Marku 12 - Tshwa Bible

A mufananiso va varimi ca xivina.

¹ Zonake i lo sangula ku kanela kabye hi mifananiso, aku: A munhu i lo byala xivina, a xi bhiyela lihlavu, a kehla a xigowolo xo hlutela vinya, ni ku aka tshala; zonake i lo xi nyikela ka varimi, aya matikweni. Mat. 21:33; Lu. 20:9

² Hi nguva ya kona i lo rumela a nanza ka varimi, kasi ga fela ku amukela a xipanze xa mihanzu ya xivina ka vona.

³ Kanilezi va lo gi khoma va giba, va gi tlhelisa na gi nga hi na nchumu.

⁴ I lo va rumela a ginwani nanza; kanilezi gona va gi balesa hloko, va gi wisa tingana.

⁵ I lo ruma ginwani, kanilezi va lo gi daya; nj manwani ya kutala; ku biwa vanwani, vanwani va dawa.

⁶ Yena i wa ha hi ni nʼwana munwe a ranzekako; hi kugumesa a mu ruma ka vona, aku: Va tava ni xichawo ka nʼwana wa mina.

⁷ Kanilezi a varimi va lo wulawulisana xikari kabye, vaku: Hi yena mugi wa tshomba, ngonani hi ta mu daya, higa tshomba yakwe.

⁸ Va lo mu khoma, va mu daya, va mu hoxa lahandle ka xivina.

⁹ I ta maha yini a nwinyi wa xivina ke? I tata a ta lovisa lavo varimi, a nyika xivina ka vanwani.

¹⁰ A mu se ku gonza a mutsalo lowu wu nge ngalo: A ribye legi gi nga aliwa hi vaaki, Gi mahile a hloko ya magumo; Tis. 118:22

¹¹ Lexi xi mahilwe hi Hosi, Xa hlamalisa mahlweni ya hina.

¹² Va lo lava ku mu khoma, kanilezi va chava xidlemo; hakuva va wa zi tiva lezaku a mufananiso lowu i wulawula ha vona; va lo mu siya, va famba. Mat. 21:45, 46; Joh. 7:25, 30, 44

Ku riha nzhuvo ka Kesari.

¹³ Zonake va lo ruma ka yena a vokari va vaFarisi ni va ka Herodi, lezaku va fela ku ya mu hika kuwulawuleni. Mat. 22:15; Lu. 20:20

¹⁴ Va lota, va taku kakwe: Mugonzisi, ha zi tiva lezaku u wula zinene, a ku chavi munhu, hakuva a ku cuwuki a xiyimo xa vanhu, kanilezi u gonzisa a ndlela ya Nungungulu hi zinene. Xana zi fanele ku yisa nzhuvo ka Kesari, kutani a hi zona ke? Hi luva, kutani hi nga luvi ke?

¹⁵ Kanilezi yena na a tiva a wuxengeteli gabye, aku ngalo ka vona: Mu nzi ringela yini ke? Nehani a denario, kasi nzi fela ku yi wona.

¹⁶ Va yi neha. I te ngalo kabye: Ngwa mani a mufananiso lowu ni kutsala loku ke? Vaku ngalo kakwe: Za Kesari.

¹⁷ Jesu aku kabye: Tlheliseni ka Kesari lezi zi nga za Kesari, ni ka Nungungulu lezi zi nga za Nungungulu. Va lo hlamala nguvu ha yena.

A mhaka ya ku vuka hi ka vafileko.

¹⁸ Zonake ku lota ka yena a vaSadusi, lava va nge ngalo a ku kona kuvuka hi ka vafileko; va ta mu wutisa, vaku: Mat. 22:23; Lu. 20:27; Miti. 23:8

¹⁹ Mugonzisi, Mosi i lo hi tsalela le? zaku loku nakulobye wa munhu afa, a siya sati, na a nga hi na nʼwana, a nakulobye i ta hlambela sati wakwe, kasi ku mu vuxela mbeleko. Deut. 25:5

²⁰ Ku wa hi kona a ntlhanu wa vanakulobye ni vambiri; a nhonzwa yi lo teka sati, yifa na yi nga siyangi nʼwana;

²¹ ni wa wumbiri i lo mu hlambela, a sufa, na a nga siyangi nʼwana; zinghaho ni wa wunharu.

²² A vantlhanu ni vambiri a va siyangi vana; hi magumo ya vontlhe afa ni wasati.

²³ A kuvukeni ka vafileko, i ta maha sati wa mani xikari ka vona, hakuva i wa mahile sati wa vona: vontlhe va ntlhanu ni Vambiri?

²⁴ Jesu aku ngalo ka vona: Xana a mu lahlekangi, hilezi mu nga yi tiviko mitsalo, hambu ni ntamu wa Nungungulu ke?

