Maheberu 9 - Tshwa Bible

A Mutlhanganyisi wa xivumelwano xiswa.

¹ Hakunene ni xivumelwano xo sangula xi wa hi ni mileletelo ya ku khozela Nungungulu, ni wutshamu go basa ga laha misaveni, Ekso. 25:8

² Hakuva ku wa mahilwe a tabernakeli; lomu ka xipetso xo ranga ku wa hi ni meza ya tikandiya, ni meza yi nga hi ni zibaba za xikombiso; a xipetso lexi xi wa tibyiwa ku ngalo, Wutshamu go Basa. Ekso. 25:23, 30, 31; 26:1

³ Lenzhako ka xisirelo xa wumbiri ku wa hi ni xipetso xi tibyiwako a Wutshamu go Basabasa; Ekso. 26:33

⁴ legi gi nga hi ni alati ga nzalama go hisela kona mpepo, ni Nghaxa ya Xivumelwano, leyi yi nameketelweko nzalama matlhelo wontihe. Lomo nzeni ka yona ku wa hi ni mbita ya nzalama leyi yi nga hi ni manna, ni nhonga ya Aroni leyi yi nga hluka, ni timbila ta xivumelwano. Ekso. 16:33; Mitse. 17:10; Deut. 10:2, 5

⁵ Le hehla ka nghaxa ku wa hi kona a makerubima ya kungangamela, lawa ma nga sirela a xitshamu xa wuxinji; kanilezi a hi na xikhati makunu ku wulawula hi xinwe ni xinwani xa zona. Ekso. 25:22

⁶ Zonake lezi zilo na zi longisilwe kota lezo, a vapristi va simamisa va enghena xipetsweni xo ranga, va tira a mitiro ya kukhozela Nungungulu. Mitse. 28:3; Dan. 8:11

⁷ Kanilezi lomu xipetsweni xa wumbiri ku enghena mupristi wa hombe yece, a enghena kanwe hi lembe; kanilezi a nga engheni a handle ka loku a hi ni nkhata, lowu a phahlelako ha wona hi kota ya wutsumbu gakwe, ni zihambuko za vanhu. Ekso. 30:10; Xip. 7:27

⁸ A Moya wa ku Basa wu kombisa hi lezi, lezaku a ndlela ya ku enghena lomu Wutshanwini go Basabasa a yi se ku vululiwa, a tabernakeli go ranga na ga ha yimile. Joh. 14:6

⁹ Hakuva a xipetso lexi mufananiso wu xungetako a xikhati lexi, lexi ha xona ku humeswako a minyikelo ni miphahlelo leyi yi nga zi kotiko ku mbhelelisa a livalo la mukhozeli wa kona, Gal. 3:21

¹⁰ hakuva zileletelo za mahanyela ntsena hi tlhelo ga mikhuwo ya zakuga ni kunwa ni mahlazela ma tsalangeneko, zi vekilweko kala xikhatini xa kuhunzuluswa luswa. Levi 11:2; Mitse. 19:7

¹¹ Kanilezi Kristu i lota na hi mupristi wa hombe wa zilo zo saseka lezi za ha tako; a tsemakanya a tabernakeli ga hombe legi gi mbheleleko, legi gi nga mahiwangiko hi mandla, lezo hi ku ngalo, a hi ga misava leyi.

¹² Kambe a nga enghenangi lomu Wutshanwini go Basabasa na hi ni nkhata wa timbuti ni marole, kanilezi na hi ni nkhata wakwe yena wutsumbu i lo enghena kanwe, a kuma kutirulwa ka pinzukelwa. Dan. 9:24; Zak. 3:9; Kuv. 1:5

¹³ Hakuva loku a nkhata wa timbuti ni tikuzi, ni khuma ga thokazi, na zi nwatsekelwe ka vona lava va nyenyezileko, zi hlaza a kuva ku basiswa miri; Levi 16:14, 16; Mitse. 19:2

