Marku 3 - Tshwa Bible

Jesu a hanyisa loyi a lameleko canja.

¹ Jesu i lo enghena kambe sinagogeni; ku wa hi kona munhu laho loyi a nga hi ni canja gi lameleko. Mat. 12:9; Lu. 6:6

² Va lo mu cuwukela, ku kutani i ta mu hanyisa hi siku ga sabado, kasi va fela ku mu kumisa nanzu.

³ Jesu i te ngalo ka munhu loyi a lameleko canja: Suka, u ta yima laha.

⁴ Aku kabye: Zi fanele ku maha kusaseka hi siku ga sabado, kutani ku maha kubiha ke? A ku hanyisa munhu, kutani ku daya ke? Kanilezi va lo miyela.

⁵ Laha na a langutile ka vona hi kuzangara, na karateka hi kota ya kunonoha ka timbilu tabye, aku ngalo ka munhu loye: Nawuluta canja ga wena. I lo gi nawuluta, gi tlhela gi hanya.

⁶ A vaFarisi va lo huma, va ya tlhangana ni va ka Herodi, va xuxa khungo ha yena, lezaku va ta mu dayisa kuyini. Mat. 12:14; 22:16

⁷ Jesu ni vapizani vakwe va lo suka laho vaya bimbini, a xidlemo xa hombe xa le Galilea xi lo mu lanzela, ni xa le Judia, Lu. 6:17

⁸ ni xa le Jerusalema, ni xa le Idumea, ni le tlhatuko wa Jordani, ni le matlhelweni ya Tire ni Sidoni; na vazwa hi zilo za hombe lezi a zi mahako va lota kakwe na va hi xidlemo xa hombe nguvu.

⁹ I lo byela vapizani vakwe, lezaku a ngalava a yi mu lavelele hi kota ya xidlemo, kutani a nga dzuka a manyiwa hi xona.

¹⁰ Hakuva i wa hanyisile vanyingi, ni vontlhe va nga hi ni tinghumbe va wo tsimbeketana kakwe, kasi va fela ku mu khumba.

¹¹ A mimoya ya kubiha, loku yi mu wona yi lowa lahasi mahlweni ka yena, yiba huwa, yiku: Wena u Nʼwana wa Nungungulu. Xip. 1:23, 24; Mat. 14:33

¹² I lo yi laya nguvu lezaku yi nga mu zwati. Mat. 12:16; Xip. 1:25, 34

Jesu a hlawula lava va khume ni vambiri.

¹³ I lo kanziha xitsungeni, a vitana kakwe lava a nga va hlawula, vata kakwe. Mat. 10:1; Lu. 6:12; 9:1

¹⁴ I lo yimisa khume ni vambiri lezaku va fela ku tshama naye, niku kasi a fela ku va ruma va ya kanela,

¹⁵ ni kuva ni ntamu wa ku hlongola madimoni.

¹⁶ A yimisa Simoni, loyi a nga mu chula vito gakwe ku hi Pedro,

¹⁷ na Jakobe nʼwana Zabedi, ni nakulobye Johani; lava a nga va chula vito gaku Boanerges, hi lezaku vana va kudzinza;

¹⁸ na Andreu, na Filipu, na Bartolomeu, na Mateu, na Tomasi, na Jakobe nʼwana Alfeusi, na Tadeu, na Simoni muKanani,

¹⁹ na Judasi Iskarioti, loyi a nga mu tokometa.

²⁰ Zonake i lo tlhelela kaya, ni xidlemo xi lo tlhela xi tsombana, laha ka kuva va nga zi koti ni kuga. Xip. 6:31

²¹ Laha maxaka yakwe na ma zi zwile, va lo famba a ku ya mu khoma, hakuva va waku: Wa pepuka.

Ku rukatela Moya wa ku Basa.

²² A vatsali lava va nga relele hi le Jerusalema, vaku ngalo: I na na Belzebuba, niku, I hlongola madimoni hi hosana ya madimoni. Mat. 9:34; Lu. 11:15; Joh. 7:20

²³ Yena i lo va vitana kakwe, a ku ngalo kabye hi mifananiso: Satani a nga zi kotisa kuyini ku hlongola Satani ke? Mat. 12:25

²⁴ A mufumo loku wu hambene ha woce, lowo mufumo a wu na ku tsonzoma.

²⁵ Ni loku a yindlu yi hambene ha yoce, leyo yindlu a yi zi koti ku yima.

²⁶ Loku Satani a ti vukele ha yece, a hambana ni wutsumbu gakwe, a nga zi koti ku yima, zonake i ta gumelwa.

²⁷ A nga kona a zi kotako ku enghena ndlwini ya nhenha a wutla xuma xa yona, loku a nga rangangi hi ku yi boha, zonake a phanga yindlu ya yona. Isa. 49:24; Mat. 12:29

²⁸ Hizinene nziku ka nwina: A vana va vanhu va ta tsetselelwa a zionho zabye zontlhe, ni tihlamba tontlhe leti va rukatelako ha tona; Mat. 12:31; Lu. 12:10; 1 Joh. 5:16

²⁹ Kanilezi loyi a rukatelako a Moya wa ku Basa, cima a nga ta tsetselelwa, i na ni xionho xa pinzukelwa.

³⁰ A wula lezo hakuva va wa te ngalo: I na ni moya wa kubiha.

A nyine wa Jesu ni vanakulobye.

³¹ Zonake ku lota a nyine wakwe ni vanakulobye, va ta yima laha handle; va lo mu vitanisa. Mat. 12:46; Lu. 8:19

³² Ni xidlemo xi wa mbambamele xi mu ranzela; vona vaku ka yena: Languta, wa labyiwa lahandle hi nyine wa wena ni vanakuloni.

³³ I lo va hlamula, aku: Himani a mamani ni vanakulori ke?

³⁴ 1 lo cuwuka ka lava va nga mbambamele va mu ranzela, aku: Langutani, mamani wa mina ni vanakulori hi valava!

³⁵ Hakuva loyi a mahako a kuranza ka Nungungulu, yaloye i nakulori, ni makweru, ni mamani wa mina.