²⁵ Hakuva loku va vukile hi ka vafileko, a va ha teki, hambu ni ku tekiwa, kanilezi va ta kota tingelosi ta le tilweni. 1 Kor. 15:42, 49, 52

²⁶ Kanilezi hi kukumbuka a kuvuxiwa hi ka vafileko, a mu gonzangi bhukwini ga Mosi, hi wutshamu gi wulawulako hi xihlahla, lezaku Nungungulu i lo wulawula kakwe, aku: Nzi Nungungulu wa Abrahama, ni Nungungulu wa Isaka, ni Nungungulu wa Jakobe? Ekso. 3:6

²⁷ Yena a hi Nungungulu wa vafileko, kanilezi ngwa vahanyako. Mu lahlekile nguvu!

A nayo lowu wa hombe.

²⁸ Ku lo tshinela munwe wa vatsali, loyi a nga vazwa na va kari va wutisana, na a zi tiva lezaku Jesu i va hlamulile khwatsi, i lo mu wutisa, aku: Hi wihi a nayo wo ranga ka yona yontlhe ke? Mat. 22:35

²⁹ Jesu i lo hlamula, aku: A nayo wa kuranga hi lowu wu nge ngalo: Ingisa, Israeli! A Hosi Nungungulu wa wena i Hosi yinwe. Deut. 6:4; Lu. 10:27

³⁰ U ta ranza Hosi Nungungulu wa wena hi mbilu ya wena yontlhe, ni muhefemulo wa wena wontihe, ni kupima ka wena kontlhe, ni ntamu wa wena wontihe.

³¹ Ni wa wumbiri hi lowu: U ta ranza wakelene na wena kota lezi u ti ranzako wena. A wu kona nayo munwani wa hombe ku hunza leyi. Levi 19:18; Mat. 22:39; Gal. 5:14

³² A mutsali aku ngalo ka yena: Hi zona, Mugonzisi, u wulile khwatsi lezaku i Nungungulu munwe; a ku na munwani ahandle ka yena. Deut. 4:39; Isa. 45:6, 14; 46:9

³³ Ni ku mu ranza yena hi mbilu yontlhe, ni kupima kontlhe, ni ntamu wontihe, ni ku ranza wakelene kota munhu a ti ranzako wutsumbu, za hunza nguvu minyikelo yontlhe yo hiswa ni miphahlo. 1 Sam. 15:22; Hos. 6:6

³⁴ Laha Jesu na a wonile lezaku i hlamule hi kupima, aku ngalo kakwe: Wena a ku kule ni mufumo wa Nungungulu. Zonake ku wa nga hi na munhu a nga tiya ku mu wutisa nchumu. Mat. 22:46

Kristu i nʼwana mani?

³⁵ Laha Jesu a nga kari a gonzisa lomo tempeleni, i lo wutisa, aku: Hikuyini a vatsali va wulako lezaku Kristu i Nʼwana Davida ke? Mat. 22:41; Lu. 20:41

³⁶ Kasi Davida i wulile hi Moya wa ku Basa, aku: Hosi yi te ngalo ka Hosi ya mina, Tshama hi le reveni ga mina ga xinene, Kala nzi veka a valala va wena a kuva xikhegetelo xa mikonzo ya wena. 2 Sam. 23:2; Tis. 110:1

³⁷ Loku Davida wutsumbu a mu vitana aku Hosi, makunu i nʼwana wakwe hikuyini ke? A xidlemo xa vanhu xi lo muzwa hi kutsaka.

Jesu, a tlharihisa vanhu hi kota ya vatsali.

³⁸ A kugonziseni kakwe aku ngalo: Tlharihani hi vatsali, lava va ranzako ku famba na va ambele a tinguwo to leha ni ku losiwa lomu maphangweni, Mat. 23:1; Lu. 11:43; 20:46

³⁹ ni zitshamu za le mahlweni lomu masinagogeni, ni matshamu ya le mahlweni le mibuzweni;

⁴⁰ kanilezi na va phanga a tiyindlu ta tinoni, a xikhati va mahako mikhongelo yo leha. Vona va ta tsayiswa hi tsayiselelo wa hombe. Mat. 23:14

A munyikelo wa noni.

⁴¹ I lo tshama kusuhani ni laha va nga wa nyikela minyikelo, a wona lezi a xidlemo xi nyikelisako zona a mali xikhwameni xa minyikelo; ni vanyingi va fumileko va wa chela yo tala. 2 Tih. 12:9; Lu. 21:1

⁴² Ku lota a noni ya xisiwana, yi ta chela a malana mambiri ma ringanako ni dezana.

⁴³ Jesu i lo vitana vapizani vakwe, aku kabye: Hizinene nziku ka nwina: A noni leyi ya xisiwana yi chelile ku hunza vontlhe lava va chelako xikhwameni xa minyikelo; 2 Kor. 8:12

⁴⁴ hakuva vona vontlhe va chelile na zita hi ka leʼzinyingi zabye, kanilezi yena hi kuvumala kakwe i chelile zontlhe lezi a nga hi nazo a nga tsumba ku hanya hi zona.