Marku 11 - Tshwa Bible

A enghena Jerusalema.

¹ Laha va nga tshinela Jerusalema, va hi le kusuhi ni Betfage ni le Betania, le xitsungeni xa maOliva, Jesu i lo ruma vambiri va vapizani vakwe, Mat. 21:1; Lu. 19:29; Joh. 12:14

² aku ka vona: Fambani mutini wu nga mahlweni ka nwina; khwatsi hilezi mu enghenako ka wona, mu ta kuma a ximbongolana na xi khungilwe, lexi cima xi nga khilelwangiko hi munhu; xi tlhatlheni, mu xi neha laha.

³ Loku munhu aku ka nwina: Hi yini mu mahako lezo? Mu taku: A Hosi ya xi lava, yi ta xi tlhelisa lokuloku.

⁴ Va lo famba, va ya kuma ximbongolana na xi khungilwe nyangweni ya yindlu laha ndleleni; va xi tlhatlha.

⁵ A vanwani lava va yimileko laho, vaku ngalo kabye: Mu xi tlharihela yini a ximbongolana ke?

⁶ Vona va lo hlamula kota lezi Jesu a nga va byelile, zonake va va tsika va famba.

⁷ Laha na va nehile ximbongolana ka Jesu, va lo veka a tinguwo tabye hehla ka xona, yena a xi khilela.

⁸ A vanyingi va lo andlala tinguwo tabye ndleleni, ni vanwani a tiravi, leti va nga ti tsemile mafusini. Mat. 21:8

⁹ Lava va nga rangile, ni lava va nga lanzela va lo kanyuluka, vaku: Hozana: a khesiwe yena loyi a tako vitweni ga Hosi! Tis. 118:26

¹⁰ A wu khesiwe a mufumo lowu wu tako wa dadani wa hina Davida. Hozana le hehlahehla! Tis. 143:1

¹¹ Yena i lo enghena Jerusalema ni lomo tempeleni; laha na cuwukisile zontlhe gi wa pelile; yena a huma, aya Betania zinwe ni vakhume ni vambiri.

A nkuwu wo kala mihanzu.

¹² Hi manziko wa kona laha na va huma hi le Betania, i lozwa ndlala; Mat. 21:18

¹³ na a wona a sinya ya nkuwu le kule, na wu hi ni matluka, i lo hambuka aku kutani i ta kuma nchumu ka wona; kanilezi laha na a chikele ka wona, a nga kumangi nchumu, sine matluka ntsena, hakuva yi wa nga hi nguva ya makuwu.

¹⁴ Yena i te ngalo ka wona: Kusukela lezi ngha ku nga hi kona munhu a gako mihanzu ya wena kala kupinzuka. Ni vapizani va lo zizwa.

Jesu a basisa tempeli.

¹⁵ Laha va nga chikela Jerusalema, Jesu i lo enghena tempeleni, a sangula ku hlongola lava va xavisako ni lava va xavako tempeleni; a khubhunyeta a timeza ta lava va nga xavisa mali, ni zitshamu za vaxavisi va zipomba; Mat. 21:12; Lu. 19:45; Joh. 2:14

¹⁶ na a nga vumeli lezaku a munhu a tsemakanya tempeleni na a rwele nchumu.

¹⁷ I lo va gonzisa, aku: A ku tsaliwangi lezaku: A yindlu ya mina yi ta vitanwa a yindlu ya kukhongela ya matiko wontihe? Kasi ke nwina mu yi mahile a mhako ya vaphangi. Isa. 56:7; Jer. 7:11

¹⁸ A vapristi va hombe ni vatsali loku va zizwa, va wa lava lezaku va nga mu dayisa kuyini; hakuva va wa mu chava, hilezi a xidlemo xontlhe xi wa hlamala hi kugonzisa kakwe. Mat. 7:28; 21:45, 46; Lu. 4:32

¹⁹ A siku ni siku va wa huma mutini loku gi hlwile.

A sinya ya nkuwu yi wuna.

²⁰ Kota lezi va nga hunza ni mixo, va lo wona a sinya ya nkuwu na yi womile kusukela mitswini. Mat. 21:19

²¹ Pedro na alakanya, aku ka Jesu: Rabi, languta a sinya ya nkuwu leyi u nga yi rukatela, yi wunile.

²² Jesu i lo hlamula, aku ngalo ka vona: Ngha mu hi ni kukholwa ka Nungungulu.

²³ Hizinene nziku ka nwina: Kani hi wihi a ta ngaku ka lexi xitsunga: Kunuka u ya ti hoxa bimbini; loku a nga kanakani mbilwini yakwe, kanilezi a kholwa lezaku zi ta maheka lezi a zi wulako, i ta mahelwa zona. Mat. 17:20; 21:21; Lu. 17:6

²⁴ Hikwalaho nziku ka nwina: Zontlhe lezi mu zi kombelako hi kukhongela, kholwani lezaku mu zi amukele, mu tava nazo. Mat. 7:7; Lu. 11:9; Joh. 14:13

²⁵ Loku mu yimile mu khongela, tsetselelani a munhu loyi mu nga hi ni mhaka naye; kasi ni Raru wa nwina loyi a nga le tilweni a fela ku mu tsetselela a zihambuko za nwina. Mat. 6:14; Kol. 3:13

²⁶ Kanilezi loku mu nga tsetseleli vanwani, na yenawu a Raru wa nwina wa le tilweni a nga ta mu tsetselela a zihambuko za nwina.

Jesu a wutisiwa hi ntamu wakwe.

²⁷ Zonake va lo tlhela va enghena Jerusalema; ni laha a nga kari a fambafamba lomu tempeleni, a vapristi va hombe va lota ka yena zinwe ni vatsali ni masingalakati, Mat. 21:23; Lu. 20:1

²⁸ vaku kakwe: I ntamu muni u mahako ha wona lezi ke? Kutani himani a nga ku nyika lowu ntamu wa ku maha lezi zilo ke?

²⁹ Jesu aku ka vona: Minawu nzi ta mu wutisa mhaka yinwe; loku mu nzi hlamula, na mina nzi ta mu byela a ntamu lowu nzi mahako ha wona lezi zilo.

³⁰ A kubapatiza ka Johani ku wata hi le tilweni, kutani hi ka vanhu ke? Nzi hlamuleni.

³¹ Va lo wulawulisana xikari kabye, vaku: Loku hi ku ngalo: Hi le tilweni; i ta ku ngalo: Hi yini mu nga kala ku kholwa ka yena ke?

³² Kanilezi loku hiku: Hi ka vanhu—va wa chava vanhu, hakuva vontlhe va waku Johani hakunene muprofeti.

³³ Va lo hlamula Jesu, vaku: A hi zi tivi. Jesu aku ngalo kabye: Na minawu nzi nga ta mu byela hi ntamu lowu nzi mahako he wona lezi zilo.