Mateu 18 - Tshwa Bible

A wahombe mufunweni wa tilo.

¹ Hi lexo xikhati a vapizani va lota ka Jesu, va taku: Xana himani a nga wahombe mufunweni wa tilo ke? Mar. 9:33; Lu. 9:46

² I lo vitana a nwanana tsongwani, a mu yimisa xikari kabye,

³ aku ngalo: Hizinene nziku ka nwina: Loku mu nga hunzuluki, mu maha kota vanana va tsongwani, cima mu nga ta enghena mufunweni wa tile. Lu. 18:16; 1 Kor. 14:20

⁴ Hikwalaho ni wihi loyi a ta nga ti koramisa a maha kota nwanana loyi tsongwanyani, hi yena a nga wahombe mufunweni wa tilo. Xip. 20:27

⁵ Ni loyi a amukelako a nwanana munwe wa kunghahi wa tsongwani hi vito ga mina i amukela mina. Xip. 10:42; Lu. 9:48

⁶ Kanilezi loyi a khunguvanyisako munwe wa lava va tsongwanyani va kholwako ka mina, ngha ziva chukwana ka yena lezaku a ribye ga hombe ga xigayo gi khonekwa nhanwini yakwe, a rikhiswa kueteni ka bimbi.

⁷ Khombo a give ka tiko hi kota ya zikhunguvanyiso! Kunene a zikhunguvanyiso zi fanele kuva kona, kanilezi i khombo ka munhu loyi zi tako ha yena. Lu. 17:1; 1 Kor. 11:19

⁸ Loku a canja ga wena kutani konzo wa wena zi ku khunguvanyisa, zi tseme, u zi hoxa kule; hakuva zi ku sasekele ku enghena kuhanyeni u hi xilema, kutani u khwita, ku hunza a ku hoxiwa nzilweni wa pinzukelwa na u ngha u hi ni mandla mambiri ni mikonzo mimbiri.

⁹ Loku a tihlo ga wena gi ku khunguvanyisa, gi xokole, u gi hoxa kule; hakuva zi ku sasekele ku enghena kuhanyeni ni tihlo ginwe, ku hunza a ku hoxiwa Gehena ga nzilo na u hi ni mahlo mambiri.

¹⁰ Ti woneleni lezaku mu nga kanyisi ni munwe wa lava va tsongwani; hakuva nza mu byela, lezaku a tingelosi tabye le tilweni ta wona xikhati xontlhe a nghohe ya Dadani wa mina loyi a nga le tilweni. Maheb. 1:14; Lu. 1:19

¹¹ Hakuva a Nʼwana wa munhu i tele lezi zi lahlekileko.

A yivu yi lahlekileko.

¹² Xana mu yini nwina ke? Loku munhu a hi ni zana ga tiyivu, zonake ku penga yinwe ya tona, xana a nga siyi leti ta 99 le zitsungeni, a famba a ya lava leyi yi pengileko ke? Lu. 15:4

¹³ Loku a yi kuma hizinene nziku ka nwina, wa tsaka ha yona nguvu ku hunza lezi a tsakisako zona hi leti ta 99 leti ti nga lahlekangiko.

¹⁴ Hizalezo a hi kuranza ka Raru wa nwina loyi a nga le tilweni, lezaku ku lahleka ni munwe wa lava va tsongwanyani.

Ku tsetselela makabye.

¹⁵ Loku a makabye wa wena a ku onhele, famba u ya mu kombisa nanzu wakwe na mu hi nwece. Loku a ku ingisa, u mu kumile a makabye wa wena. Levi 19:17; Lu. 17:3

¹⁶ Kanilezi loku a nga ku ingisi, famba ni munwani kutani va hi vambiri, kasi magezu wontihe ma fela ku tiyiswa hi vakustumunyu vambiri kutani vanharu. Deut. 17:6; Joh. 8:17; Maheb. 10:28

