Marku 7 - Tshwa Bible

A zilo lezi zi nyenyezisako.

¹ Zonake a vaFarisi ni vokari va vatsali, lava va nga tile hi le Jerusalema, va lo tsombana ka Jesu, Mat. 15:1

² hilezi va wa wonile vanwani va vapizani vakwe na va kari vaga hi mandla ya chaka, hi lezaku lawa ma nga hlaziwangiko.

³ Hakuva a vaFarisi ni vaJuda vontlhe, a vagi na va nga se ku hlamba mandla; va gonga mahanyela ya vakale.

⁴ Loku vata hi le hubyeni, a vagi na va nga se ku hlamba; yi kona ni yinweni mikhuwo leyi va yi amukeleko ku yi gonga: hi ku hlaza magombe, ni timbita, ni zibya za suku,

⁵ A vaFarisi ni vatsali va lo mu wutisa, vaku: Hi yini a vapizani va wena va nga fambiko hi mahanyela ya vakale, kanilezi vaga hi mandla ya chaka ke? Mat. 15:2

⁶ Aku kabye: I profetile khwatsi Isaya ha nwina, vaxengeteli, kota lezi ku tsalilweko: Lava vanhu va nzi dumisa hi milomu yabye, Kanilezi a timbilu tabye ti le kule na mina. Isa. 29:13; Mat. 15:8

⁷ Kanilezi a ku nzi khozela kabye mahala, Hakuva a tigonzo leti va ti gonzisako zileletelo za vanhu.

⁸ Nwina mu tsika a nayo wa Nungungulu, mu khomisisa a mahanyela ya vanhu.

⁹ A engeta aku: Mu ala a kulaya ka Nungungulu, kasi ma fela ku gonga mahanyela ya nwina.

¹⁰ Mosi i te ngalo: Chava raru wa wena ni nyine wa wena; niku: Loyi a rukatelako raru Wakwe kutani nyine wakwe, ngha afa hi kufa; Ekso. 20:12; Levi 20:9; Deut. 5:16

¹¹ kanilezi nwina muku: Loku munhu a wula ka raru wakwe kutani ka nyine wakwe aku: A za mina lezi u nga ta ngha u vunetelwa ha zona zi hi Korbani, lezo hiku ngalo, Zi basiselwe Nungungulu. Mat. 15:5

¹² Zonake a ma ha mu vumeli ku mahela nchumu a raru wakwe ni nyine wakwe;

¹³ mu maha a mhaka ya Nungungulu yi nga hi na ntamu hi kota ya mahanyela ya nwina lawa mu ma gonzisako; ni zinwani za kutala zo kota wona ma zi maha.

¹⁴ I lo engeta a vitana xidlemo, aku ngalo: Nzi zweni nwina nwentlhe, mu pima. Mat. 15:10

¹⁵ A ku na nchumu xi tako hi lahandle ka munhu, xi enghenako nzeni kakwe, xi zi kotako ku mu bihisa; kanilezi lezi zi humako ka munhu, hi zona zi mu bihisako.

¹⁶ Loyi a nga ni tindleve ta kuzwa, ngha a ingisa.

¹⁷ Laha na siyile xidlemo a enghena ndlwini, a vapizani vakwe va lo mu wutisa hi mufananiso lowo. Mat. 15:15

¹⁸ I te ngalo kabye: Na nwinawu a mu na kupima ke? A mu zi tivi lezaku kani hi xihi xi tako hi lahandle xi enghena ka munhu, a xi na ku mu bihisa ke?

¹⁹ Hakuva a xiyi mbilwini: yakwe, kanilezi xiya rumbyini gakwe, xi humeswa lahandle. Lezo i lo tlhamusela lezaku a kuga kontlhe ku hlazekile.

²⁰ A engeta aku: Lexi xi humako munhwini hi xona xi mu bihisako;

²¹ hakuva hi lomo nzeni, hi le timbilwini ta Vanhu, ku huma maalakanyo yo biha, a wubhayi, a kuyiva, ni kudaya; ni wurembi, Gen. 6:5; 8:21; Mat. 15:19

²² a kunavela, ni kubiha, ni kukhohlisa, ni wutsele, ni tihlo go biha, ni kurukatela, ni kutikukumukisa, ni wupumbu;

²³ zontlhe lezi za kubiha zi huma hi lomo nzeni, za bihisa munhu.

²⁴ I lo Suka hi laho, a famba matlhelweni ya Tire ni Sidoni, a enghena ndlwini yo kari, hakuva i wa nga ranzi ku tibyiwa hi munhu; kanilezi i wa nga hi na ku fihlala. Mat. 15:21

A wasati wa muSirofenike.

²⁵ Zalezo a wasati, loyi a nhanyana wakwe wa tsongwani a nga hi ni moya wa kubiha, na a zwile ha Jesu, i lota a tawa lahasi mikonzweni yakwe.

²⁶ A wasati loye i wa hi muGreki, a muSirofenike hi kupswalwa. I lo mu khongotela a kuva a hlongola a dimoni ka nhanyana wakwe.

²⁷ Jesu i te ngalo kakwe: Ngha va ranga vanana va xura; hakuva a zi faneli ku teka zibaba za vanana zi hoxiwa ka timbyana.

²⁸ Kanilezi i lo hlamula aku kakwe: Ina, Hosi, kanilezi na tona timbyana ti nga lahasi ka meza taga a matlhatlha ya vanana.

²⁹ Jesu aku ngalo kakwe: Hi kota ya gezu legi nziku ka wena, ti fambele; a dimoni gi humele ka nʼwana wa wena.

³⁰ Yena i lo famba ndlwini yakwe, a ya kuma a nwanana na a etlele sangweni, a dimoni na gi humile.

Kuhanyiswa ka xiwiri xi nga hi ni xirimiti.

³¹ Zonake i lo suka matlhelweni ya Tire, a tsemakanya Sidoni a kala a chikela bimbini ga Galilea, na hunzile hi le matlhelweni ya Dekapoli. Mat. 15:29

³² Va lo neha ka yena a munhu a nga hi xiwiri, na hi ni xirimiti, va mu khongotela a kuva a tlhateka canja gakwe hehla kakwe. Mat. 9:32; Lu. 11:14

³³ Jesu i lo mu humesa xidlenwini, aya naye xihundleni, aya enghenisa titiho takwe tindleveni ta xiwiri; i lo pela mari, a khumba lirimi la xona, Xip. 8:23; Joh. 9:6

³⁴ na cuwuka le tilweni i lo hefemuteka, aku ka xona: Efata, lezo hi ku ngalo: Vululeka!

³⁵ A tindleve takwe ti lo vululeka, ni misiha ya lirimi lakwe yi tlhatlheka, a su wulawula zi su dlunya. Isa. 35:5, 6; Mat. 11:5

³⁶ Jesu i lo va laya lezaku va nga byeli munhu; kanilezi kota lezi a nga va layisisa nguvu, hi laho va nga zi tlhatlhambutela nguvu.

³⁷ Va lo hlamaliswa nguvu, vaku: Yena i mahile zilo zontlhe khwatsi: i maha ni ziwiri a kuzwa ni timbeveve ti wulawula.