Maheberu 3 - Tshwa Bible

A Nʼwana ngwa hombe ku hunza Mosi.

¹ Hikwalaho, vamakabye vo basa, mu nga vahlengeli va kuvitanwa ka le tilweni, ehleketani ha Jesu, a Mupostoli tlhelo Mupristi wa hombe wa kuvumela ka hina; Fil. 3:14; 2 Ped. 1:10

² a nga tsumbeka ka loyi a mu yimisileko, kota lezi Mosi a nga tsumbeka lomu ndlwini yontlhe ya Nungungulu. Mitse. 12:7

³ Hakuva yena i hlayelwe aku i fanele wudzunzo ku hunza ga Mosi, kota lezi loyi a akileko yindlu i kuma kudzunziwa ka hombe ku hunza yindlu ya kona. Zak. 6:12; Mat. 16:18

⁴ Hakuva a yindlu yinwe ni yinwani yi akilwe hi munhu wo kari, kanilezi loyi a akileko zilo zontlhe hi Nungungulu. Efe. 2:10; 3:9; Xip. 1:2

⁵ Mosi hizinene, i wa tsumbekile lomu ndlwini yontlhe ya Nungungulu khwatsi hi nanza, lezaku a kustumunya hi lezi zi ta nga wulawulwa hi lenzhako; Ekso. 14:31; Jox. 1:2

⁶ kanilezi Kristu i wa tsumbekile khwatsi hi nʼwana hehla ka yindlu ya Nungungulu. A yindlu yakwe yi nga hina, loku hi khomisisa a kutiya ka hina, ni ku kulisa a kutsumba ka hina kala kugumeseni. Mat. 24:13; 2 Kor. 6:16; Efe. 2:21, 22

⁷ Hikwalaho, kota lezi wu wulako a Moya wa ku Basa, wuku: Nyamutlha loku muzwa a gezu gakwe, Tis. 95:7

⁸ Mu nga nonohisi a timbilu ta nwina kota laha va nga nzi zangarisa, Khwatsi hi siku ga ku nzi ringa le xiwuleni,

⁹ Laha a vakoko va nwina va nga nzi ringa ni ku nzi hlola. Hambu lezi va nga wonile a mitiro ya mina 40 wa malembe.

¹⁰ Hikwalaho nzi wa zangarele lexo xizukulwana, Nziku: Vona va lahleka xontlhe xikhati timbilwini tabye. Kanilezi a va tivangi a tindlela ta mina.

¹¹ Lezo nzi lo hlambanya zangeni ya mina, nziku: Va nga ta enghena kuhumuleni ka mina.

¹² Tlharihani vamakabye, ku nga taku yi hi kona ka munwe wa nwina a mbilu yi bihileko yi nga kholwiko, ya ku fularela Nungungulu loyi a hanyako.

¹³ Khongotelanani a masiku ni masiku, loku ka ha wuliwa ku ngalo: Nyamutlha; kasi ku nga nonohiswi ni munwe wa nwina hi kukhohlisa ka kuonha.

¹⁴ Hakuva hina hi mahile lava va avelweko Kristu, loku hi khomisisa a kutsumba ka hina ko sangula ku tiya kala magumo,

¹⁵ Hakuva ka ha wuliwa ka hina ku ngalo: Nyamutlha loku muzwa a gezu gakwe, Mu nga nonohisi a timbilu ta nwina kota laha va nga nzi zangarisa.

¹⁶ Hakuva mbamani va nga muzwa va tlhela va mu zangarisa ke? Xana a hi vontlhe lava va nga huma hi le Gipite nava rangelwa hi Mosi ke? Mitse. 14:2

¹⁷ Vamani lava a nga va zangarela a 40 wa malembe ke? A hi vona lava va nga onha, lava a zirumbi zabye zi nga wela xiwuleni ke? 1 Kor. 10:5

¹⁸ Vamani lava a nga va hlambanyela lezaku va nga ta enghena kuhumuleni kakwe, loku ku nga hi vona lava va nga kala ku ingisa ke?

¹⁹ Hikwalaho ha zi wona lezaku a va zi kotangi ku enghena hi kota ya kungakholwi. Xip. 4:6