Mateu 22 - Tshwa Bible

A mubuzo wa muchado.

¹ Jesu i lo engeta a kanela kabye hi mifananiso, aku: Lu. 14:16; Kuv. 19:7, 9

² A mufumo wa tilo wu fanana ni hosi yo kari, leyi yi nga mahela a nʼwana wa yona a mubuzo wa muchado.

³ Yi lo rumela a malanza ya yona a ku ya vitana lava va rambilweko mubuzweni; kanilezi va lo ala kuta.

⁴ Yi lo engeta yi ruma manwani malanza, yiku: Byelani lava va rambilweko, muku: Nzi longisile a zakuga za mina; a tinkavi ta mina ni zifuyo za mina zi nonileko zi tlhabyilwe; zontlhe zi longile. Tanani mubuzweni.

⁵ Kanilezi va lo honisa, va ti fambela; munwani masinwini yakwe, ni munwani mabhinzwini yakwe.

⁶ A vanwani va lo khoma malanza, va ma wisa tingana, va ma daya.

⁷ Zonake a hosi yi lo zangara; yi lo rumela tiyimpi ta yona, ti ya lovisa vadayi lavo, ni ku hisa muti wabye. Dan. 9:26; Lu. 19:27

⁸ Zonake yiku ka malanza ya yona: A mubuzo wu longile, kanilezi lava va nga rambilwe va wa nga faneli. Xip. 10:11, 13; Miti. 13:46

⁹ Hikwalaho fambani mahanzakanyeni ya tindlela, mu ya ramba vontlhe lava mu ta nga va kuma.

¹⁰ A malanza lawo ma lo famba tindleleni, ma ya tsombanyisa vontlhe lavo ma va kumako, a va kubiha, ni vo saseka ni yindlu ya mubuzo yi lo tala hi lava va tshamileko kugeni.

¹¹ Kanilezi na yi enghenile hosi a ku wona lava va tshamileko kugeni, yi lo wona a munhu loyi a nga ambalangiko a nguwo ya muchado. 2 Kor. 5:3; Efe. 4:24; Kuv. 3:4

¹² Yi te ngalo kakwe: Xaka, u enghenisile kuyini laha na u nga hi na nguwo ya muchado ke? Yena a su kaye.

¹³ Zonake a hosi yi te ngalo ka malanza: Mu boheni mawoko ni milenge, mu mu hoxa munyameni wa lahandle, laha ku ta ngava ni mikosi ni kugetsela ka meno.

¹⁴ Hakuva mbanyingi va rambilweko, kanilezi va tsongwani va hlawulilweko.

Ku humesa nzhuvo ka Kesari.

¹⁵ Zonake a vaFarisi va lo famba va ya tsema khungo lezaku va ta mu dembelisa kuyini kuwulawuleni kakwe. Mar. 12:13; Lu. 20:20

¹⁶ Va lo ruma ka yena a vapizani vabye zinwe ni va ka Herodi, va yaku: Mugonzisi, ha zi tiva lezaku wena u wa zinene, u gonzisa a ndlela ya Nungungulu hi zinene; a ku khatali hi munhu, hakuva a ku cuwuki a xiyimo xa vanhu.

¹⁷ Hikwalaho, hi nga hi byela, U alakanya lezaku hi fanele ku yisa nzhuvo ka Kesari, kutani hi nga yisi ke?

¹⁸ Kanilezi Jesu i lo tiva a kubiha kabye, aku: Mu nzi ringela yini, nwina vaxengeteli?

¹⁹ Ma nga nzi kangetani a mali ya nzhuvo. Va lo tisa kakwe a denario.

²⁰ I lo va wutisa, aku: Ngwa mani a mufananiso lowu ni mutsalo lowu ke?

²¹ Vaku ka yena: Za Kesari. Zonake i te ngalo kabye: Tlhelisani ka Kesari lezi zi nga za Kesari, ni ka Nungungulu lezi zi nga za Nungungulu. Xip. 17:25; Rom. 13:7

²² Laha na va zi zwile va lo hlamala, va mu siya, va ti fambela.

A mhaka ya kuvuka hi ka vafileko.

