Marku 10 - Tshwa Bible

A mhaka ya ku tsika sati.

¹ Jesu i lo suka laho, aya matlhelweni ya Judia hi le tlhatuko wa Jordani. A vanhu vanyingi va lo tsombana ka yena, zonake a engeta a va gonzisa kota kutolovela kakwe. Mat. 19:1; Joh. 10:40; 11:7

² Ku lota vaFarisi ka yena, va ta mu wutisa hi ku mu ringa, vaku: Zi fanele ka wanuna a ku hlongola sati wakwe ke?

³ I lo va hlamula, aku: Mosi i lo mu laya yini?

⁴ Vaku: Mosi i lo hi vumela a ku tsala a papilo ga kuhambana, ni ku mu hlongola. Deut. 24:1; Mat. 5:31; 19:7

⁵ Jesu i te ngalo kabye: 1 lo mu tsalela lowu nayo hi kota ya kunonoha ka timbilu ta nwina,

⁶ kanilezi a kusanguleni, Nungungulu i lo maha wanuna ni wasati; Gen. 1:27; 5:2

⁷ hi kota ya lezo a wanuna i ta siya a raru wakwe ni nyine wakwe, a namarela ka sati wakwe. Gen. 2:24; 1 Kor. 6:16

⁸ Lava vambiri va tava nyama yinwe, lezo a va ha hi vambiri, kanilezi i nyama yinwe.

⁹ Hikwalaho lezi Nungungulu a zi tlhanganyisileko, ngha zi nga hambanyiswi hi munhu.

¹⁰ Le kaya a vapizani va lo engeta va mu wutisa hi mhaka leyi.

¹¹ Yena aku kabye: Loyi a hlongolako sati wakwe, a teka munwani, wa bhaya; Mat. 5:32; Lu. 16:18; Rom. 7:3

¹² ni wasati loku a ala nuna wakwe, a tekwa hi munwani, wa bhaya.

Jesu a katekisa vanana.

¹³ Va lo neha ka yena a vanana, lezaku kasi a fela ku va khumba; kanilezi a vapizani va lo va tsimbetela. Mat. 19:13; Lu. 18:15

¹⁴ Laha Jesu na zi wonile, i lo tsanwa, aku kabye: Vumeleni a vanana a kuta ka mina, mu nga va beleteli; hakuva a mufumo wa Nungungulu ngwa va kunghahi. 1 Kor. 14:20; 1 Ped. 2:2

¹⁵ Hizinene nziku ka nwina: Loyi a nga amukeliko a mufumo wa Nungungulu kota nwanana, cima a nga ta enghena ka wona. Mat. 18:3

¹⁶ I lo va angatela, a tlhateka mandla hehla kabye, a va katekisa.

A jaha gi fumileko.

¹⁷ Laha a nga huma a goxometa ndleleni, a munhu i lo tsutsumela kakwe, a khizama mahlweni ka yena, a mu wutisa, aku: Mugonzisi wa nene, nzi ta maha yini, kasi nzi fela kuga a tshomba ya wutomi ga pinzukelwa ke? Mat. 19:16; Lu. 18:18

¹⁸ Jesu aku kakwe: Hi yini u nzi vitanako uku nzi nene ke? A ku na wa nene saseka munwe, yena Nungungulu.

¹⁹ Wa yi tiva milayo leyi yi nge ngalo: U nga dayi, U nga bhayi, U nga yivi, U nga mahi wukustumunyu ga mawunwa, U nga kalaveli, Chava raru wa wena ni nyine wa wena. Ekso. 20:12-16; Rom. 13:9

²⁰ Yena aku ngalo kakwe: Mugonzisi, zontlhe lezi nzi zi hlayisile kusukela wusweni ga mina.

²¹ Jesu na a mu cuwuka i lo mu ranza, aku kakwe: Wa ha vumala xilo xinwe; famba u ya xavisa zontlhe lezi u nga nazo, u nyika zisiwana; zonake u tava ni tshomba le tilweni; zonake ngona u nzi lanzela. Mat. 6:19, 20; Lu. 12:33

²² I lo tshuvika nghohe hi legi gezu, a famba na a karateka; hakuva i wa hi ni titshomba to tala.

²³ Jesu i lo lunguza, aku ka vapizani vakwe: Zi tsanzisa kuyini ka lava va fumileko a ku enghena mufunweni wa Nungungulu! Mat. 19:23; Lu. 18:24

²⁴ A vapizani va lo hlamala nguvu hi magezu lawa. Kanilezi Jesu i lo engeta aku ka vona: Vanana, zi tsanzisa kuyini ka lava va tsumbako titshomba a ku enghena mufunweni wa Nungungulu! Joba 31:24; Tis. 52:7; 1 Tim. 6:17

²⁵ Za hehuka ka kameli ku enghena nonwini wa chingani, ku hunza munhu a fumileko ku enghena mufunweni wa Nungungulu.

²⁶ Va lo hlamala nguvu, vaku ka yena: Kasi himani loyi a nga hanyiswako ke?

²⁷ Jesu i lo va cuwuka, aku: Ka vanhu a zi koteki, kanilezi a zi tsanzi ka Nungungulu; hakuva zontlhe za koteka ka Nungungulu. Jer. 32:17; Mat. 19:26; Lu. 1:37

²⁸ Pedro i te ngalo kakwe: Wangabye, hina hi siyile zontlhe, hi ku lanzela.

