Marku 6 - Tshwa Bible

Jesu a gonzisa le Nazareta.

¹ Zonake i lo suka laho, aya tikweni ga le kabye, a vapizani vakwe va mu lanzela. Mat. 2:23; Lu. 4:16

² Hi siku ga sabado i lo gonzisa lomo sinagogeni; a vanyingi lava va nga muzwa va lo hlamala, vaku: Xana inaloyi i zi kumile kwihi lezi ke? Niku: Kutlhariha ka kuyini a nyikilweko kona, ni zirewukiso zi mahiwako hi mandla yakwe zita hi kwihi ke? Joh. 6:42

³ Loyi a hi yena muvatli, nʼwana Maria, ni nakulobye wa Jakobe, na Jose, na Juda, na Simoni ke? Ni vamakabye va xisati a va kona laha na hina ke? Va lo hlamuka ha yena. Mat. 11:6; Gal. 1:19

⁴ Jesu i te ngalo kabye: A muprofeti a nga vumali kudzunziwa, a handle ka lomu tikweni gabye, ni xikari ka maxaka yakwe, hi le ndlwini yabye. Mat. 13:57; Joh. 4:44

⁵ I wa nga zi koti ku maha xirewukiso laho, saseka ku tlhateka mandla yakwe ka vababyi va tsongwani, a va hanyisa.

⁶ I lo hlamala hi kota ya kungakholwi kabye. Zonake i lo nzulanzula mitaneni na a gonzisa. Isa. 59:16; Mat. 9:35; Lu. 13:22

Jesu a ruma vapostoli.

⁷ I lo vitana a vakhume ni vambiri, a sangula ku va ruma hi vambiri-vambiri, a va nyika ntamu wo humesa mimoya ya kubiha. Mat. 10:1; Lu. 9:1

⁸ I lo va laya lezaku va nga teki nchumu lwenzweni labye, saseka nhonga ntsena; ge ni timbuva, hambu a xikhwama, hambu ni mali mabhandini yabye;

⁹ va boha zilato, kanilezi va nga ambali mabhaji mambiri. Miti. 12:8

¹⁰ I te ngalo kabye: Kani hi kwihi laha mu enghenako lomu ndlwini, tshamani kona mu kala mu suka wutshanwini lego. Mat. 10:11; Lu. 9:4; 10:7, 8

¹¹ Ni ka gihi wutshamu va ta nga kala va nga mu amukeli, va nga mu ingisi, laha mu sukako kona, phuhunhani a ntshuri wa mikonzo ya nwina, kasi kuva wukustumunyu ka vona. Mat. 10:14; Lu. 10:10; Miti. 13:51

¹² Va lo andlamuka, va ya kanela lezaku ngha vanhu va hunzuluka.

¹³ Va lo hlongola madimoni manyingi, ni ku va tota hi mafura lava va nga babya, va va hanyisa. Jak. 5:14

A kufa ka Johani Mubapatizi.

¹⁴ Hosi Herodi yi lozwa ha Jesu, hakuva a vito gakwe gi wa zwakala; aku ngalo: Johani Mubapatizi i vukile hi ka vafileko, hikwalaho leyi mintamu yi tira ka yena. Mat. 14:1; Lu. 9:7

¹⁵ Kanilezi a vanwani vaku ngalo: Hi Elija. Vanwani vaku: Muprofeti, wo kota munwe wa vaprofeti. Mat. 16:14; Xip. 8:28

¹⁶ Kanilezi laha Herodi na zi zwile, i te ngalo: Hi Johani, loyi nzi nga mu tsema hloko, i vukile hi ka vafileko. Mat. 14:2; Lu. 3:19

¹⁷ Hakuva Herodi i wa rumele ku ya khoma Johani, a mu khotsela paxweni hi kota ya Herodia, a sati wa nakulobye Filipu; hakuva i wa mu tekile.

¹⁸ Hakuva Johani i wa te ngalo ka Herodi: A zi faneli ka wena ku teka a sati wa nakuloni. Levi 18:16

¹⁹ Herodia i lo mu pika, a lava ku mu daya, kanilezi i wa nga zi koti,

²⁰ hakuva Herodi i lo chava Johani, hi ku mu tiva lezaku i munhu a lulamileko ni kubasa, i lo mu lonzowota; Laha a ngazwa a kuwulawula ka Johani, i lo kanganyiseka nguvu, hambu zi hi tano i lo muzwa hi kutsaka. Mat. 14:5; 21:26

²¹ Laha xi nga chikele a xikhati xi nene, laha Herodi a nga mahela a manghanakana ni tinduna ta yimpi ni vahombe va le Galilea a mubuzo wa ku alakanya a siku ga kubelekiwa kakwe; Gen. 40:20

²² a nhanyana wa Herodia i lo enghena a kina, a tsakisa Herodi ni lava va nga tshamile naye kugeni; ni hosi yi te ngalo ka nhanyana: Nzi kombele ni xihi u xi ranzako, nzi ta ku nyika xona.

²³ A engeta a mu hlambanyela, aku: Nzi ta ku nyika ni xihi u xi kombelako, hambu ni khihlanya ga mufumo Wa mina. Estere 5:3, 6; 7:2

²⁴ A nhanyana i lo huma a ya wutisa nyine wakwe, aku: Nzi ta kombela yini ke? Yena aku: A hloko ya Johani Mubapatizi.

²⁵ Zonake i lo wuya le hosini hi kuhatlisa, a ta kombela aku: Nzi ranza lezaku u nzi nyika zalezi lomu ngelweni a hloko ya Johani Mubapatizi.

