Marku 2 - Tshwa Bible

Jesu a hanyisa munhu wofa reve ga tlhelo.

¹ Laha a nga wuya le Kapernaume anzhako ka masiku yo kari, ku wa la su zwakala lezaku i le kaya.

² Ku lo tsombana vanhu vanyingi, va tlhela va vumala ni wutshamu laha nyangweni; Jesu i lo kanela kabye.

³ Ku lo nehiwa kakwe a munhu loyi a nga file reve ga tlhelo, na a rwelwe hi mune wa vavanuna.

⁴ Laha va nga tsanzeka ku tshinela ka yena hi kota ya xidlemo, va lo tlhatlha a langwa la yindlu leyi a nga hi ka yona; laha na va li hoxile, va lo releta a lihlaka leli a nga etlele ka lona loyi a nga file reve ga tlhelo.

⁵ Jesu na a wona a kukholwa kabye, aku ka loyi a nga file reve ga tlhelo, Nwananga, a zionho za wena zi tsetselelwe.

⁶ Kanilezi laho ku wa tshamile a vatsali vo kari, va wulawulisana timbilwini tabye,

⁷ vaku: Hikuyini loyi munhu a wulako zakunghahi? Wa rukatela; himani a nga tsetselelako zionho, a handle ka Nungungulu yece? Joba 14:4; Isa. 43:25

⁸ Jesu na a zi tiva a moyeni wakwe lezaku va wulawulisana lezo xikari kabye, i te ngalo kabye: Hikuyini mu wulawulisanako lezo timbilwini ta nwina ke? Mat. 9:4

⁹ Hi xihi xi hehukako, a ku wula ka loyi a fileko reve ga tlhelo: A zionho za wena zi tsetselelwe, kutani ku ngalo: Suka, u teka sango ga wena, u famba? Mat. 9:5

¹⁰ Kanilezi kasi ma fela ku zi tiva lezaku a Nʼwana wa munhu i na ni ntamu misaveni a ku tsetselela zionho (i lo wula ka loyi a fileko reve ga tlhelo):

¹¹ Mina nza wula ka wena, Vuka, u teka sango ga wena uya kaya.

¹² Zonake i lo vuka, a teka sango a huma mahlweni ka vona vontlhe; hikwalaho vontlhe va lo hlamaliswa, va dumisa Nungungulu, vaku: Cima a hi wonangi zakunghahi.

A kuoitanwa ka Levi.

¹³ Jesu i lo engeta a famba hi fungu wa bimbi, ni xidlemo xontlhe xi loya ka yena, i lo va gonzisa. Mat. 9:9

¹⁴ Kota lezi a nga hunza, i lo wona Levi nʼwana Alfeusi, na a tshamile ndlwini ya alfandega; i te ngalo kakwe: Nzi lanzele. I lo suka a mu lanzela.

¹⁵ Laha Jesu na a tshamile kugeni lomu ndlwini ya Levi, a vahlengisi vanyingi ni vaonhi va lo tshamawu zinwe na Jesu ni vapizani vakwe, hakuva i wa lanzelwa hi vanyingi. Mat. 9:10

¹⁶ A vatsali va vaFarisi, laha na va wona lezaku iga ni vaonhi ni vahlengisi, vaku ngalo ka vapizani vakwe: Hi yini a gako ni kunwa zinwe ni vahlengisi ni vaonhi ke?

¹⁷ Laha Jesu na a zi zwile i te ngalo kabye: Lava va hanyako a va lavi nʼanga, kanilezi lava va babyako. Mina a nzi telangi ku ta vitana a valulamileko, kanilezi a vaonhi. Mat. 9:12, 13; Lu. 5:31, 32

A ku yila.

¹⁸ Laha a vapizani va Johani ni va vaFarisi va nga kari va yila, a vanhu va lota ka Jesu, vaku: Hikuyini va yila a vapizani va Johani ni vapizani va vaFarisi, a va wena va nga yili? Mat. 9:14; Lu. 5:33

¹⁹ Jesu aku ngalo kabye: Va zi kota ku yila a vanghana va muteki, a muteki na a ha hi navo ke? Kota lezi va hi ku ni muteki a va na ku yila.

²⁰ Kanilezi a masiku ma tata, laha a muteki a ta nga susiwa ka vona, zonake va ta yila.

²¹ A ku na munhu a rungelako xitiva xiswa ngubyeni ya kale; loku ku mahiwa lezo, a xitiva xiswa xi ta tlakuka ni leʼya kale, ni kuhanzuka ku enzeleka.

²² Kambe a ku na munhu a chelako vinya giswa lomu mikwameni ya kale; loku ku mahiwa lezo a vinya gi ta phuxuta a mikwama, a vinya gi halaka ni mikwama yi goheka. Kanilezi va chela vinya giswa mikwameni yiswa.

Ku kwamula zipupu za maoele hi sabado.

²³ Ku te a kari a tsemakanya masinwini hi siku ga sabado, a vapizani vakwe va si sangula ku kwamula a zipupu za mavele. Mat. 12:1; Lu. 6:1

²⁴ A vaFarisi va te ngalo kakwe: Hi yini va mahako lezi zi nga faneliko hi siku ga sabado ke?

²⁵ Yena aku ngalo kabye: Cima a mu gonzangi lezi a nga zi maha Davida, laha a nga vumala zakuga, a hi ni ndlala, yena zinwe ni lava a nga hi navo ke? 1 Sam. 21:6

²⁶ Lezaku i lo enghena ndlwini ya Nungungulu xikhatini lexi Abiatari a nga hi mupristi wa hombe, aga a zibaba zi vekilweko mahlweni ka Nungungulu, lezi zi nga faneliko ku giwa hi cumbu hi munhu, kanilezi hi vapristi voce, a nyika ni lava a nga hi navo? Ekso. 29:32, 33; Levi 24:9

²⁷ Zonake i te ngalo kabye: A sabado gi lo mahelwa munhu, a hi munhu a nga mahelwa sabado.

²⁸ Lezo a Nʼwana wa munhu i Hosi ni ya gona sabado. Mat. 12:8