Marku 13 - Tshwa Bible

A zikombiso za kugumesa.

¹ Laha na a ha hi ku huma tempeleni, munwe wa vapizani vakwe aku ka yena: Mugonzisi, hi ngabye a sasekela ga maribye laya ni maakela ya tiyindlu ta kona! Mat. 24:1; Lu. 21:5

² Jesu aku kakwe: Wa ti wona a tiyindlu leti ta hombe ke? Ku nga ta siyiwa laha ni ribye ginwe hehla ka ginwani, legi gi ta nga kala gi nga wiswi lahasi.

³ Laha na a tshamile xitsungeni xa maOliva ngomama ni tempeli, Pedro na Jakobe na Johani na Andreu va lo mu wutisa na va hi voce,

⁴ vaku: Hi byele, zi ta maheka rini lezi ke? Xi tava xiwoniso muni xi ta nga komba lezaku xi tshinele xikhati xa kutatiseka ka zontlhe lezi ke? Mat. 24:3; Lu. 21:7

⁵ Jesu i lo sangula ku va byela, aku: Tlharihani lezaku mu nga pengiswi hi munhu. Jer. 29:8; Efe. 5:6; 1 Tes. 2:3

⁶ Hakuva vanyingi va tata hi vito ga mina, va taku: Nzi mina yena; va ta pengisa vo tala.

⁷ Laha mu ta ngazwa hi kulwa ni wudumo ga kulwa, mu nga karateki; lezi zi fanele a kuva zi humelela, kanilezi a hi kona kugumesa.

⁸ Hakuva a tiko gi ta vukela tiko, ni mufumo wu vukela mufumo; ku tava kona kutsekatseka ka misava matshanwini ma tsalangeneko; ni tindlala ti tava kona; lezi zilo hi kusangula ntsena ka kuxaniseka. Mat. 24:8

⁹ Kanilezi ti woneleni nwina; hakuva va ta mu yisa tihubyeni, mu biwa masinagogeni; mu ta yima mahlweni ka vafumeli ni tihosi hi kota ya mina, muva vakustumunyu va mina mahlweni kabye. Mat. 10:17, 18; Kuv. 2:10

¹⁰ Kanilezi ku yimelwe a kuva ivangeli yi kanetwa kuranga matikweni wontihe.

¹¹ Laha va mu kokovisako a ku mu yisa kulamulweni, mu nga kanakani hi lezi mu ta nga zi wula; kanilezi wulawuleni lezi mu ta nga nyikiwa hi xikhati xwalexo; hakuva a hi nwina lava mu wulawulako, kanilezi hi Moya wa ku Basa. Mat. 10:19; Lu. 12:11; Miti. 2:4

¹² Makabye i ta nyikela makabye kudayiweni, ni raru a nyikela nʼwana wakwe; a vana va ta vukela vapswali vabye, va va dayisa. Mika 7:6; Mat. 10:21; Lu. 21:16

¹³ Mu ta vengiwa hi vanhu vontlhe hi kota ya vito ga mina; kanilezi loyi a timiselako kala kugumeseni, hi yena a ta nga poniswa. Dan. 12:12; Mat. 24:9; Kuv. 2:10

¹⁴ Kanilezi laha na mu wona a manyalataniso ya mbhangalakasa na ma yimile laha ku nga faneliko (ngha loyi a gonzako a pima), zonake lava va nga le Judia a va chavele zitsungeni; Dan. 9:27; Mat. 24:15; Lu. 21:21

¹⁵ ni loyi a nga hehla ka yindlu a nga ha chiki, ne ni ku enghena a ya teka nchumu lomu ndlwini yakwe.

¹⁶ Ni loyi a nga le masinwini ngha a nga tlheli a ya teka nguwo yakwe.

¹⁷ Ku tava ni khombo ka vona lava va nga ni tinyimba, ni lava va anwisako hi lawo masiku.