²⁶ A hosi yi lo xaniseka nguvu; kanilezi i wa nga lavi ku mu alela hi kota ya kuhlambanya kakwe, na hi kota ya lava va nga tshamile kugeni. Mat. 14:9

²⁷ Zalezo yi lo rumela ginwe ga masochwa yakwe, yi gi laya ku neha hloko ya Johani; gi lo famba gi ya mu tsema hloko lomo paxweni,

²⁸ gi neha hloko yakwe hi ngelo, gi yi nyika ka nhanyana; a nhanyana a yi nyika nyine wakwe.

²⁹ Laha vapizani va Johani na va zi zwile, va lo ta teka xirumbi xakwe, va ya xi lahla nkeleni.

Jesu a gisa 5,000 wa vavanuna.

³⁰ A vapostoli va lo tsombana ka Jesu, va mu hlawutela zontlhe lezi va zi mahileko, ni zontlhe lezi va zi gonzisileko vanhu. Lu. 9:10

³¹ Yena aku kabye: Tanani, hiya xiwuleni, hi ya tshama hoce, kasi ma humula kutsongwani. Hakuva ku wa hi kona vanyingi va ngata ni ku famba, laha kaku vapizani va nga kumi ni xikhati xa kuga. Mat. 14:13; Xip. 3:20

³² Va lo famba hi ngalava wutshanwini ga xiwula va hi voce. Mat. 14:13

³³ Kanilezi vanhu va lo va wona ni ku famba, a vanyingi va lo va tiva, va tsutsumela kona hi muhanza hi le mitini yontlhe, va rangela Jesu ni vapizani.

³⁴ Laha Jesu a nga huma ngalaveni i lo wona a xidlemo xa hombe, a va zwela wusiwana, hakuva va wa kota tiyivu ti nga hiko na murisi; i lo sangula ku va gonzisa timhaka to tala. Mat. 9:36; 14:14; Lu. 9:11

³⁵ Laha siku gi ngaya kupeleni, a vapizani va lo tshinela kakwe, vaku: A wutshamu xiwula, ni siku gi lava ku mbhela;

³⁶ va tlhelise, kasi va fela ku famba masinwini ni zimitaneni zi hi ranzeleko, va ya ti xavela zakuga.

³⁷ Kanilezi i lo hlamula aku ngalo kabye: Va heni nwina zakuga. Vaku ngalo kakwe: Hi famba hi ya xava a zibaba za 200 wa macheleni, hi va nyika vaga ke? Mitse. 11:13, 22; 2 Tih. 4:43

³⁸ Aku kabye: Mu na ni zibaba zingani? Fambani mu ya wona. Loku va zi tivile, vaku: I ntlhanu, ni zidluwani zimbiri. Mat. 14:17; Lu. 9:13; Joh. 6:9

³⁹ Yena i lo va laya lezaku a va tshame vontlhe hi mitlawa ka byanyi go nyuka.

⁴⁰ Va lo tshama lahasi hi mitlawa ya 100 ni ya 50.

⁴¹ Jesu i lo teka a ntlhanu wa zibaba ni zidluwani zimbiri, a cuwuka tilweni, a zi katekisa ni ku khema zibaba; zonake i lo nyika ka vapizani ku zi avela ka vanhu, ni zidluwani zimbiri i lo zi avanyisa xikari ka vona vontlhe. 1 Sam. 9:13; Mat. 26:26

⁴² Vontlhe va loga, va xura.

⁴³ Ku lo rolelwa matlhatlha, ku tala 12 wa zirunzu zinwe ni ya zidluwani.

⁴⁴ Lava va ngaga va wa hi 5,000 wa vavanuna.

Jesu a famba hehla ka mati.

⁴⁵ Zonake Jesu i lo hatla a kurumeta a vapizani vakwe ku khilela ngalaveni, a kuva va ranga vaya tlhatuko wa le Betsaida, yena a sala kala a tlhelisa xidlemo. Mat. 14:22; Joh. 6:17

⁴⁶ Anzhako na onekene naxo i loya xitsungeni ku ya khongela.

⁴⁷ Laha na gi hlwile, a ngalava yi wa hi xikari ka bimbi, yena na sele ha yece muhanzeni. Mat. 14:23; Joh. 6:16, 17

⁴⁸ I lo va wona ha va karateka hi ku bonza makasiya, hakuva a mheho yi wa hambene navo; hi xirinzo xa wumune xa wusiku i lota kabye na famba hehla ka bimbi; na a ngha a ku khwatsi ku va hunza.

⁴⁹ Kanilezi laha va nga mu wona na a famba hehla ka bimbi, va lo alakanya vaku xigono, vaba huwa;

⁵⁰ hakuva vontlhe va lo mu wona, va rurumela. Kanilezi i lo wulawula navo, aku kabye: Tiyani hlana, hi mina; mu nga chavi.

⁵¹ I lo enghena ka vona ngalaveni, ni mheho yi lo gawuka; vona va wa la su nchu hi kuhlamala,

⁵² hakuva a va pimangi hi lezi zi nga maheka hi zibaba, hakuva a timbilu tabye ti wa nonohile. Xip. 8:17, 18; 16:14

⁵³ Laha na va tlhatukile, va lo chikela tikweni ga Genesareta, va rikha fungwini. Mat. 14:34

⁵⁴ Na va humile ngalaveni a vanhu va lo mu tiva,

⁵⁵ va tsutsumela tikweni gontlhe ga leyo, va sangula ku rwala hi masango yabye lava va nga babya, va va yisa laho va ngazwa lezaku i kona.

⁵⁶ Ni kontlhe a nga enghena kona, zimitaneni kutani mitini, ni le masinwini, va lo veka a vababyi laha maphangweni, va mu khongotela lezaku va fela ku khumba machakafula ya nguwo yakwe; ni vontlhe lava va nga mu khumba va lo hanyiswa. Mat. 9:20; Xip. 5:27; Miti. 19:12