17; Joh. 19:19

¹⁶ A ka xikhati lexo va wa hi ni peresu leyi yi zweleko, va ngaku hi Barabasi.

¹⁷ Hikwalaho laha na va tsombene, Pilatu aku kabye: Mu ranza lezaku nzi mu tlhatlhisela mani ke, Barabasi, kutani Jesu loyi a tibyako Kristu?

¹⁸ Hakuva i wa zi tivile lezaku va mu kecarile hi wukhuxu.

¹⁹ Laha Pilatu na ha tshamile xitshanwini xa kulamula, a sati wakwe i lo rumela mhaka kakwe, aku; Ngha u nga hi na mhaka ni munhu loye a lulamileko. Hakuva ni wusiku nzi xanisekile nguvu hi kulora hi kota ya yena.

²⁰ Kanilezi a vapristi va hombe ni masingalakati va lo kucetela zidlemo a kuva zi kombela Barabasi, Jesu a dawa. Mar. 15:11; Lu. 23:18; Joh. 18:40

²¹ A mufumeli i lo va wutisa, aku: Hi wihi wa lava vambiri mu ranzako a kuva nzi mu tlhatlhisela yena ke? Vaku: Barabasi.

²² Pilatu aku ngalo kabye: Zonake nzi ta maha yini ha Jesu loyi a tibyako Kristu? Vontlhe vaku: Ngha a belelwa!

²³ Yena aku: Hikuyini, kubiha muni a ku mahileko ke? Kanilezi va lo kanyuluka nguvu, vaku: Ngha a belelwa!

²⁴ Lezo Pilatu na a wonile lezaku a nga zi koti ku va rutisa, ntsena ku vuxa woyonga, i lo teka mati, a hlamba mandla yakwe mahlweni ka xidlemo, aku: A nzi na nanzu hi nkhata wa munhu loyi a lulamileko; ti woneleni nwina. Deut. 21:6

²⁵ A vanhu vontlhe va lo hlamula, vaku: A nkhata wakwe a wuve hehla ka hina, ni hehla ka vana va hina. Deut. 19:10; Jox. 2:19; 2 Sam. 1:16

²⁶ Zonake i lova tlhatlhisela Barabasi; kanilezi Jesu i lo mu xupula, a mu nyikela a kuva a belelwa. Isa. 53:5; Mar. 15:15

Jesu a tseketselwa hi masochwa.

²⁷ Zonake a masochwa ma lo yisa Jesu lomu xiluvelweni, a ntlawa wontihe wu tsombana lomo.

²⁸ Va lo runzuwula tinguwo ta Jesu, va mu ambexa a nguwo yo pswhuka. Lu. 23:11

²⁹ Va lo luka a xidlodlo xa mizwa, va xi tlhateka hlokweni yakwe, va mu khomisa lihlanga canjeni gakwe ga xinene; va lo khizama mahlweni ka yena, va mu tseketsela, vaku: Xewe, hosi ya vaJuda! Tis. 69:19; Isa. 53:3

³⁰ Va lo mu phelela, va teka a lihlanga vaba hloko yakwe. Isa. 50:6

³¹ Laha na va mu tseketsela, va lo mu tlhatlha a nguwo yo pswhuka, va mu ambalisa a tinguwo takwe, va famba naye a ku ya mu belela.

A kubelelwa ka Jesu.

³² Kota lezi va nga ha huma, va lo kuma a munhu wa le Kirene, loyi a tibyiwako Simoni; va lo mu kurumeta a ku rwala a xihambano xa Jesu. Mitse. 15:35; 1 Tih. 21:13; Mar. 15:21

³³ Laha na va chikele wutshanwini gi tibyako Golgota, hi lezaku, a wutshamu ga xikodo,

³⁴ va lo mu nyika vinya a kunwa na gi xanganyelwe ni nyongwa; kanilezi laha na a gi ringile, a nga vumelangi kunwa. Tis. 69:21

³⁵ Laha na va mu belele, va lo avelana a tinguwo takwe hi ku hlahluva tihlolo. Mar. 15:24; Lu. 23:34; Joh. 19:24

³⁶ Zonake va lo tshama hasi va mu lavelela.

³⁷ Va lo nameketa hehla ka hloko yakwe a mutsalo wa nanzu wakwe wu nge ngalo: Loyi hi Jesu, a hosi ya vaJuda. Mar. 15:26; Lu. 23:38; Joh. 19:19

³⁸ Zonake ku lo belelwa zinwe naye a vaphangi vambiri, a munwe canjeni ga xinene ni munwani canjeni ga xibhabha. Isa. 53:12; Mar. 15:27

³⁹ Lava va nga hunza laho va lo mu rukatela, va mu chepeta hi tihloko tabye, Tis. 22:7; Lu. 23:35

⁴⁰ vaku: Wena loyi u khungumuleko tempeli, u yi aketa hi masiku manharu, hi nga ti hanyisa ka! Loku u hi Nʼwana wa Nungungulu, chika xihambanweni. Xip. 26:63

⁴¹ Zinghaho ni vapristi va hombe va lo mu tseketsela, zinwe ni vatsali ni masingalakati, vaku:

⁴² I hanyisile vanwani, kanilezi a nga zi koti ku ti hanyisa! Loku a hi hosi ya vaIsraeli, a chike xihambanweni, hina hi ta kholwa ka yena.