²³ Gwalego siku ku lota kakwe a vaSadusi, lava va nge ngalo a ku kona kuvuka hi ka vafileko. Va lo mu wutisa, Mar. 12:18; Lu. 20:27; Miti. 23:8

²⁴ vaku: Mugonzisi, Mosi i te ngalo: Loku munhu afa na a nga hi na vana, a nakulobye i ta hlambela sati wakwe kasi ku vuxela nakulobye a mbeleko. Deut. 25:5

²⁵ Makunu ku wa hi kona ka hina a ntlhanu wa vanakulobye ni vambiri; loyi wa nhonzwa i lo teka sati, a sufa. Lezo a nga kala a nga hi na nʼwana, i lo siya sati wakwe ka nakulobye;

²⁶ i lo maha lezo a wa wumbiri kambe, ni wa wunharu, ku kala ka vantlhanu ni vambiri.

²⁷ Anzhako ka vona vontlhe ku lofa ni wasati wa kona.

²⁸ Lezi a nga mahile sati wabye vontlhe, laha kuvukeni ka vafileko i ta maha sati wa mani ka lava va ntlhanu ni vambiri?

²⁹ Jesu i lo hlamula, aku ngalo kabye: Nwina mu lahlekile, lezi mu nga tiviko mitsalo, hambu ni ntamu wa Nungungulu. Joh. 20:9

³⁰ Hakuva a kuvukeni ka vafileko a va nga ta teka hambu hi ku tekiwa, kanilezi va ta kota tingelosi ta le tilweni. 1 Joh. 3:2

³¹ Kanilezi hi ku kumbuka a kuvuka hi ka vafileko, a mu gonzangi lezi zi nga wulawuliwa ka nwina hi Nungungulu ke, aku:

³² Mina nzi Nungungulu wa Abrahama, ni Nungungulu wa Isaka, ni Nungungulu wa Jakobe? Nungungulu a hi Nungungulu wa vafileko, kanilezi ngwa vahanyako. Ekso. 3:6, 18; Lu. 20:38

³³ Laha zidlemo na zi zwile, zi lo hlamaliswa hi kugonzisa kakwe.

A tshinya ga milayo.

³⁴ Laha a vaFarisi va ngazwa lezaku i miyetile a vaSadusi, va lo tsombana khatiginwe. Mar. 12:28

³⁵ A munwe wa vona, loyi a nga hi mugonzisi wa nayo, i lo wutisa Jesu hi ku mu ringa, aku: Lu. 10:25

³⁶ Mugonzisi, a nayo wa hombe milayweni yontlhe hi wihi?

³⁷ I te ngalo kakwe: U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontihe, ni kupima ka wena kontlhe. Deut. 6:5; Lu. 10:27

³⁸ Lowu hi nayo wa hombe ni wa kuranga.

³⁹ Ni wa wumbiri wu fananako na wona, hi lowu: U ta ranza wakelene na wena kota lezi u ti ranzako wena. Levi 19:18; Gal. 5:14; Jak. 2:8

⁴⁰ A milayo leyi mimbiri hi tshinya ga milayo yontlhe ni vaprofeti.

Kristu i Nʼwana wa mani?

⁴¹ Makunu na va ha tsombene a vaFarisi, Jesu i lo va wutisa, Mar. 12:35; Lu. 20:41

⁴² aku: Mu alakanya yini nwina hi Kristu? I nʼwana mani ke? Vaku ngalo kakwe: I nʼwana Davida.

⁴³ Aku ngalo kabye: Loku zi hi tano, hikuyini Davida a wulako hi Moya a mu vitana Hosi, aku:

⁴⁴ A Hosi yi te ngalo ka Hosi ya mina: Tshama hi le reveni ga mina ga xinene; Kala nzi veka a valala va wena lahasi ka mikonzo ya wena? Tis. 110:1; Miti. 2:34; 1 Kor. 15:25

⁴⁵ Loku Davida a mu vitana aku Hosi, i nʼwana wakwe hikuyini ke?

⁴⁶ Ku wa nga hi na munhu a zi kotako ku mu hlamula nchumu, ku wa nga hi kona ni munwe a nga tiya ku mu wutisa nchumu kusukela siku lego. Lu. 14:6; Mar. 12:34