Maheberu 10 - Tshwa Bible

¹ Kota lezi a nayo wu nga ni xiruti ntsena xa zilo zo saseka lezi zi tako, na wu nga fananisi hi kumbheleleko a xiyimo xa zona, cima a wu zi koti ku mbhelelisa vona lava va tshinelako hi miphahlelo leyi va nyikelako yona malembe ni malembe. Kol. 2:17

² Hakuva loku zi wa hi tano, ngha va tsikile a ku nyikela, hakuva a vakhozeli loku va basisilwe kanwe, ngha va nga zwangi kambe a livalo la zionho.

³ Kanilezi hi miphahlelo leyo ku alakanyiswa hi zionho a malembe ni malembe. Levi 16:21

⁴ Hakuva a zi koteki lezaku a nkhata wa tikuzi ni timbuti wu susa zionho. Mika 6:6, 7

⁵ Hikwalaho laha Kristu a ngata laha misaveni, i te ngalo: A miphahlelo ni minyikelo a ku tsaki ha zona, Kanilezi u nzi longiselele a miri; Tis. 40:6; Isa. 1:11

⁶ A ku tsakangi hi miphahlelo ya kuhiswa ni leyi yi humeselwako kuonha.

⁷ Zonake nzi wa te ngalo: Languta, nzata a ku ta maha kuranza ka wena Nungungulu. (Lomu bhukwini ku tsalilwe lezo ha mina.)

⁸ Na a rangile a wula aku: A miphahlelo ni minyikelo, ni miphahlelo ya kuhiswa ni leyi yi humeselwako kuonha a ku zi ranzangi, hambu ni ku tsaka ha zona (hambu lezi zi nyikelwako hi nayo).

⁹ Zonake a engeta, aku: Languta, nzata a ku ta maha kuranza ka wena. Yena i susa leʼza kuranga, kasi a fela ku yimisa a za wumbiri.

¹⁰ Hi kuranza kwaloko hi basisilwe hi kunyikelwa ka miri wa Jesu Kristu kanwe ku mbhela. Joh. 17:19

¹¹ Hakunene a mupristi munwe ni munwani i yimile masiku ni masiku kukhozeleni, a nyikela yaleyo miphahlelo kambe ni kambe, leyi yi nga zi kotiko ku susa zionho. Mitse. 28:3

¹² Kanilezi yena, laha na a nyikele a munyikelo munwe ntsena hi kota ya zionho, i tshamile kala kupinzuka canjeni ga xinene ga Nungungulu, Kol. 3:1

¹³ na a rinzela kala a valala vakwe va mahiwa a xikhegetelo xa mikonzo yakwe. Tis. 110:1

¹⁴ Hakuva hi muphahlelo munwe yena i mbhelelisile kala kupinzuka vona lava va basisilweko.

¹⁵ Na wona Moya wa ku Basa kambe wa hi mahela wukustumunyu; hakuva anzhako ka kuva na wu wulile ku ngalo:

¹⁶ Lexi hi xivumelwano nzi to xi maha na vona anzhako ka lawo masiku, ku wula Hosi; Nzi ta veka milayo ya mina timbilwini tabye, Nzi yi tsala kambe kupimeni kabye. Jer. 31:33

¹⁷ Wu engeta wuku: A zionho zabye ni zigoho zabye nzi nga ta zi alakanya kambe.

¹⁸ Makunu laha ku nga kona a kutsetselelwa ka zionho, a ka ha laveki a kuphahlelwa hi kota ya kuonha.

Ku enghena Wutshanwini go Basabasa.

¹⁹ Hikwalaho, vamakabye, kota Iezi hi nga ni kutiya a ku enghena Wutshanwini go Basabasa hi nkhata wa Jesu, Rom. 5:2

²⁰ hi ndlela leyi a hi longiseleko yona, a ndlela yiswa yi hanyako yo tsemakanya a xisirelo, lezo hi ku ngalo, hi nyama yakwe; Joh. 14:6

²¹ kota lezi hi nga ni mupristi wa hombe hehla ka yindlu ya Nungungulu, 1 Tim. 3:15