⁴³ I tsumbile Nungungulu; a mu tlhatlhise makunu, loku a kari a mu ranza; hakuva i te ngalo: Nzi Nʼwana wa Nungungulu. Tis. 22:8

⁴⁴ Ni vaphangi lava va nga belelwe zinwe naye va lo mu rukatela kota lezo na vonawu. Mar. 15:32; Lu. 23:39

⁴⁵ A kusukela hora ya wuntlhanu ni yinwe ku wa hi ni munyama misaveniyontlhe ku kala a hora ya wuntlhanu ni mune. Am. 8:9; Lu. 23:44

⁴⁶ Hi hora ya wuntlhanu ni mune, Jesu i lo vitana hi gezu ga hombe, aku: Eli, Eli, lama sabaktani? Lezo hi ku ngalo: Nungungulu wa mina, Nungungulu wa mina, u nzi tsikele yini? Tis. 22:1; Maheb. 5:7

⁴⁷ A vanwani lava va nga yimile laho, laha na va zi zwile, vaku ngalo: I vitana Elija.

⁴⁸ Zonake a munwe wa vona i lo tsutsuma, a ya teka a khuvi, a gi tatisa hi vinagre, a gi tihomeka lihlangeni, a mu nyika a kuva anwa. Tis. 69:21; Mar. 15:36

⁴⁹ A vanwani vaku: Wa nga tsika; ha nga wona kutani i tata Elija a ta mu hanyisa.

⁵⁰ Jesu i lo engeta a keta hi gezu ga hombe, a nyikela moya.

⁵¹ Languta, a xisirelo xa tempeli xi lo hanzuka hi laha xikari, kusukela hehla kala lahasi; a misava yi lo tsekatseka, a maribye ma panzeka; Ekso. 26:31; 2 Kro. 3:14; Lu. 23:45

⁵² A zilahla zi lo vululeka, ni mimiri ya vanyingi laʼvo basa lava va nga file yi lo vuxiwa.

⁵³ Va lo huma zilahleni anzhako ka kuvuka ka Jesu, va enghena mutini wo basa, va woneka ka vanyingi.

⁵⁴ Laha a nduna ya zana ni lava va nga hi nayo va lavelela Jesu, na va wonile a kutsekatseka ka misava, ni zinwani zi nga wa mahekile, va lo chava nguvu, vaku: Hakunene, loyi i wa hi Nʼwana wa Nungungulu! Mar. 15:39; Lu. 23:47

⁵⁵ A vavasati vanyingi lava va nga lanzele Jesu hi le Galilea, va mu tirela, va wa hi kona laho, va cuwuka hi le kule. Lu. 8:2, 3

⁵⁶ Xikari kabye ku wa hi na Maria wa le Magdala, na Maria a nyine wa Jakobe na Jose, ni nyine wa vana va Zabedi. Mar. 15:40

A kulahlwa ka Jesu.

⁵⁷ Laha gi nga pelile, ku lota munhu a fumileko wa le Arimatea, a vito gakwe hi Josefa, loyi yenawu a nga hi mupizani wa Jesu; Mar. 15:42; Lu. 23:50; Joh. 19:38

⁵⁸ Aya ka Pilatu a ya kombela xirumbi xa Jesu; Pilatu i lo laya lezaku a xi nyikiwe ka yena.

⁵⁹ Josefa i lo teka a xirumbi, a xi petsela hi nguwo yi basileko ya wukene.

⁶⁰ I lo xi veka lomu ka xilahla xakwe xa xiswa, lexi a nga ti kehlela xona le ribyeni. I lo wumbulutela a ribye ga hombe laha nyangweni ya xilahla, a ti fambela. Isa. 53:9

⁶¹ Maria wa le Magdala i wa hi kona, ni munwani Maria, va tshamile xungetano ni xilahla.

⁶² Hi manziko wa kona, gi nga siku gi gamelako ga Kulongisela, a vapristi va hombe ni vaFarisi va lo tsombana ka Pilatu,

⁶³ vaku: Hosi, ha alakanya lezaku a mukhohlisi loyi na a ha hanya i te ngalo: Nzi ta vuka hi siku ga manharu. Xip. 17:23; Mar. 8:31; Lu. 9:22

⁶⁴ Hikwalaho laya lezaku a xilahla xi rinzelwa ku kala siku ga manharu, ku nga taku a vapizani vakwe vata va ta mu yiva, va wula ka vanhu, vaku: I vukile hi ka vafileko; zonake a kukhohlisa ko gumesa ku ta biha ku hunza ko ranga.

⁶⁵ Pilatu aku kabye: A varinzeli hi lava, fambani mu ya rinzela kota mu zi kotako.

⁶⁶ Lezo va lo famba, va ya lavelela xilahla, va xi tiyisa hi ku veka xifungo laha ribyeni, va veka varinzeli laha nyangweni. Dan. 6:17