Maheberu 1 - Tshwa Bible

Nungungulu i wulawulile hi Nʼwana wakwe.

¹ Nungungulu i lo wulawula kale hi zikhati ni zikhati ka vakokwani hi vaprofeti hi mawulawulela ma tsalangeneko; Mitse. 12:6, 8

² kanilezi a ka masiku laya ya kugumesa i wulawulile ka hina hi Nʼwana wakwe, loyi a nga mu yimisa a kuva xiga-tshomba ya zilo zontlhe, loyi a nga maha ha yena misava. Joh. 1:17; Mat. 21:38; 28:18; Rom. 8:17; Efe. 1:10

³ Loyi hi kungangamela ka wudumo gakwe, a nga mu tekelela yena wutsumbu, a khoma zilo zontlhe hi gezu ga ntamu wakwe; laha na a mahile a ku-basisiwa ka zionho, i lo tshama reveni ga xinene ga Wukulu ga le hehla. Joh. 1:4, 14; 2 Kor. 4:4; Efe. 1:20; Xip. 7:27; 1 Ped. 3:22

⁴ I lo maha wa hombe ku hunza tingelosi, kota lezi a kumileko a vito ga hombe ku hunza ga tona. Efe. 1:21; Fil. 2:9, 10

A Nʼwana ngwa hombe ku hunza tingelosi.

⁵ Hakuva ka yihi xikari ka tingelosi a ngaku ka yona: Wena u Nʼwana wa mina, Nyamutlha nzi ku belekile? Niku ngalo: Nzi tava Dadani wakwe, Yena i tava Nʼwananga. Tis. 2:7; Miti. 13:33; Xip. 5:5

⁶ Kambe laha a ta nga enghenisa a wa matewula laha misaveni i ngalo: A tingelosi tontlhe ta Nungungulu a ti mu khizamele. Rom. 8:29; Kol. 1:18; 1 Ped. 3:22

⁷ Loku a wula hi tingelosi aku ngalo: I maha tingelosi takwe tiva timheho, Ni malanza yakwe mava malangavi ya nzilo. Tis. 104:4

⁸ Kanilezi hi Nʼwana i ngalo: Nungungulu, a xitshamu xa wena xa wuhosi xa kala kupinzuka, A nhonga ya wena ya wuhosi i nhonga ya nongameto. Tis. 45:6, 7

⁹ Wena u ranzile kululama, u venga kubiha; Hikwalaho Nungungulu, a Nungungulu wa wena I ku totile hi mafura ya litsako ku hunza vanakuloni. Isa. 61:1; Miti. 4:27; 16:38

¹⁰ Niku: Hosi, hi kusanguleni u vekile a xiseketelo xa misava, A matilo i ntiro wa mandla ya wena. Tis. 102:25

¹¹ Ma ta hunza, kanilezi wena u ta tshama uku tsonzoma, Wontihe ma ta hlakala khwatsi i nguwo; Isa. 34:4; Mat. 24:35; Kuv. 21:11

¹² U ta ma songa kota nguwo, U ta ma hunzula kukotisa kuhendleletwa ka tinguwo; Kanilezi wena u ywaloye, Ni malembe ya wena ma nga ta mbhela.

¹³ Hakuva ka yihi xikari ka tingelosi a ngaku ka yona: Tshama hi le reveni ga mina ga xinene, Kala nzi veka valala va wena a kuva xikhegetelo xa mikonzo ya wena? Tis. 110:1; Mat. 22:44; Mar. 12:36; Lu. 26:42; Xip. 10:12

¹⁴ Xana tona tontlhe a hi mimoya yi tirako; leyi yi rumiwako a ku tirela lava va ta ngaga a tshomba ya kuhanyiswa ke? Mat. 18:10; Lu. 1:19; Miti. 12:7; Rom. 8:17; Jak. 2:5; 1 Ped. 3:7