Marku 14 - Tshwa Bible

A vahombe va xuxa khungo ha Jesu.

¹ Hi masiku mambiri na ku nga se ku chikela a mubuzo wa Pasika ni wa zibaba zi nga hiko na comelo, a vapristi va hombe ni vatsali va lo hlota ndlela ya ku mu khoma hi mano, va mu daya; Mat. 26:2; Lu. 22:1; Joh. 11:55

² hakuva va te ngalo: Zi nga mahiwi laha mubuzweni, ku nga taku ku hi kona dzolonga xikari ka vanhu.

Jesu a totiwa mafura le Betania.

³ Laha Jesu a nga hi le Betania, lomu ndlwini ya Simoni wa hlokonho, na a tshamile kugeni ku tota a wasati na hi ni xikhudzana xa alabasteri xi nga hi ni mafura yo nuhela ya tsengo wa hombe; i lo panza xikhudzana, a chulula a mafura a hlokweni yakwe. Mat. 26:6; Joh. 12:1-3

⁴ A vanwani va lo zangara, vaku xikari kabye: Ma xakelelwa yini a mafura ke?

⁵ Hakuva ngha ma xavile a 200 wa macheleni ma hlamusa, ku nyikiwa zisiwana. Va lo tsanwa hi wasati.

⁶ Kanilezi Jesu aku ngalo: Mu tsikeni, mu mu karatela yini ke? I nzi mahele a ntiro wo saseka.

⁷ Hakuva zisiwana zi na nwina xontlhe xikhati, loku mu kari mu zi ranza ma zi kota ku zi mahela kusaseka ni gihi siku; kasi mina, a mu na mina xikhati xontlhe. Deut. 15:11

⁸ I mahile lezi a zi kotako; i totile a miri wa mina kasi ku wu longisela a ku lahliwa.

⁹ Hizinene nziku ka nwina: Kani hi kwihi laha ivangeli yi ta nga kanetwa misaveni yontlhe, ni lexi a xi mahileko loyi wasati xi ta kanetwa, xi maha xialakanyiso ha yena.

¹⁰ Judasi Iskarioti, loyi a nga hi munwe wa vakhume ni vambiri, i loya ka vapristi va hombe, a ku ya mu nyikela kabye.

¹¹ Laha na va zi zwile, va lo tsaka, va mu tsumbisa mali; zonake i wa lava xikhati xi nene xo mu nyikela ha xona.

A Pasika.

¹² Hi siku go ranga ga mubuzo wa zibaba zi nga hiko na comelo, laha va nga tlhava pasika, a vapizani vakwe vaku ngalo ka yena: U ranza a kuva hi ya ku longiselela kwihi, kasi u fela ku gela kona a pasika ke? Mat. 26:17; Lu. 22:7

¹³ I lo ruma vambiri va vapizani vakwe, aku: Fambani mutini, mu ta tlhangana ni wanuna a rweleko a fuko ya mati; mu lanzeleni.

¹⁴ Laha a enghenako kona, mu taku ka nwinyi wa yindlu: A Mugonzisi i, yi kwihi yindlu laha nzi ta nga gela kona a pasika zinwe ni vapizani va mina?

¹⁵ Yena i ta mu kangeta a yindlu ya hombe le xitezi, leyi yi sasekisilweko; mu ta hi longisela kona.

¹⁶ A vapizani va lo suka, vaya mutini, va ya kuma kota lezi a nga va byelile; va longisa pasika.

¹⁷ Laha gi nga wa hlwile i lota ni vakhume ni vambiri. Mat. 26:20

¹⁸ Kota lezi va nga tshamile na va kari vaga, Jesu aku ngalo: Hizinene nziku ka nwina: Munwe wa nwina i ta nzi tokometa, yaloyi a gako na mina.

¹⁹ Va sangula ku xaniseka, munwe ni munwani aku kakwe: Hi mina ke?

²⁰ Aku ngalo kabye: Hi munwe wa vakhume ni vambiri, loyi a nusako zinwe na mina lomu ngelweni.

²¹ A Nʼwana wa munhu wa suka kota lezi ku tsalilweko ha yena; kanilezi i khombo ka munhu loyi a nyikelwako ha yena! Ku wa tava chukwana ka yena loku a wa nga belekiwangi. Mat. 26:24; Lu. 22:22

²² Laha va nga haga, Jesu i lo teka xibaba; loku a xi katekisile, i lo xi khema, a va nyika, aku: Tekani, lexi hi miri wa mina. Mat. 26:28; Lu. 22:19; 1 Kor. 11:23

²³ Zonake i lo teka a gombe, a khesa, a va nyika, vanwa ha gona vontlhe.

