Mateu 15 - Tshwa Bible

A xilo lexi xi nyenyezisako.

¹ Zonake kuta ka Jesu a vaFarisi ni vatsali vata hi le Jerusalema, va taku ngalo:

² Hi yini a vapizani va wena va hambunyetako a mahanyela ya vakale ke? Hakuva a va hlambi mandla yabye laha Va lavako kuga. Mar. 7:5; Kol. 2:8

³ I lo va hlamula, aku: Hi yini nwinawu mu hambunyetako a kulaya ka Nungungulu hi kota ya mahanyela ya nwina ke?

⁴ Hakuva Nungungulu i layile ku ngalo: Chava raru wa wena ni nyine wa wena; niku: Loyi a rukatelako dadani kutani mamani, ngha afa hi kufa. Ekso. 4:12; 21:17; Efe. 6:2

⁵ Kanilezi nwina muku: Kani hi wihi a ta nga wula ka raru wakwe kutani nyine wakwe: Lezi u nga ta ngha u vunetelwe ha zona zi nyikelwe ka Nungungulu; a nga ta ha chava raru wakwe. Mar. 7:11, 12

⁶ Nwina mu mahile a mhaka ya Nungungulu yi nga hi na ntamu hi kota ya mahanyela ya nwina.

⁷ Vaxengeteli, i profetile khwatsi ha nwina Isaya, aku:

⁸ Lava vanhu va nzi dzunza hi milomu yabye, Kanilezi a timbilu tabye ti le kule na mina. Isa. 29:1-3; Ezek. 33:31

⁹ Kanilezi va nzi khozela mahala, Hakuva a zigonzo lezi va zi gonzisako zileletelo za vanhu ntsena. Isa. 29:13; Kol. 2:18-22

¹⁰ Zonake i lo vitana xidlemo, aku ka xona: Zwanani, mu pima!

¹¹ Lezi zi enghenako nonwini a hi zona zi bihisako munhu: kanilezi lezi zi humako nonwini, hi zona zi bihisako munhu. Miti. 10:15; Rom. 14:14, 17, 20

¹² Zonake ku lota vapizani, va taku ka yena: Xana wa zi tiva lezaku a vaFarisi va lo tsanwa laha va ngazwa a gezu legi ga wena ke?

¹³ Yena i lo hlamula, aku: A zibyalwa zontlhe lezi zi nga kala ku byaliwa hi Dadani wa mina wa le tilweni, zi ta tsuwuliwa. Joh. 15:2; 1 Kor. 3:12

¹⁴ Va tsikeni; zikhumu, zi rangelako zikhumu-kulobye. Loku xikhumu xi koka xikhumu, zi ta wela rinzini hi wumbiri ga zona.

¹⁵ Pedro aku ngalo kakwe: Hi tlhamusele a mufananiso lowu. Mar. 7:17

¹⁶ Jesu i te ngalo: Kasi na nwinawu ma ha vumala kupima ke?

¹⁷ A mu zi pimi lezaku zontlhe zi enghenako nonwini zi hunza ziya rumbyini, zi huma lahandle ke? 1 Kor. 6:13

¹⁸ Kanilezi lezi zi humako nonwini zita hi le mbilwini: hi zona zi bihisako munhu. Jak. 3:6

¹⁹ Hakuva hi le mbilwini ku huma a maalakanyo yo biha, ni kudaya, ni wubhayi, ni kuremba, ni kuyiva, ni wukustumunyu ga mawunwa, ni tihlamba. Gen. 6:5; 8:21; Mar. 7:21

²⁰ Hi zona lezi zi bihisako munhu; kanilezi a kuga hi mandla ma nga hlaziwangiko a zi bihisi munhu.

A wasati wa muKanani.

²¹ Jesu i lo suka laho, aya matlhelweni ya Tire ni Sidoni.

²² Zonake ku lota kakwe a wasati wa muKanani, a humako hi ka matlhelo lawo; i lo huwelela, aku: Nzi zwele wuxinji, Hosi, nʼwana, Davida; a nhanyana wa mina wa bayiseka nguvu hi madimoni.

²³ Kanilezi Jesu a nga mu angulangi nchumu. A vapizani vakwe va lota va ta mu khongotela, vaku: Mu fambise; hakuva wa hi kulumela.

²⁴ I lo hlamula, aku: A nzi rumiwangi ka vanwani, sine ka tiyivu ti lahlekileko ta yindlu ya ka Israeli. Xip. 10:5, 6; Rom. 15:8

²⁵ Kanilezi a wasati i lo tshinela, a ta mu khizamela, aku: Hosi, nzi vune.

²⁶ I lo hlamula, aku: A hi khwatsi lezaku ku tekwa a zibaba za vanana, zi hoxwa ka timbyana. Xip. 7:6; Fil. 3:2

²⁷ A wasati aku ngalo: Ina, Hosi; kanilezi na tona timbyana taga a matlhatlha ntsena ma wako hi laha mezeni ya venyi va tona.

²⁸ Zonake Jesu i lo mu angula aku ngalo: Wasati, a kukholwa ka wena ka hombe; a ku maheke ka wena kota kuranza ka wena. Ni nhanyana wakwe i lo hanyiswa hi xwalexo xikhati.

A vanyingi va hanyiswa.

²⁹ Jesu i lo suka laho, aya kusuhani ni bimhi ga Galilea; i lo kanziha xitsungeni a tshama kona. Mar. 7:31; Xip. 7:14

³⁰ Ku lota kakwe a zidlemo za hombe, na zi neha a zilema, ni zikhumu, ni timbeveve, ni zikhurubu, ni vanwani vo tala; va lo va veka laha mikonzweni yakwe, a va hanyisa; Isa. 35:5, 6; Lu. 7:22

³¹ ku kala a zidlemo zontlhe zi rewuka, loku zi wona timbeveve ti wulawula, ni zikhurubu zi hanyiswa, ni zilema zi famba, ni zikhumu zi wona; zi lo dumisa Nungungulu wa Israeli.

Jesu a phamela 4,000 wa vanhu.

³² Jesu i lo vitana vapizani vakwe, aku ngalo: Nza xi zwela wusiwana a xidlemo lexi, hakuva hi masiku manharu na xi simamisile na mina, na xi nga hi na zakuga; a nzi ranzi ku va tlhelisa na va hi ni ndlala, va nga dzuka va sika ndleleni. Mar. 8:1

³³ A vapizani vaku ngalo kakwe: Hi ta zi kuma kwihi a zibaba laha xiwuleni zi ringanako ku xurisa a xidlemo xa hombe xa kunghahi ke? 2 Tih. 4:43

³⁴ Jesu aku kabye: Zibaba zingani mu nga nazo ke? Vaku ngalo: I ntlhanu ni zimbiri, ni zidluwanyana zi tsongwani.

³⁵ I lo laya a xidlemo a ku tshama hasi misaveni.

³⁶ Zonake i lo teka a ntlhanu wa zibaba ni zimbiri ni zidluwani za kona, a bonga, a zi khema, a nyika vapizani, ni vapizani va avela zidlemo. Xip. 14:19; Lu. 22:19

³⁷ Va loga vontlhe va xura; va lo rolela a matlhatlha ma seleko, ku tala ntlhanu wa zirunzu ni zimbiri.

³⁸ Lava va ngaga va wa hi 4,000 wa Vavanuna, ku nga hlayiwi a vavasati ni vanana.

³⁹ Zonake loku Jesu a fambisile zidlemo, i lo enghena ngalaveni, aya matlhelweni ya le Magadani.