¹⁷ Loku a ala ku va ingisa, ku bike bandleni; ni loku a nga ingisi handla, a mahe ka wena kotisa wamatiko ni muhlengisi. Rom. 18:17; 1 Kor. 5:9

¹⁸ Hizinene nziku ka nwina: Zontlhe lezi mu ta nga zi boha laha misaveni, zi ta bohiwa ni le tilweni; ni zontlhe lezi mu ta nga zi tlhatlha laha misaveni, zi ta tlhatlhiwa ni le tilweni. Joh. 20:23; 1 Kor. 5:4, 5

¹⁹ Kambe nziku ka nwina: Loku vambiri va nwina va vumelana laha misaveni hi ku kombela xilo xo kari, va ta nyikiwa xona hi Dadani wa mina wa le tilweni. Xip. 5:24; 1 Joh. 3:22

²⁰ Hakuva laha ku tlhangeneko vambiri kutani vanharu vitweni ga mina, kwalaho nzi kona xikari kabye.

A nanza go kala wuxinji.

²¹ Zonake Pedro i lo tshinela, aku kakwe: Hosi, a makabye wa mina i ta nzi onhela makhati mangani, nzi mu tsetselela ke? Ku kala ntlhanu ni kumbiri ke?

²² Jesu aku kakwe: A nzi ku byeli nziku: Ku kala ntlhanu ni kumbiri; kanilezi ku kala ku maha 70 wa makhati ma wuyetilweko hi ntlhanu ni kumbiri. Xip. 6:14; Mar. 11:25; Kol. 3:13

²³ Hikwalaho a mufumo wa tilo wu fanana ni hosi leyi yi nga lava ku hlola a malanza ya yona.

²⁴ Laha na yi sangule ku hlola, ku lo tiswa kakwe munwe loye a nga hi ni nanzu wa 10,000 wa titalenta.

²⁵ Kota lezi a nga hi hava xa ku riha ha xona, a hosi yakwe yi lo laya lezaku a xabyiswa zinwe ni sati wakwe ni vanana, ni zontlhe lezi a nga hi nazo, kasi ku riha nanzu wa kona. 2 Tih. 4:1; Neh. 5:8

²⁶ A nanza gi lo khizama, gi mu khongotela, giku: Hosi, ngha wa nga timisela ha mina, nzi ta ku riha wontihe.

²⁷ A hosi ya lego nanza, yi lo gi zwela wusiwana, yi gi tlhatlhisa, yi gi rivalela a nanzu wakwe.

²⁸ Kanilezi a nanza lego gi lo huma, gi ya kuma ginwe ga malanza-kulobye, legi gi nga hi ni nanzu ka gona wa zana ga macheleni; i lo mu khoma, a mu vinyinga a nkolo, aku; Nzi rihe mali ya mina.

²⁹ Lezo a nanza-kulobye gi lo khizama gi mu khongotela, giku: Ngha wa nga timisela ha mina, nzi ta ku riha.

³⁰ Kanilezi a nga vumelangi; i lo famba a ya gi valela paxweni, gi kala gi riha nanzu.

³¹ Zonake laha a malanza-kulobye ma nga wona lezi zi mahekileko, ma lo xaniseka nguvu, ma ya byela a hosi ya wona zontlhe lezi zi mahekileko.

³² Zonake a hosi yakwe yi lo mu vitana, yiku ngalo kakwe: Nanza go biha, nzi ku rivalele wontihe nanzu wa wena, hilezi u nga nzi khongotela;

³³ xana u wa nga fanelangi a kuva ni wuxinji ka nanza-kuloni, kota lezi mina nzi nga ku mahela wuxinji ke?

³⁴ Ni hosi yakwe yi lo zangara, yi mu nyikela ka vanyakasani, a kala a riha nanzu wontihe.

³⁵ A Dadani wa mina wa le tilweni t ta mu maha zalezo, loku mu nga tsetseleli hi timbilu munwe ni munwani a makabye wakwe. Mav. 21:13; Mar. 11:26; Jak. 2:13