Mateu 24 - Tshwa Bible

A ziwoniso zo kuwuya ka Jesu ni za kugumesa ka tiko.

¹ Jesu i lo huma tempeleni, a ti fambela. Zonake a vapizani vakwe va lota kakwe, va mu komba a tiyindlu ta tempeli.

² Kanilezi yena aku kabye: A mu zi woni zontlhe lezi ke? Hizinene nziku ka nwina: Laha ku nga ta siyiwa a ribye ginwe hehla ka ginwani, legi gi ta nga kala gi nga khungumulwa 1 Tih. 9:7; Jer. 26:18; Lu. 19:44

³ Na a tshamile xitsungeni xa maoliva, a vapizani va lota kakwe na va hi voce, va taku: Hi byele a xikhati zi ta nga maheka ha xona lezi zilo, u hi tivisa ni xiwoniso xa kuwuya ka wena ni xa kugumesa ka tiko.

⁴ Jesu i lo hlamula aku ngalo kabye: Ti woneleni kasi mu nga pengiswi hi munhu. Efe. 5:6

⁵ Hakuva vanyingi va tata hi vito ga mina, na vaku: Hi mina Kristu; va ta pengisa vanyingi. Jer. 14:14; Vesi 11

⁶ Mu tazwa kulwa ni wudumo ga kulwa; ti woneleni lezaku mu nga dzukiswi. Lezi zilo zi fanele a kuva zi maheka, kanilezi a hi kona kugumesa.

⁷ Hakuva a tiko gi ta vukela tiko, ni mufumo wu ta vukela mufumo; ku tava kona tindlala ni kutsekatseka ka misava matshanwini ma tsalangeneko. Isa. 19:2

⁸ Kanilezi zontlhe lezi kusangula ntsena ka kuxaniseka.

⁹ Hi xikhati lexo va ta mu nyikela kuxanisekeni, va mu daya; mu ta vengiwa hi matiko wontihe hi kota ya vito ga mina. Xip. 10:17; Mar. 13:9; Lu. 21:12

¹⁰ Kwalaho ku ta khubeka vanyingi; va ta nyiketana ni ku vengana.

¹¹ Ku ta huma vaprofeti vanyingi va mawunwa, va pengisa votala. 2 Ped. 2:1; 1 Tim. 1:4

¹² A liranzo la vanyingi li ta titimela hi kota ya kuenzeleka ka kuonha.

¹³ Kanilezi loyi a timiselako kala kugumesa, yaloye i ta hanyiswa. Mar. 13:13; Maheb. 3:6, 14; Kuv. 2:10

¹⁴ A ivangeli leyi ya mufumo yi ta kanetwa misaveni yontlhe, kasi yiva wukustumunyu ka matiko wontihe; hi kona ku ta nga chikela a kugumesa. Xip. 4:23; Rom. 10:18; Kol. 1:6, 23

¹⁵ Hikwalaho, loku mu wona a manyalataniso ya mbhangalakasa, lawa ma nga kanetwa hi muprofeti Danyeli, na ma yimile wutshanwini go basa (loyi a gonzako lezi ngha a pima), Dan. 9:27; Mar. 13:14; Lu. 21:20

¹⁶ zonake lava va nga le Judia a va chavele zitsungeni;

¹⁷ loye a nga hehla ka yindlu a nga ha chiki a ku ya teka lezi zi nga lomu ndlwini yakwe;

¹⁸ ni loye a nga le masinwini ngha a nga tlheli a ya teka a nguwo yakwe,

¹⁹ Va tava ni khombo lava va nga ni tinyimba ni lava va anwisako hi lawo masiku. Lu. 23:29

²⁰ Khongelani lezaku a chawo wa nwina wu nga mahiwi hi mawuyakaya, hambu hi sabado;

²¹ hakuva hi xikhati lexo ku tava kona a kuxaniseka ka hombe, loku ku nga ngha ku nga hi kona hi kusanguleni ka misava kala makunu, cima ku nga ta ku va kona kambe. Dan. 9:26; Joeli 2:2

²² Loku lawo masiku ma wa nga komiswangi, ngha ku nga hi kona ni munwe a hanyisilweko; kanilezi hi kota ya vahlawulilweko a masiku lawo ma ta komiswa. Isa. 65:8, 9; Zak. 14:2, 3

²³ Hi xikhati lexo loku munhu aku ka nwina: Mangabye, hi loyi Kristu; kutani: Hi gaya; mu nga kholwi; Mar. 13:21; Lu. 17:23

²⁴ hakuva ku ta huma vanhu va ta nga ti wula Kristu hi ku hemba, ku huma ni vaprofeti va mawunwa; va ta maha ziwoniso za hombe ni zirewukiso, kasi ku pengisa ni vahlawulilweko loku zi koteka. Deut. 13:1; Rom. 8:28; 2 Tim. 2:19

²⁵ Langutani, nzi mu byelile hi mahlweni.

²⁶ Hikwalaho loku vaku ka nwina: Langutani, i le xiwuleni, mu ngayi kona; kutani, Langutani, i le tindlwini, mu nga va kholwi.

²⁷ Hakuva kota lezi a kuhatima ku humako hi Mutsuwuka-gambo, ku woneka ni le Muhlwa-gambo, ku tava nghaho a kuwuya ka Nʼwana wa munhu.

