Maheberu 4 - Tshwa Bible

A kuhumula ka vanhu va Nungungulu.

¹ Kota lezi a xitsumbiso xa kuenghena kuhumuleni kakwe xa ha hi ku kona, a hi chaveni lezaku ku nga sali nzhako ni munwe wa nwina.

² Hakuva na hinawu hi kanelelwe a ivangeli, khwatsi hi vona; kanilezi vona, a mhaka leyi va nga yizwa a yi va vunangi nchumu, hakuva lava va nga yizwa a va yi amukelangi hi kukholwa.

³ Hakuva hina lava hi kholilweko ha enghena kuhumuleni loku, kota lezi a ngaku ngalo: Lezo nzi lo hlambanya zangeni ya mina, nziku: Va nga ta enghena kuhumuleni ka mina; a wula lezo hambu lezi a nga wa hetile mitiro yakwe hi le kuvangiweni ka misava. Tis. 95:11; Xip. 3:11

⁴ Hakuva a wutshanwini go kari ku tsalilwe hi siku ga wuntlhanu ni mambiri, ku ngalo: Nungungulu i lo humula mitirweni yakwe yontlhe hi siku ga wuntlhanu ni mambiri. Gen. 2:2; Ekso. 31:17

⁵ Kasi ka wutshamu legi i ngalo: Va nga ta enghena kuhumuleni ka mina.

⁶ Hikwalaho kota lezi vanwani va ha vumelwako a ku enghena kona, ni lava va nga kanelelwa kale a mahungu yo saseka va nga tsanzeka ku enghena hi kota ya kungaingisi,

⁷ yena a engeta a veka siku go kari, gaku: Nyamutlha; hakuva loku ku hunzile a xikhati xo leha i wula bhukwini ga Davida, kota lezi a wulileko kale, ku ngalo: Nyamutlha loku muzwa a gezu gakwe, Mu nga nonohisi a timbilu ta nwina. Tis. 95:7

⁸ Hakuva loku Joxua a wa va nyikile kuhumula, ngha Nungungulu a nga engetangi a wula hi ginwani siku.

⁹ Hikwalaho ga ha va salele a sabado ga kuhumula a vanhu va Nungungulu.

¹⁰ Hakuva yena loyi a enghenileko kuhumuleni ka Nungungulu, i humule na yena mitirweni yakwe, kota lezi Nungungulu a nga humula ka yakwe.

¹¹ Hikwalaho a hi pinyameleni a ku enghena kuhumuleni loku, kasi ku ngavi ni munwe loyi a wako hi kungaingisi ka kunghaho. Xip. 3:12, 18, 19

¹² Hakuva a mhaka ya Nungungulu ya hanya, yi na ni ntamu, ya kariha ku hunza supado ya wutlha gimbiri, yi tlhava yi kala yi hambanyisa a muhefemulo ni moya, ni mahlakala ni mongo; yi hlola a maalakanyo ni mixuvo ya mbilu. Isa. 49:2; Efe. 6:17; Kuv. 1:16

¹³ Hakuva a xi kona ximahwa xi fihlilweko mahlweni ka yena; kanilezi zontlhe zi vululwe ziku dlunya mahlweni ya yena loyi hi ta nga ti hlamulela mahlweni kakwe.

Jesu a Mupristi wa hombe a hunzeleleko wukulu.

¹⁴ Makunu kota lezi hi nga ni mupristi wa hombe a hunzeleleko wukulu, loyi a tsemakanyileko matilo, a nga Jesu a Nʼwana wa Nungungulu, ngha hi khomisisa a kuvumela ka hina. Xip. 3:1; 7:26

¹⁵ Hakuva a mupristi wa hombe loyi hi nga naye, a hi loyi a tsanzekako ku hi zwela wusiwana hi kota ya gome ga hina; kanilezi munwe loyi a ringilweko hi matlhelo wontihe khwatsi hi hina, kanilezi a nga onhangi. Isa. 53:3; Lu. 22:28; 2 Kor. 5:21

¹⁶ Hikwalaho a hi tshineleni hi kutiya xitshanwini xa wuhosi xa tipswalo, kasi hi fela ku mahelwa wuxinji, hi kuma tipswalo ta ku hi vuna xikhatini xa kuvumala.