Mateu 12 - Tshwa Bible

Jesu a gonzisa hi Sabado.

¹ Hi lexo xikhati Jesu i lo tsemakanya masinwini hi siku ga sabado; a vapizani vakwe va wa hi ni ndlala, va sangula ku tshova mavele, vaga. Deut. 23:25; Mar. 2:23

² Kanilezi laha a vaFarisi na va zi wonile, vaku ka yena: Languta, a vapizani va wena va maha lezi zi nga faneliko a ku mahiwa hi sabado.

³ Kanilezi yena aku kabye: A mu gonzangi lezi zi nga mahiwa hi Davida, laha na a zwile ndlala, yena ni lava a nga hi navo ke? 1 Sam. 21:6

⁴ Lezaku i 16 enghena ndlwini ya Nungungulu, aga a zibaba zi vekilweko mahlweni ka Nungungulu, zi nga faneliko ku giwa hi yena ni lava a nga hi navo, kanilezi hi vapristi voce. Ekso. 25:30; Levi 24:5, 9

⁵ Kutani a mu gonzangi nayweni ke, aku hi siku ga sabado a vapristi va onha a sabado le tempeleni, na va nga hi na nanzu? Mitse. 28:9, 10

⁶ Mina nziku ka nwina: Kwalaha i kona loyi a nga wa hombe ku hunza tempeli. 2 Kro. 6:18

⁷ Kanilezi loku mu wa zi tivile aku zi wula yini lezaku: Nzi ranza wuxinji, a nzi ranzi miphahlelo, ngha na mu ngakonangi lava va nga hava nanzu. Hos. 6:6; Mika 6:6-8

⁸ Hakuva a Nʼwana wa munhu i Hosi ya sabado.

Jesu a hanyisa loyi a lameleko canja.

⁹ I lo suka laho, a ya enghena sinagogeni gabye. Mar. 3:1; Lu. 6:6

¹⁰ Ku wa hi kona lomo a munhu loyi a nga hi ni canja gi lameleko. Va lo wutisa Jesu vaku: Ku fanele ku hanyisa hi siku ga sabado ke? kasi va fela ku mu kumisa nanzu. Lu. 13:14; Joh. 9:16

¹¹ Aku ka vona: Hi wihi xikari ka nwina, loyi a nga ni yivu yinwe, loku yi wela rinzini hi siku ga sabado, a ta nga kala a nga yi khomi a yi humesa ke?

¹² I tsengo waku yini a nga nawo munhu ku hunza yivu! Hikwalaho ku fanele a ku maha zo saseka hi siku ga sabado.

¹³ Zonake aku ka munhu: Nawuluta canja ga wena. I lo gi nawuluta, gi tlhela gi hanya kukotisa ginwani.

¹⁴ Kanilezi a vaFarisi va lo huma, va xuxa xikungo ha yena, lezaku va ta mu dayisa kuyini. Mar. 3:6; Lu. 6:11; Joh. 5:18

Xiprofeto xa Isaya.

¹⁵ Jesu na a zi tivile i lo suka laho; a vanyingi va lo mu lanzela, a va hanyisa vontlhe.

¹⁶ I lo va laya lezaku va nga mu zwatisi,

¹⁷ kasi ku fela ku tatiseka lezi zi nga kanetwa hi muprofeti Isaya, aku:

¹⁸ Hi gona a nanza ga mina legi nzi gi hlawulileko; Xiranzwa xa mina lexi muhefemulo wa mina wu xaleleko khwatsi ha xona. Nzi ta veka Moya wa mina hehla kakwe, i taba hungu hi kulamula a ka vamatiko.

¹⁹ A nga ta holova, ne ni ku kanyuluka; A gezu gakwe gi nga ta zwiwa maphangweni.

²⁰ A lihlanga li khinyekileko a nga ta li tshova, A nga ta tima a ngoti ya kandiya yi fufunhako, A kala a yisa nongameto kuhloleni;

²¹ A vamatiko va ta tsumba vito gakwe.

Kuhanyiswa ka xikhumu xi nga hi mbeveve.

²² Zonake ku lo tiswa: kakwe munwe loyi a nga hi ni dimoni, a nga xikhumu ni mbeveve, a mu hanyisa, lezo a mbeveve yi lo wulawula, yi tlhela yi wona. Mar. 3:11; Lu. 11:14

²³ A xidlemo xontlhe xi lo hlamala, xiku: Xana loyi a hi yena nʼwana Davida ke?

²⁴ Kanilezi laha a vaFarisi na va zi zwile, va te ngalo: Loyi munhu i hlongola madimoni ntsena hi ntamu wa Belzebuba, loyi a nga hosi ya madimoni.

²⁵ Jesu na a tiva maalakanyo yabye i te ngalo ka vona: Ni wihi mufumo wu ti panzako ha woce wu ta hangalaka; ni wihi muti kutani yindlu yi ti panzako ha yoce yi nga ta ku tsonzoma. Xip. 9:4; Joh. 2:25; Kuv. 2:23

²⁶ Loku Satani a hlongola Satani, i avanyisile ha yece, a ti lwisa; zonake a mufumo wakwe wu ta tiyisa kuyini?

²⁷ Loku mina nzi hlongola madimoni hi Belzebuba, va ma hlongolisa hi mani a vapizani va nwina? Hikwalaho va ta maha valamuli va nwina.