²⁹ Jesu aku ngalo: Hizinene nziku ka nwina: A ku na munhu loyi a siyileko yindlu, kutani vanakulobye, kutani vamakabye, kutani i nyine, kutani i raru, kutani i vana, kutani masimu, hi kota ya mina ni ivangeli,

³⁰ loyi a ta nga kala a nga amukeliswi hi ka zana a ka lexi xikhati, a tiyindlu, ni vanakulobye, ni vamakabye, ni vanyine, ni vana, ni masimu, na hi kona zixanisweni; ni ka tiko gi tako a wutomi ga pinzukelwa. 2 Kro. 25:9; Lu. 18:30

³¹ Kanilezi a vanyingi va nga va kuranga va tava va lenzhako, ni va lenzhako va tava va kuranga.

Jesu a tivisa hi kufa kakwe.

³² Va wa hi ndleleni, na va kanziha Jerusalema, Jesu na a rangile mahlweni kabye; vona va lo hlamala, ni lava va nga wa mu pangalata va wa chava. Zonake i lo engeta aya tlhelo ni vakhume ni vambiri, a va byela lezi zi ta nga mu humelela, Mat. 20:17; Lu. 9:22; 18:31

³³ aku: Langutani, ha kanziha hiya Jerusalema; a Nʼwana wa munhu i ta nyikelwa ka vapristi va hombe ni vatsali; va ta mu konela kufa, ni ku mu nyikela ka vamatiko,

³⁴ lava va ta nga mu tseketsela, va mu phelela, va mu xupula, ni ku mu daya; kanilezi anzhako ka masiku manharu i ta tlhela a vuka.

A xikombelo xa Jakobe na Johani.

³⁵ Jakobe na Johani, a vana va Zabedi, va lo tshinela ka yena, vaku kakwe: Mugonzisi, hi ranza lezaku u hi mahela ni xihi lexi hi ta nga xi kombela. Mat. 20:20

³⁶ Aku ngalo kabye; Mu ranza a kuva nzi mu mahela yini ke?

³⁷ Va te ngalo ka yena: Hi nyike lezaku hi tshama a munwe canjeni ga wena ga xinene, ni munwani canjeni ga wena ga xibhabha, a kungangameleni ka wena.

³⁸ Kanilezi Jesu aku ngalo kabye: Nwina a mu xi tivi lexi mu xi kombelako. Ma zi kota a kunwa a gombe legi nzi nwako gona ke? kutani ku bapatizwa hi kubapatiza loku nzi bapatizwako ha kona ke?

³⁹ Vaku ka yena: Ha zi kota. Jesu aku kabye: A gombe legi nzi gi nwako, mu ta ginwa; ni kubapatiza loku nzi bapatizwako ha kona mu ta bapatizwa ha kona;

⁴⁰ kanilezi a ku tshama canjeni ga mina ga xinene, kutani canjeni ga mina ga xibhabha a hi mina nzi nga nyikako, kanilezi zi tava ka lava zi longiselelweko vona.

⁴¹ Laha a vakhume na va zi zwile, va lo zangara ha Jakobe na Johani. Mat. 20:24

⁴² Jesu i lo va vitana, aku ka vona: Nwina ma zi tiva lezaku lava va tibyiwako tihosi xikari ka vamatiko ta va fumela, ni vahombe vabye va maha hi ntamu hehla ka vona. Lu. 22:25

⁴³ Kanilezi a zi nghaho xikari ka nwina; kanilezi loyi a ranzako ku maha wahombe xikari ka nwina, ngha a maha nanza ga nwina. Mat. 20:26, 28; Lu. 9:48

⁴⁴ Ni loyi a ranzako ku maha wo ranga xikari ka nwina a ave khumbi ya vontlhe.

⁴⁵ Hakuva a Nʼwana wa munhu a nga telangi ku ta tirelwa, kanilezi a ku ta tirela, ni ku nyikela kuhanya kakwe a kuva nzhiho wa ku tirula vanyingi. Mat. 20:28; Joh. 13:14; 1 Tim. 2:6

Bartimeusi a tlheliselwa kuwona kakwe.

⁴⁶ Vona va lo chikela Jeriko. Laha Jesu a nga ha huma Jeriko, zinwe ni vapizani vakwe ni xidlemo xa hombe, Bartimeusi nʼwana Timeusi, a xikhumu xi nga hi mukombeli, i wa tshamile reveni ga ndlela. Mat. 20:29; Lu. 18:35

⁴⁷ Laha a ngazwa lezaku hi Jesu wa le Nazareta, i lo sangula ku vitana, aku: Jesu Nʼwana Davida, nzi mahele wuxinji!

⁴⁸ A vanyingi va lo mu kawuka, lezaku ngha a miyela; kanilezi i lo engeta a vitana, aku: Nʼwana Davida, nzi mahele wuxinji!

⁴⁹ Jesu i lo yima, aku: Mu vitaneni. Zonake va lo vitana xikhumu, vaku ka xona: Tiya hlana; suka, wa ku vitana.

⁵⁰ I lo hoxa nguwo yakwe, a su kakatsuko, aya ka Jesu.

⁵¹ Jesu i lo mu wutisa, aku: U ranza a ku ngha nzi ku mahela yini ke? A xikhumu xiku kakwe: Raboni, ngha nzi tlheliselwa kuwona ka mina.

⁵² Jesu aku ngalo ka xona: Ti fambele, a kukholwa ka wena ku ku hanyisile. Zalezo xi lo tlheliselwa kuwona ka xona, xi mu lanzela ndleleni. Mat. 9:22; Xip. 5:34