¹⁴ nguvunguvu a nkhata wa Kristu, loyi a nga ti nyikela ka Nungungulu hi Moya wa pinzukelwa na a nga hi na kusoleka, wu ta hlaza a tivalo ta nwina, wu susa a mitiro leyi yi fileko, kasi ma fela ku khozela a Nungungulu a hanyako. Lu. 1:74; Rom. 1:4; Tit. 2:14

¹⁵ Hi kota ya lezo yena mutlhanganyisi wa vanhu ni Nungungulu xivumelwaneni xiswa, kasi vona lava va vitanilweko va fela ku kuma a tshomba ya pinzukelwa leyi va tsumbisilweko yona, kota lezi ku humeleko a kufa loku ku va tirulako ka zihambuko lezi zi nga mahiwa lahasi ka xivumelwano xo ranga. Rom. 3:25; 1 Tim. 2:5

¹⁶ Hakuva loku gi hi kona a papilo gi leletelako hi tlhelo ga tshomba, ku fela ku bikiwa hi kufa ka loyi a gi tsalileko.

¹⁷ Hakuva a papilo ga tshomba gi tiyiswa loku a file loyi a gi tsalileko, hakuva a gi na ntamu loku a ha hanya. Gal. 3:15

¹⁸ Hikwalaho hambu ni xivumelwano xo ranga a xi tiyiswangi a handle ka nkhata. Ekso. 24:6

¹⁹ Hakuva laha Mosi a nga hlawutele yontlhe milayo ka vanhu vontlhe, yena i lo teka a nkhata wa marole ni timbuti, zinwe ni mati ni woya go pswhuka ni hisope, a nwatsekela a bhuku ga kona ni vanhu vontlhe, aku: Ekso. 24:5, 6, 8; Levi 14:4, 6, 7, 49

²⁰ Lowu hi nkhata wa xivumelwano lexi Nungungulu a mu layileko ha xona. Mat. 26:28

²¹ Kambe i lo nwatsekelisa zalezo hi nkhata a tabernakeli ni zibya zontlhe za ku khozela ha zona. Ekso. 29:12; Levi 8:15

²² Ko khwatsi hi nayo a zilo zontlhe zi basiswa hi nkhata; a handle ka kuhalatwa ka nkhata a ku kona kutsetselelwa ka zionho. Levi 17:11

²³ Hikwalaho zi wa lavekile lezaku a zilo lezi zi fananisako a zilo za le tilweni zi basiswa hi miphahlo ya kunghaho; kanilezi a za le tilweni zona zi wa fanele ku basiswa hi miphahlo yi nene yo hunza leyi.

²⁴ Hakuva Kristu a nga enghenangi Wutshanwini go Basabasa gi mahilweko hi mandla, legi gi nga xifananiso ntsena xa legi ga ginene; kanilezi i lo enghena kona tilweni ha koce, kasi ku hi yimela makunu mahlweni ka Nungungulu. Rom. 8:34; 1 Joh. 2:1

²⁵ Tlhatakumbiri, a nga enghenangi kanyingi kasi ku maha nzhiho hi wutsumbu gakwe, khwatsi hilezi a mupristi wa hombe a enghenako Wutshanwini go Basabasa lembe ni lembe, na hi ni nkhata lowu wu nga hiko wakwe.

²⁶ Loku zi wa hi lezo ngha a yimelwe hi ku xaniseka kambe ni kambe kusukela kuvangiweni ka misava; kanilezi makunu i wonekile kanwe kugumeseni ka tintanga, kasi ku fuvisa kuonha hi ku maha muphahlelo hi wutsumbu gakwe. Gal. 4:4; 1 Ped. 3:18

²⁷ Kambe kota lezi ku yimiselweko vanhu a kuva vafa kanwe, va lamulwa; Gen. 3:19; 2 Kor. 5:10; Kuv. 20:12

²⁸ hizalezo Kristu kambe, na a nyikelwe kanwe, kasi ku rwala a zionho za vanyingi, i ta woneka hi xikhati xa wumbiri a handle ka kuonha, a ka lava va mu rinzelako lezaku a va hanyisa. Rom. 6:10; Tit. 2:13; 1 Ped. 2:24