²⁴ Aku ngalo kabye: Lowu hi nkhata wa mina wa xivumelwano, lowu wu halatelweko a vanyingi.

²⁵ Hizinene nziku ka nwina: Nzi nga ta hanwa a mihanzu ya vina, kala siku lego nzi ta nga yinwa yi hi yiswa mufunweni wa Nungungulu.

²⁶ Laha na va yimbelele a lisimu, va lo huma vaya xitsungeni xa maoliva. Mat. 26:30

²⁷ Jesu aku ka vona: Nwina nwentlhe mu ta khubeka; hakuva ku tsalilwe ku ngalo: Nzi taba murisi, ni tiyivu ti ta hangalaka. Zak. 13:7; Mat. 26:31

²⁸ Ahembalokoke, anzhako ka: kuva na nzi vukile, nzi ta mu rangela a kuya Galilea. Xip. 16:7

²⁹ Kanilezi Pedro aku ngalo kakwe: Hambu loku vontlhe va khubeka, kanilezi mina kokwihi! Mat. 26:33, 34

³⁰ Jesu aku ka yena: Hizinene nzi ngalo ka wena, inyamutla, gona wusiku legi, na nkuku wu nga se kuba kumbiri, u ta nzi kaneta kunharu.

³¹ Kanilezi Pedro i lo engeta, a tiyisa aku: Hambu lokunzi ngafa na wena, nzi nga ta ku kaneta. Vontlhe va lo wulawulisa lezo. Getsemane.

³² Va lo chikela wutshanwini gi tibyiwako Getsemane; yena aku ngalo ka Vapizani vakwe: Tshamani laha, nza ha ya khongela. Mat. 26:36; Lu. 22:39; Joh. 18:1

³³ Yena i lo teka zinwe naye Pedro na Jakobe na Johani, zonake i lo sangula ku gavatana ni ku karateka nguvu.

³⁴ Yena aku ka vona: A muhefemulo wa mina wa; xaniseka nguvu, ku khwatsi hi kufa; tshamani laha, mu rinzela. Joh. 12:27

³⁵ I lo famba mahlweni kutsongwani, a yawa hasi, a khongela lezaku loku zi koteka, a xikhati lexi a xi hunze ka yena.

³⁶ Aku ngalo: Abba, Dadani! zontlhe za koteka ka wena; susa legi gombe kule na mina; ahembalokoke, na ku nga hi kuranza ka mina, kanilezi a ku mahiwe a kuranza ka wena. Joh. 5:30; Rom. 8:15; Maheb. 5:7

³⁷ Yena i lo wuya, a ta va kuma na va etlele, aku ngalo ka Pedro: Simoni, u etlele, ke? U wa nga zi koti ku rinzela hora yinwe ke?

³⁸ Rinzelani, mu khongela, kasi mu nga engheni kuringweni. Hakunene, a moya wa xuva, kanilezi a nyama yi na ni gome. Rom. 7:23; Gal. 5:17

³⁹ Zonake i lo tlhela, a ya khongela, a wula kambe twaleto timhaka.

⁴⁰ I lo wuya kambe, a ta va kuma na va etlele, hakuva a mahlo yabye ma wa tika nguvu; a va nga zi tivi lezaku va ta mu hlamulisa kuyini.

⁴¹ I lo wuya hi xikhati xa wunharu, a taku kabye: Kasi ma ha etlele, mu humula! Basi!. A xikhati xi tshinele; Nʼwana wa munhu wa nyikelwa mandleni ya vaonhi. Joh. 13:1

⁴² Sukani, hi famba! Loyi a nzi tokometako i tshinele. Mat. 26:46; Joh. 18:1, 2

Jesu a khonwa.

⁴³ Zalezo na a ha wulawula, ku lota Judasi, loyi a nga hi munwe wa vakhume ni vambiri, zinwe ni ntlawa wu nga hi ni tisupado ni zigomba, na vata hi ka vapristi ni vatsali ni masingalakati.

⁴⁴ Makunu loyi a mu nyikelako i wa va nyikile a xikombiso, aku: Loyi nzi ta nga mu pswopswa, hi yena; mu khomeni, mu famba naye, mu nga mu nyeseti.

⁴⁵ Laha a nga chikele, i lo hatla a tshinela ka Jesu, aku: Rabi; a mu pswopswa.

⁴⁶ Va lo mu tlhateka mandla, va mu khoma.

⁴⁷ Kanilezi munwe wa lava va nga hi kona i lo hlomula a supado yakwe, aba a nanza ga mupristi wa hombe, a gi tsema ndleve.

