Mateu 11 - Tshwa Bible

Johani a rumela mitsumi ka Jesu.

¹ Laha Jesu na gumesile ku leletela vapizani vakwe va khume ni vambiri, i lo suka laho a ya gonzisa ni ku kanela mitini yabye.

² Laha Johani na zwile le paxweni hi mitiro ya Kristu, i lo mu rumela xiwutiso hi vapizani vakwe, Lu. 7:18, 19; Xip. 14:3

³ aku ngalo kakwe: Hi wena loyi a tako ke, kutani ha ha langutela munwani? Gen. 49:10; Joh. 6:14

⁴ Jesu i lo hlamula, aku kabye: Fambani mu ya hlawutela Johani lezi mu zi zwako ni lezi mu zi wonako:

⁵ a zikhumu za tlhela zi wona, a zikhurubu za famba, a tihlokonho ta basiswa, a ziwiri zazwa, a vafileko va vuxwa, ni zisiwana za kanelelwa a mahungu yo saseka. Isa. 35:6; 61:1; Lu. 4:18; Jak. 2:5

⁶ I katekile loyi a nga khunguvanyekiko hi kota ya mina. Isa. 8:14; 1 Kor. 1:23; 1 Ped. 2:8

⁷ Kota lezi va nga fambile, Jesu i lo sangula ku wulawula ka zidlemo ha Johani, aku: Mu lo huma muya xiwuleni a ku ya wona yini? A lihlanga li ninginizwako hi moya ke? Lu. 7:24; Efe. 4:14

⁸ Kanilezi mu waya a ku ya wona yini? A munhu a nga ambele a tinguwo to saseka ke? Langutani, lava ve ambalako a tinguwo to saseka va lomu tindlwini ta tihosi.

⁹ Kanilezi mu lo huma mu ya wona yini? A ku ya wona muprofeti ke? Ina, nziku ka nwina, ni ku hunza nguvu a muprofeti. Xip. 14:5; Lu. 1:76

¹⁰ Hi yena loyi ku tsalilweko ha yena ku ngalo: Languta nza ruma a ntsumi wa mina mahlweni ka wena, Wu ta nga ku longisela a ndlela mahlweni ka wena. Mal. 3:1; Mar. 1:2

¹¹ Hizinene nziku ka nwina: Xikari ka lava va belekilweko hi vavasati, a ku humangi wa hombe ku hunza Johani Mubapatizi; hambu lezo loyi a nga tsongwanyani mufunweni wa tilo ngwa hombe ku hunza yena.

¹² Ku sukela masikwini ya Johani Mubapatizi ku kala makunu a mufumo wa tilo wu engheniwa hi ntamu, wu wutliwa hi lava va nga ni ntamu. Lu. 16:16

¹³ Hakuva a vaprofeti vontlhe ni nayo va lo profeta kala kuta Johani.

¹⁴ Kutani mu ta vumela ku kholwa, ahati, kanilezi loyi hi yena Elija, loyi va ngaku i tata. Mal. 4:5; Lu. 1:17

¹⁵ Loyi a nga ni tindleve ta kuzwa, ngha a ingisa.

¹⁶ Kanilezi a xizukulwana lexi nzi ta xi fananisa ni yini? Xi fanana ni vanana va tshamileko wutshanwini go xavisa, va nge ngalo ka vanghana vabye: Lu. 7:31

¹⁷ Hi mu bele tinanga, kanilezi a mu kinangi; hi hlalukile, kanilezi a mu mahangi hlomulo.

¹⁸ Hakuva Johani i lota a ngagi a nganwi, vaku: I na ni dimoni.

¹⁹ A Nʼwana wa munhu i lota, waga, wonwa, ve ngalo: Langutani munhu wa kulonzola, xidakwa, munghana wa vahlengisi ni vaonhi! Kanilezi a wutlhari gi kombisile a kululama ka gona hi mitiro ya gona. Xip. 9:10; Lu. 7:35

²⁰ Zonake i lo sangula ku sola a miti leyi a nga maha ka yona a zirewukiso zakwe zo tala, hakuva a yi hunzulukangi. Lu. 10:13

²¹ Khombo a give ka wena Korazini! Khombo a give ka wena Betsaida! Hakuva a zirewukiso lezi zi mahilweko ka wena, loku zi wa mahilwe le Tire ni Sidoni, ngha va hunzulukile a kale na va ambele tisakwa va tola khuma. Jona 3:7, 8

²² Mina nziku ka nwina ku ta hehuka ka Tire ni Sidoni hi siku ga kulamula, a ku hunza ka nwina.

²³ Wena Kapernaume, u ta tlakuselwa tilweni ke? Ahihi, u ta releliswa lahasi le Hayidesi; hakuva loku zi wa mahilwe le Sodoma lezi zi mahilweko ka wena, ngha na wa ha hi kona ku kala nyamutlha.

²⁴ Ahemba nza wula ka wena, lezaku ku ta hehuka ka tiko ga le Sodoma hi siku ga kulamula ku hunza wena. Xip. 10:15

²⁵ Hi lexo xikhati Jesu i lo wulawula, aku: Nza ku khesa Dada, Hosi ya tilo ni misava, hi lezi u nga fihlela a titlhari ni vapimako a timhaka leti, kanilezi u zi wonekelisa ka lava va tsongwani. Lu. 10:21; 1 Kor. 1:19; 2 Kor. 3:14

²⁶ Ina, Dada, hakuva lezo zi wa sasekile mahlweni ka wena.

²⁷ Zilo zontlhe zi nyikilwe ka mina hi Dadani; a ku na munhu loyi a tivako Nʼwana, sine Dadani yece; hambu ni wa ku tiva Dadani, sine Nʼwana yece, ni wihi loyi a Nʼwana a ranzako ku mu wonekelisa ka yena. Lu. 10:22; Joh. 3:35; 1 Kor. 15:27

²⁸ Tanani ka mina, nwina nwentlhe mu tirako ni ku binzwa, nzi ta mu humuta.

²⁹ Rwalani a pingu wa mina, mu gonza ka mina; hakuva nzi rulile, nzi hi ni mbilu yi koramileko; mu ta kuma kuhumula mihefemulweni ya nwina. Joh. 13:15; Fil. 2:5; 1 Ped. 2:21

³⁰ Hakuva a pingu wa mina a wu tsanzi, ni nzhwalo wa mina wa hehuka.