²⁸ Kanilezi loku nzi hlongola madimoni hi Moya wa Nungungulu, hakunene a mufumo wa Nungungulu wu tile ka nwina. Dan. 2:44; Lu. 1:33

²⁹ Munhu a nga enghenisa kuyini a ndlwini ya nhenha, a wutla xuma xa yona, loku a nga rangangi hi ku yi boha? Zonake i ta phanga yindlu ya yona. Isa. 49:24; Lu. 11:21-23

³⁰ Loye a nga hiko na mina i hambene na mina; ni loyi a nga hlengeletiko na mina wa hangalasa.

Ku rukatela Moya wu ku Basa.

³¹ Hikwalaho nziku ka nwina: A vanhu va ta tsetselelwa zontlhe zionho ni tinzhukano, kanilezi a kurukatela Moya wa ku Basa cima ku nga ta tsetselelwa. Mar. 3:28; Lu. 12:10; Miti. 7:51

³² Kani hi wihi a wulawulako kubiha hi Nʼwana wa munhu i ta tsetselelwa; kanilezi kani hi wihi a wulawulako a vukela Moya wa ku Basa, cima a nga ta tsetselelwa a ka xikhati lexi, hambu ka xikhati xi tako. Joh. 7:12, 52; 1 Tim. 1:13

³³ Wulani lezaku a sinya yi nene, ni mihanzu ya yona yi nene; kutani lezaku a sinya yi bihile, ni mihanzu ya yona yi bihile; hakuva a sinya yi tibyiwa hi mihanzu ya yona.

³⁴ Nwina pswalo wa tinyoka, mu ta zi kotisa kuyini ku wulawula a timhaka ti nene, lezi mu bihileko ke? Hakuva a nomu wa wulawula hi wunyingi ga mbilu. Xip. 3:7; Lu. 6:45

³⁵ A munhu nene wa humesa a zilo zi nene tshombeni yakwe ya yinene; ni munhu wa kubiha wa humesa zilo za kubiha tshombeni yakwe ya kubiha.

³⁶ Nza mu byela, nziku: A timhaka tontlhe ta hava leti va ti wulawulako vanhu, va ta ti hlamulela ha tona sikwini ga kulamula.

³⁷ Hakuva hi timhaka ta wena u ta hlayelwa kululama; na hi timhaka ta wena u ta koniwa.

Jesu a ala ku maha ziwoniso.

³⁸ Zonake a vo kari va vatsali ni vaFarisi va te ngalo kakwe: Mugonzisi, hi ranza ku wona a xiwoniso xi mahiwa hi wena. Mar. 8:11; Joh. 2:18; 1 Kor. 1:22

³⁹ Kanilezi i lo hlamula aku ka vona: A xizukulwana lexi xa kubiha xi nga kholekangiko xi lava a xiwoniso; kanilezi xi nga ta nyikiwa xiwoniso, ntsena a xiwoniso xa muprofeti Jona. Isa. 57:3; Mar. 8:38; Joh. 4:48

⁴⁰ Kotisa lezi Jona a nga tshama nzeni ka hlavi a masiku manharu ni wusiku ginharu, lezo Nʼwana wa munhu i ta tshama nzeni ka misava masiku manharu ni wusiku ginharu. Jona 1:17

⁴¹ A vavanuna va le Niniva va ta yima ni xizukulwana lexi hi siku ga kulamula, va ta xi kona; hakuva va lo hunzuluka hi kukanela ka Jona; kasi a wahombe ku hunza Jona i kona laha. Lu. 11:32; Rom. 2:27

⁴² A muzinza wa le Dzongeni i ta suka a yima kulamuleni zinwe ni xizukulwana lexi, i ta xi kona; hakuva i tile hi le magemeta-musi a ku tazwa a wutlhari ga Solomoni; kasi a wahombe ku hunza Solomoni i kona laha. 1 Tih. 10:1; Lu. 11:31

⁴³ Kanilezi a moya wa kubiha na wu humele munhwini, wu tsemakanya a wutshanwini go kala mati, na wu lava a kuhumula, a wu ku kumi. Joba 1:7; Lu. 11:24; 1 Ped. 5:8

⁴⁴ Zonake wuku: Nzi ta tlhelela ndlwini ya mina, leyi nzi nga huma ka yona; laha na wu chikele, wu yi kuma na yi hi phanga, yi swiyelwe, yi bombisilwe.

⁴⁵ Zonake wu famba, wu ya vitana a yinwani mimoya ya ntlhanu ni mimbiri yo biha ku hunza wutsumbu ga wona, yi enghena yi tshama kona. A kubiha ko gumesa ka munhu loyi ku hunza ko ranga. Zi tava nghaho ka xizukulwana lexi xi bihileko. Maheb. 6:4; 2 Ped. 2:20-22

A nyine wa Jesu ni vanakulobye.

⁴⁶ Ku te na a ha wulawula ka zidlemo, a nyine wakwe ni vanakulobye va lo yima lahandle, va lava ku wulawula naye. Mar. 3:31; Lu. 8:19-21

⁴⁷ A munwani i lo mu byela, aku: A nyine wa wena ni vanakuloni va yimile lahandle, va lava ku wulawula na wena.

⁴⁸ Jesu i lo hlamula, aku ka loyi a mu byelileko: Mamani ni vanakulori mbamani ke?

⁴⁹ I lo nawuluta canja a komba vapizani vakwe, aku: Mamani ni vanakulori hi valava!

⁵⁰ Hakuva kani hi wihi a ta nga maha kuranza ka Dadani wa mina loyi a nga le tilweni, hi yena nakulori, ni makweru, ni mamani. Joba 15:14; Gal. 5:6; Kol. 3:11