²² ngha hi tshinela hi timbilu ti nene na hi hi ni kutiya ka hombe kukholweni, a timbilu ta hina na ti nwatsekelwa ti basiswa ka livalo lo biha, a mimiri ya hina na yi hlazilwe hi mati ma nene. Ezek. 36:25; Efe. 3:12; Jak. 1:6

²³ A hi khomisiseni a kuvumela ka kutsumba ka hina, kasi ku nga kanakaniswi; hakuva i tsumbekile loyi a nga hi tsumbisa. 1 Kor. 1:9; 10:13; 2 Tes. 3:3

²⁴ Ngha hi khatalelana kasi ha susumetana liranzweni ni mitirweni yo saseka;

²⁵ na hi nga tsiki a tinkhozo ta hina khwatsi hi mukhuwo wa vanwani, kanilezi hi khongotelana; nguvunguvu kota lezi mu wonako lezaku a Siku gi tshinela kusuhani. Miti. 2:42; Rom. 13:11; Juda 19

²⁶ Hakuva loku hi onha ha womu anzhako ka kuva na hi tivile zinene, a wa ha hi kona a muphahlo wa zionho; Mitse. 15:30; 2 Ped. 2:20

²⁷ kanilezi ku sele ntsena a ku rinzela hi kuchava a kulamulwa, ni xikuhe xa nzilo lowu wu ta nga hetisa a valala. Ezek. 36:5; Zef. 3:8; 2 Tes. 1:8

²⁸ Loku a munhu a hambunyetile a nayo wa Mosi wa dawa hi kota ya wukustumunyu ga vanhu vambiri kutani vanharu, a nga zwelwi wuxinji. Deut. 17:6; Mat. 18:16

²⁹ Xana a mu alakanyi nwina lezaku i fanelwe hi kubiwa ku tshisako ko hunza lezi, loyi a kanziheleko a Nʼwana wa Nungungulu, na a kanyisa a nkhata wa xivumelwano, lowu a nga basiswa ha wona, a engeta a rukatela a Moya wa tipswalo ke? Mat. 12:31; 1 Kor. 11:29

³⁰ Hakuva ha mu tiva loyi a nge ngalo: A kuphota ni kutlhelisela zi lumba mina. Aku kambe: A Hosi yi ta yimela a vanhu va yona. Deut. 32:35, 36; Rom. 12:19

³¹ Za chavisa a ku wela mandleni ya Nungungulu a hanyako. Lu. 12:5

³² Kanilezi alakanyani a masiku ya kale, anzhako ka kuya na mu woningilwe, lawo mu nga timisela ka wona a kulweni ka hombe ka kuxaniseka; Gal. 3:4; Kol. 2:1

³³ hi tlhelo hilezi mu nga hlekulwa hi kurukwa ni zixaniso, hi tlhelo ginwani hilezi mu nga hlengela ni lava va nga xanisiswa lezo. 1 Kor. 4:9; 1 Tes. 2:14

³⁴ Hakuva mu lo va zwela wusiwana lava va nga lomu makhotsweni, kambe mu lo vumela hi kutsaka laha mu nga wutlelwa a zibya za nwina, na mu tiva lezaku mu na ni za chukwana, lezi zi te ku tsoma. Lu. 12:33; Miti. 5:41; Fil. 1:7

³⁵ Hikwalaho ngha mu nga lahlekelwi hi kutiya ka nwina, loku ku nga ni nchachazelo wa hombe. Mat. 5:12

³⁶ Hakuva za laveka lezaku mu hi ni kutimisela, kasi loku mu mahile a kuranza ka Nungungulu, mu fela ku kuma lezi zi nga tsumbisiwa. Lu. 21:19; Kol. 3:24

³⁷ Hakuva ka hi kona xikhatanyana, Zonake i ta chikela loyi a ta ngata, a nga ta hlwela. Hab. 2:3, 4; Lu. 18:8

³⁸ Loyi a lulamileko wa mina i ta hanya hi kukholwa; Kanilezi loku a tlhelela nzhako, a muhefemulo wa mina a wu tsaki ha yena. Gal. 3:11

³⁹ Kanilezi hina a hi lava va tlhelelako nzhako kulobyisweni; kanilezi hina hi vona lava va nga ni kukholwa, a ku kasi ku hanyiswa a mihefemulo ya hina. Miti. 16:31; 2 Ped. 2:20