Mateu 2 - Tshwa Bible

A titlhari ta le Mutsuwuka-gambo.

¹ Laha Jesu na belekilwe Betlehema wa le Judia, a masikwini ya hosi Herodi, a vanhu vo tlhariha va le Mutsuwuka-gambo va lota le Jerusalema, vaku: Lu. 2:4, 6, 7

² Yi kwihi a hosi ya vaJuda leyi yi belekilweko? Hakuva hi wonile a nyeleti ya yona le Mutsuwuka-gambo, hi tile ku ta yi khozela. Mitse. 24:17; Lu. 2:11

³ Laha hosi Herodi na zi zwile, i lo karateka zinwe ni Jerusalema gontlhe.

⁴ I lo tsombanyisa vontlhe vapristi va hombe ni vatsali va tiko, a va wutisa aku hi kwihi a ta nga belekelwa kona Kristu.

⁵ Va lo mu byela, vaku; Hi le Betlehema wa le Judia; hakuva zinghaho ku tsalilwe hi muprofeti:

⁶ Na wena Betlehema, tiko ga Juda, A ku tsongwanyani xikari ka ti hosana ta ka Juda; Hakuva hi ka wena ku ta huma mufumeli, Loyi a ta nga maha murisi wa vanhu va mina va Israeli. Mika 5:2; Joh. 7:42; Kuv. 2:27

⁷ Zonake Herodi i lo vitana a vanhu vo tlhariha le xihundleni, a va wutisisa hi xikhati a nyeleti yi nga woneka ha xona.

⁸ I lo va rumela Betlehema, aku ngalo: Fambani mu ya lavisisa khwatsi a nwanana loyi; loku mu mu kumile, mu ta nzi tivisa, kasi na minawu nzi ya mu khozela.

⁹ Zonake loku va zwile hosi, va lo famba, ni nyeleti leyi va nga yi wona le Mutsuwuka-gambo, yi lo ranga mahlweni kabye, yi lo ta yima laha a nwanana a nga hi koha.

¹⁰ Laha va nga yi wona nyeleti, va lo tsaka hi kutsaka ka hombe nguvu.

¹¹ Va lo enghena lomu ndlwini, va wona a xihlangana ni nyine wa xona Maria; va lo xi khizamela, va vulula zikhwama zabye va mu nyika zinyikiwo: a nzalama ni hlakati ni mira. Tis. 72:10

¹² Na va layilwe hi Nungungulu hi kulora lezaku va nga hunzi hi ka Herodi, va lu tlhelela tikweni gabye hi yinwani byela; Xip. 1:20

¹³ Makunu loku va sukile, a ngelosi ya Hosi yi lo woneka ka Josefa hi noro, yiku: Suka, u teka xihlangana ni nyine wa xona, u chavela Gipite, u ya tshama kona nzi kala nzi ku byela; hakuva Herodi i ta lava a xihlangana ku xi daya.

¹⁴ I lo suka a teka xihlangana ni nyine wa xona ni wusiku, aya le Gipite.

¹⁵ I lo tshama leyo ku kala kufeni ka Herodi; kasi ku fela ku tatiseka lezi zi nga wulawulilwe hi muprofeti, aku ngalo: Nzi vitanile a nʼwana wa mina hi le Gipite. Hos. 11:1

Ku dayiwa zihlangana za vavanuna.

¹⁶ Zonake Herodi laha na a wonile lezaku i kanganyisilwe hi titlhari, i lo zangara nguvu; i lo rumela ku ya daya a zihlangana zontlhe za vavanuna za lomu Betlehema ni tiko ga kona, a ku sukela ka va malembe mambiri nf kuya hasi, hi ku pima xikhati lexi a nga wutisisa ha xona a titlhari.

¹⁷ Kwalaho ku lo tatiseka lezi zi nga wulawulilwe hi muprofeti Jeremia, aku:

¹⁸ A huwa yi lo zwala le Rama, A kurila ni hlomulo wa hombe; Hi Rakeli a rilelako a vanana vakwe; I wa nga vumeli ni ku chavelelwa, hilezi a nga sele kubaseni. Jer. 31:15

¹⁹ Kanilezi laha Herodi na a file, e ngelosi ya Hosi yi lo woneka ka Josefa hi, noro le Gipite,

²⁰ yiku: Suka, u teka xihlangana ni nyine wa xona, uya tikweni ga ka Israeli; hakuva va file lava va nga lava ku daya xihlangana.

²¹ I lo suka, a teka xihlangana ni nyine wa xona, aya tikweni ga ka Israeli.

²² Kanilezi laha na a zwile lezaku Arkelau i fumile le Judia xikhundleni xa raru wakwe Herodi, i wa chava a kuya leyo; na a lulekilwe hi Nungungulu norweni, i lo famba tikweni ga Galilea. Xip. 3:13; Lu. 2:39

²³ I lo ta aka mutini wu vitwako Nazareta; kasi ku fela ku tatiseka lezi zi nga kanelwe hi vaprofeti, vaku ngalo: Yena i ta vitanwa a muNazareta. Vala. 13:5; Joh. 1:45