¹⁸ Khongelani lezaku zi nga maheki hi mawuyakaya;

¹⁹ hakuva lawo masiku ma tava ni kuxaniseka, loku ku nga ngha ku nga hi kona hi kusanguleni ka tiko legi Nungungulu a nga gi vanga kala lezi, cima ku nga tava kona. Dan. 9:26; Mat. 24:21

²⁰ Loku Hosi yi wa nga komisangi lawo masiku, ngha ku nga hi kona ni munwe a hanyisilweko, kanilezi hi kota ya vahlawulilweko, lava yi va hlawulileko, yi ma komisile lawo masiku.

²¹ Zonake loku munhu aku ka nwina: Mangabye, hi loyi Kristu; kutani: Mangabye, hi gaya; mu nga mu kholwi. Mat. 24:23; Lu. 17:23

²² Hakuva ku ta huma vaKristu va mawunwa, ni vaprofeti va mawunwa; va ta maha zirewukiso ni zihlamaliso, kasi va fela ku pengisa ni vahlawulilweko loku zi koteka.

²³ Kanilezi ti woneleni nwina; langutani, nzi mu byelile zontlhe na zi nga se ku humelela. 2 Ped. 3:17

²⁴ Hi lawo masiku, anzhako ka kuxaniseka loku, a gambo gi ta pfhupeliswa, ni hweti yi nga ta humesa a kuwoninga ka yona, Joeli 2:2; Zef. 1:15; Lu. 21:25

²⁵ ni tinyeleti ti tawa hi le tilweni, ni mintamu leyi yi nga le tilweni yi ta tsekatseka.

²⁶ Zonake va ta wona Nʼwana wa munhu na ata hi marefu, a hi ni ntamu wa hombe ni kungangamela. Dan. 7:13; Mat. 16:27; Miti. 1:11

²⁷ I ta ruma tingelosi, a tsombanyisa a vahlawulilweko vakwe le matlhelweni ya mune, kusukela magemeta-musi ya misava ku kala magemetamusi ya tilo,

²⁸ Gonzani hi sinya ya nkuwu a mufananiso wa wona; loku a ravi ga wona gi nyuka, gi hluka matluka, ma zi tiva lezaku a ximumu xi le kusuhi. Mat. 24:32; Lu. 21:29

²⁹ Hizalezo na nwina, laha na mu wona lezi zilo zi maheka, zi tiveni lezaku i le kusuhi, kona tinyangweni.

³⁰ Hizinene nziku ka nwina: Lexi xizukulwana xi nga ta hunza, na zi nga se ku maheka lezi zilo zontlhe.

³¹ A tilo ni misava zi ta hunza, kanilezi a timhaka ta mina ti nga ta hunza. Isa. 40:8

³² Kanilezi lego siku kutani lexo xikhati, a nga kona ni munwe a zi tivako, hambu ni tingelosi ta le tilweni, hambu ni Nʼwana, sine Dadani yece.

³³ Tlharihani, mu rinzela ni ku khongela; hakuva a mu zi tivi lezaku xi tava xikhati muni. Mat. 24:42; Lu. 12:40; Rom. 13:11

³⁴ Ku khwatsi hi loku munhu a enzela matikweni, a siya yindlu yakwe na a nyikile ntamu ka malanza yakwe, ka ginwe ni ginwani a ntiro wa gona, a laya ni mulaveleli a ku rinzela. Mat. 24:45; 25:14

³⁵ Hikwalaho rinzelani, hakuva a mu zi tivi lezaku i tata rini a nwinyi wa yindlu; kutani hi laha gambyeni, kutani xikari ka wusiku, kutani kubeni ka nkuku, kutani ni mixo; Mat. 24:42, 44

³⁶ a nga chikela hi xitshuketi, a mu kuma na mu etlele.

³⁷ Lezi nzi wulako ka nwina, nzi wula ka vontlhe, nziku: Rinzelani!