Mateu 20 - Tshwa Bible

A zitiri za lomu sinwini.

¹ Hakuva mufumo wa tilo wu fanana ni nwinyi wa xipetso, loyi a nga vinzuka ni mpunzu a ku ya thola zitiri a ku ta tira sinwini gakwe ga xivina.

² Laha na vumelene ni zitiri hi cheleni hi siku, i lo zi rumela xivineni xakwe.

³ I lo huma hi xikhati xa 9 horas wa mixo, a wona vanwani na va yimile phangweni ga muti, va nga tiri nchumu;

⁴ aku ngalo kabye: Fambani nwinawu xivineni xa mina, nzi ta mu nyika lezi zi ringeneko. Va lo famba.

⁵ I lo engeta a huma hi xikhati xa 12 horas ni xa 3 horas wa gambo a maha zalezo.

⁶ Hi xikhati xa 5 horas wa gambo i lo huma a ya kuma vanwani na va yimile kona; aku ngalo kabye: Hi yini mu yimako laha gontlhe siku na mu nga tiri nchumu ke?

⁷ Va te ngalo kakwe: Hakuva a nga kona munhu wo hi nyika ntiro. Aku kabye: Fambani na nwinawu xivineni xa mina.

⁸ Laha gi nga hlwile, a nwinyi wa xivina aku ka nekwa yakwe: Vitana zitiri, u va nyika hakhelo yabye; sangula hi ka vo gumesa kala ka va kuranga.

⁹ Laha va ngata lava va nga tholiwa hi xikhati xa 5 horas wa gambo, munwe ni munwani i lo amukela cheleni.

¹⁰ Ni laha va ngata lava va kuranga, va wa alakanya lezaku va ta amukela hi ku hunzisileko; kanilezi vonawu a munwe ni munwani i lo amukela a cheleni.

¹¹ Laha na va gi amukele, va lo kalala ka nwinyi wa yindlu,

¹² vaku: Lava vo gumesa va tirile hora yinwe ntsena, kanilezi u va ecanyisile na hina lava hi nga tira mitiro yo binza siku gontlhe laha munwini.

¹³ Kanilezi i lo hlamula aku ka munwe wabye: Xaka, a nzi ku geleli; a ku vumelanangi na mina hi cheleni ke?

¹⁴ Teka a mali ya wena, u ti fambela; kuranza ka mina a ku nyika lava vo gumesa kota wena.

¹⁵ A zi faneli a kuva nzi maha lezi nzi zi ranzako hi za mina nwinyi ke? kutani a tihlo ga wena gi bihile hilezi nzi nga nene ke? Rom. 9:21

¹⁶ Lezo a vo gumesa va ta maha va kuranga, ni va kuranga va ta maha vo gumesa. Xip. 19:30; 22:14

Jesu a tivisa hi kufa kakwe.

¹⁷ Kota lezi Jesu a nga kanziha Jerusalema, i lo teka a vapizani vakwe va khume ni vambiri a tsawuka navo, na va kari va famba i lo va byela, aku: Mar. 10:22; Lu. 18:31; Joh. 12:12

¹⁸ Langutani, hi kanziha Jerusalema, laha a Nʼwana wa munhu a ta nga nyikelwa ka vapristi va hombe ni vatsali; va ta mu konela kufa.

¹⁹ Va ta mu nyikela mandleni ya vamatiko, kasi va mu tseketsela ni ku mu xupula, ni ku mu belela; kanilezi hi siku ga manharu i ta vuka kambe. Xip. 27:2; Lu. 23:1; Miti. 3:13

A xikombelo xa nyine wa Jakobe na Johani.

²⁰ Zonake ku lota ka yena a nyine wa vana va Zabedi zinwe ni vana vakwe, a ta mu khizamela a mu byela xikombelo xakwe. Xip. 4:21; Mar. 10:35

²¹ Jesu aku kakwe: U lava yini ke? I lo hlamula, aku: Wula lezaku lava vana va mina va vambiri a va tshame mufunweni wa wena, a munwe reveni ga wena ga xinene ni munwani a reveni ga wena ga xibhabha.

²² Kanilezi Jesu i lo hlamula, aku: A mu xi tivi lexi mu xi kombelako. Nwina ma zi kota a kunwa a gombe legi nzi ta nganwa ha gona ke? Vaku ka yena: Ha zi kota. Mar. 14:36; Lu. 22:42; Joh. 18:11

²³ Aku ngalo kabye: Hakunene a gombe ga mina mu ta ginwa; kanilezi a nzi na ntamu ku mu tshamisa reveni ga mina ga xinene ni ga xibhabha; zi lumba lava ku longiselelweko vona hi Dadani. Xip. 25:34; Miti. 12:2

²⁴ Laha a vakhume na va zi zwile, va lo zangarela a vamakabye lava vambiri. Mar. 10:41; Lu. 22:24, 25

²⁵ Kanilezi Jesu i lo va vitana, aku kabye: Nwina ma zi tiva lezaku a tihosi ta vamatiko ta va fumela, ni vahombe vabye va maha hi ntamu hehla ka vona.

²⁶ Zi nga tava nghaho xikari ka nwina; kanilezi loyi a ranzako ku maha wahombe xikari ka nwina ngha a maha nanza ga nwina. Xip. 23:11; Mar. 9:35; 1 Ped. 5:3

²⁷ Ni loyi a ranzako ku maha wo ranga xikari ka nwina a ave khumbi ya nwina;

²⁸ kota lezi a Nʼwana wa munhu a nga telangiko ku ta tirelwa, kanilezi a ku ta tirela, ni ku nyikela kuhanya kakwe a kuva nzhiho wa ku tirula vanyingi. Isa. 53:10; Lu. 22:27; Joh. 13:4

Zikhumu zimbiri zi hanyiswa.

²⁹ Na va kari va huma Jeriko, a xidlemo xa hombe xi lo mu lanzela.

³⁰ Languta, a zikhumu zimbiri zi nga tshamile ndleleni, laha na zi zwile lezaku Jesu wa hunza, zi loba huwa, ziku: Hosi, nʼwana Davida, hi mahele wuxinji.

³¹ A xidlemo xi lo zi kawuka, lezaku ngha zi miyela; kanilezi zi lo engeta ziba huwa, ziku: Hosi, nʼwana Davida, hi mahele wuxinji.

³² Jesu i lo yima, a zi vitana, aku: Mu ranza a ku ngha nzi mu mahela yini ke?

³³ Ziku ka yena: Hosi, a mahlo ya hina a ma hanyiswa.

³⁴ Jesu na a zi zwele wusiwana, i lo khumba mahlo ya zona; zi lo tlhela zi wona zalezo, zi mu lanzela.