⁴⁸ Jesu i te ngalo kabye: Mu humele na mu hlomile tisupado ni zigomba a ku ta nzi khoma aku khwatsi nzi muphangi. Mat. 26:55; Lu. 22:53

⁴⁹ Nzi wa hi na nwina masiku wontihe nzi gonzisa tempeleni, a mu nzi khomangi; kanilezi lezi zi mahekile lezaku kasi a Mitsalo yi fela ku tatiseka. Tis. 22:6; Isa. 53:7

⁵⁰ A vapizani vontlhe va lo mu tsika, va tsutsuma. Tis. 88:18

⁵¹ A jaha go kari gi lo mu lanza, na gi huluxetile a nguwo ya wukene ntsena; va lo gi khoma,

⁵² kanilezi gi lo siya a nguwo mandleni yabye, gi tsutsuma na gi nga ambalangi nchumu. Jesu a yima mahlweni ka mupristi wa hombe.

⁵³ Zonake va lo yisa Jesu ka mupristi wa hombe, laha ku nga wa tsombene vontlhe vapristi va hombe ni masingalakati ni vatsali. Mat. 26:57; Lu. 22:54; Joh. 18:13

⁵⁴ Pedro i wa mu lanzele hi le kule; kala a enghena ndlwini ya mupristi wa hombe, a ya tshama zinwe ni malanza, a wora nzilo.

⁵⁵ A vapristi va hombe ni hubye yontlhe va lo lava wukustumunyu go vukela Jesu, aku kasi va fela ku mu daya; kanilezi a va gi kumangi.

⁵⁶ Hakuva vanyingi va lo maha wukustumunyu ga mawunwa ha yena, kanilezi a wukustumunyu gabye a gi vumelanangi.

⁵⁷ Zonake ku lo suka vanwani, va mu kecara, vaku:

⁵⁸ Hi wa mu zwile aku: Nzi ta khungumula tempeli leyi yi akilweko hi mandla, hi masiku manharu nzi ta aka yinwani yi nga mahiwangiko hi mandla. Xip. 15:29; Joh. 2:19

⁵⁹ Hambu lezo a wukustumunyu gabye a gi nga vumelanangi.

⁶⁰ Zonake a mupristi wa hombe i lo suka a yima xikari kabye, a wutisa Jesu, aku: A ku hlamuli nchumu ke? Xini lexi va ku kecarako ha xona ke? Mat. 26:62

⁶¹ Kanilezi i lo miyela, a nga hlamulangi nchumu. A mupristi wa hombe i lo engeta a mu wutisa, aku kakwe: Hi wena Kristu, a Nʼwana wa loyi a Khesiwako ke? Isa. 53:7; Mat. 26:63

⁶² Jesu aku: Hi mina yena. Mu ta wona Nʼwana wa munhu na a tshamile hi le reveni ga xinene ga ntamu, na ata hi marefu ya tilo. Mat. 24:30; 26:64; Lu. 22:69

⁶³ A mupristi wa hombe i lo hanzula a, tinguwo takwe, aku: Ha ha lavela yini a vakustumunyu ke?

⁶⁴ Mu yi zwile a nzhukano; mu alakanya yini nwina ke? Vontlhe va lo mu kona, vaku: I fanelwe hi kufa.

⁶⁵ A vanwani va lo sangula ku mu phelela, va mu fenengeta nghohe, ni ku mu fumbuta, vaku ngalo kakwe: Profeta! Na wona malanza ma lo mu phakata hi mandla.

Pedro a kaneta Hosi yakwe.

⁶⁶ Laha Pedro a nga hi lahasi le hubyeni, ku lota a nanza ga xisati ga mupristi wa hombe; Mat. 26:58; Lu. 22:55; Joh. 18:16

⁶⁷ na a wona Pedro a kari a wora nzilo, i lo mu cuwuka, aku: Wenawu u wa hi na Jesu wa le Nazareta.

⁶⁸ Kanilezi i lo kaneta, aku: A nzi zi tivi, hambu ni ku pima lezi u zi wulako. Zonake i lo huma laha nyangweni, ni nkuku wu loba.

⁶⁹ A nanza legi ga xisati, gi lo engeta giku ka lava va nga yimile kona: Loyi munwe wa wona. Pedro a kaneta kambe.

⁷⁰ Anzhako ka xikhatanyana lava va nga yimile kona, vaku ngalo ka Pedro: Futsi, u munwe wa vona, hakuva u wa le Galilea. Miti. 2:7

⁷¹ Kanilezi i lo sangula ku rukatela ni ku hlambanya, aku: A nzi mu tivi loyi munhu, mu wulako ha yena.

⁷² Zalezo a nkuku wu loba hi xikhati xa wumbiri; Pedro na alakanya a gezu legi Jesu a nga gi wulile kakwe, gaku: A nkuku na wu nga se kuba kumbiri, u ta nzi kaneta kunharu; i lo rila. Mat. 26:75