²⁸ Laha ku nga kona xirumbi, a makoti ma ta tsombana kona.

²⁹ Loku ku mbhelile a kuxaniseka ka lawo masiku; a gambo gi ta pfhupeliswa, ni hweti yi nga ta humesa a kuwoninga ka yona, ni tinyeleti ti tawa hi le tilweni, ni mintamu ya matilo yi ta tsekatsekiswa, Isa. 13:10; Ezek. 32:7; Am. 5:20; Joeli 2:10; Lu. 21:25

³⁰ Zonake ku ta woneka le tilweni a xiwoniso xa Nʼwana wa munhu; kwalaho a tixaka tontlhe ta misava ti ta rila loku ti wona a Nʼwana wa munhu na ata hi marefu ya tilo ni ntamu ni kungangamela ka hombe. Dan. 7:13; Zak. 12:12; Kuv. 1:7

³¹ Yena i ta ruma a tingelosi, takwe na tiba mimpunzu yo vuma nguvu; ti ta tsombanyisa a vahlawulilweko vakwe hi ka mune wa matlhelo ya misava, kusukela magemeta-musi ya tilo kala ka manwani magemeta-musi. 1 Kor. 15:52; 1 Tes. 4:16

³² Makunu gonzani hi sinya ya nkuwu a mufananiso wa wona: Loku a ravi ga wona gi nyuka, gi hluka matluka, ma zi tiva lezaku a ximumu xi le kusuhi;

³³ hizalezo na nwina, laha na mu wona zontlhe lezi, zi tiveni lezaku Nʼwana wa munhu i le kusuhi, kona tinyangweni. Jak. 5:9

³⁴ Hizinene nziku ka nwina: Lexi xizukulwana xi nga ta hunza, na zi nga se ku maheka lezi zilo zontlhe, Xip. 16:28; Mar. 13:30

³⁵ A tilo ni misava zi ta hunza, kanilezi a timhaka ta mina ti nga ta hunza. Isa. 51:6; Mar. 13:31

³⁶ Kanilezi lego siku ni lexo xikhati a ku na munhu a zi tivako,, hambu tingelosi ta tilo, hambu ni Nʼwana, sine Dadani yece. Miti. 1:7; 2 Ped. 3:10

³⁷ Kota lezi ku nga maheka masikwini ya Noa, ku tava nghaho a kuwuyeni ka Nʼwana wa munhu.

³⁸ Hakuva khwatsi hi lezi va ngaga, vanwa, va teka, ni ku tekiwa, a masikwini lawo ya mahlweni ka ntalo, ku kala siku lego Noa a nga enghena ha gona lomo tarwini, Gen. 6:3; Lu. 17:26

³⁹ a va nga tivi nchumu kala wuta ntalo, wu va kukuleta vontlhe; ku tava nghaho a kuwuyeni ka Nʼwana wa munhu.

⁴⁰ Hi xikhati lexo a vavanuna vambiri va ta ngha va hi le masinwini, a munwe i ta tekiwa, munwani a siyiwa;

⁴¹ a vavasati vambiri va ta ngha va kari va gaya xigayweni, a munwe i ta tekiwa, munwani a siyiwa.

⁴² Hikwalaho rinzelani, hakuva a mu gi tivi a siku legi yi ta ngata ha gona a Hosi ya nwina. Mar. 13:33; Lu. 21:36

⁴³ Kanilezi tivani lezi: Loku a nwinyi wa yindlu a wa xi tivile a xikhati a khamba gi ta ngata ha xona, ngha a rinzele, ngha a nga vumelangi a yindlu yakwe yi bhoxiwa, Lu. 12:39; 1 Tes. 5:2; Kuv. 16:15

⁴⁴ Hikwalaho na nwina, tshamani mu longile, hakuva a Nʼwana wa munhu wata hi xikhati lexi mu nga xi alakanyiko.

⁴⁵ Hi wihi loyi a nga nanza gi tsumbekileko ni go tlhariha, loye a hosi yakwe yi gi yimisileko hehla ka malanza ya yona, kasi ku ma nyika zakuga hi xikhati xi faneleko ke? Lu. 12:42; Miti. 20:28; 1 Kor. 4:2

⁴⁶ Gi katekile a nanza lego a hosi ya gona yi ta nga wuya, yi ta gi kuma na gi kari gi maha lezo.

⁴⁷ Hizinene nziku ka nwina, yi ta gi yimisa hehla ka zontlhe lezi yi nga nazo. Xip. 25:21, 23; Lu. 22:29

⁴⁸ Kanilezi loku a nanza lego gi bihile, na gi wula mbilwini ya gona, giku:. A hosi ya mina ya hlwela;

⁴⁹ gi sangula kuba malanza-kulobye, giga ni kunwa zinwe ni tifinela;

⁵⁰ a hosi ya gona yi ta wuya hi siku gi nga yi languteliko, ni xikhati lexi gi nga xi tiviko,

⁵¹ yi ta gi pulakanyisa, yi gi nyika xiavelo xa gona zinwe ni vaxengeteli; laha mikosi yi ta ngava kona ni kugetsela ka meno. Xip. 8:12; 25:30