Luka 8 - Tshwa Bible

¹ Ku te hi lokuloku anzhako ka lezo, yena i lo nzulanzula mitini ni zimitaneni, na a kanela ni ku tlhatlhambutela ivangeli ya mufumo wa Nungungulu, ni vakhume ni vambiri va wa hi zinwe naye.

² Ni vavasati vo kari lava va nga wa hanyisilwe ka mimoya ya kubiha ni wubabyini: Maria loyi va nge wa le Magdala, loyi ku nga huma ka yena a ntlhanu wa madimoni ni mambiri, Mat. 27:55, 56; Mar. 16:9

³ na Johana, a sati wa Kuza a nekwa ya Herodi, na Susana, ni vanwani vo tala, lava va nga va tirela hi zilo zabye.

A mufananiso wa muxwanyi.

⁴ Laha xi nga tsombene a xidlemo xa hombe, hakuva vanhu va le mitini yontlhe va loya ka yena, i lo kanela hi mufananiso, aku: Mat. 13:2; Mar. 4:1

⁵ A muxwanyi i lo huma a ku ya xwanya a mbewu; na a kari a xwanya, a tinwani timbewu ti lo wela ndleleni, ti kanzihelwa hi vanhu; ni tinyanyani ta tilo ti lo ti jowotela.

⁶ Tinwani ti lo wela maribyeni, ti su sasa ku mila, anzhako ti wuna, hakuva ku wa nga hi na nzhongo.

⁷ Tinwani ti lo wela xikari ka mizwa; ni mizwa yi lo kula zinwe nato, yi ti tlimba.

⁸ Kanilezi a tinwani ti lo wela misaveni yo saseka, ti kula, ti pswala hi ka 100. Loku a wulile lezo, i lo vitana, aku: Loyi a nga ni tindleve ta kuzwa, ngha a ingisa.

⁹ A vapizani vakwe va lo mu wutisa, lezaku a mufananiso lowu wu wula yini. Mat. 13:10; Mar. 4:10

¹⁰ I te ngalo kabye: Nwina mu nyikilwe ku tiva mifihlakalo ya mufumo wa Nungungulu; kanilezi a ka vanwani ku nyikiwa hi mifananiso, kasi hi ku wona va nga woni, hambu vazwa, va nga zi pimi. Isa. 6:9; Mar. 4:12

¹¹ A mufananiso lowu wu wula lezi: A mbewu hi mhaka ya Nungungulu.

¹² Lava va nga le ndleleni hi vona lava va zwileko; zonake kuta Satani, a ta susa a mhaka mbilwini yabye, kasi va fela ku kala va nga kholwi va hanyiswa.

¹³ Lava va nga le maribyeni, hi vona lava na va yi zwile a mhaka, va yi amukela hi kutsaka; kanilezi a va na mitsu; va su kholwa xikhatanyana, ni xikhatini xa minzhingo va su khunguvanyeka.

¹⁴ Ni leti ti weleko mizweni, hi vona lava va zwileko; kanilezi loku va ti fambela va tlimbiwa hi kukaratekela, ni kufuma ni kutsaka ka kuhanya loku; a va pswali mihanzu yi kala yi buva.

¹⁵ Kanilezi leyi yi weleko misaveni yo saseka, hi vona lava na va zwile a mhaka, va yi hlayisa hi mbilu yi nene ni yi longamileko, va pswala mihanzu hi kutimisela.

A mufananiso wa kandiya.

¹⁶ A nga kona munhu a lumekako kandiya a yi fenengeta hi xibya, kutani a yi veka lahasi ka wuriri; kanilezi i yi veka laha mezeni, kasi lava va enghenako va fela ku wona a kuwonekela. Mat. 5:15; Mar. 4:21; Xip. 11:33

¹⁷ Hakuva a ku na zilo xi fihlilweko, xi ta nga kala ku wonekeliswa; hambu ni xilo xa le xihundleni, lexi xi ta nga kala ku tibyiwa xita kubaseni. Mat. 10:26; Xip. 12:2

¹⁸ Hikwalaho tlharihani lezaku mu zwisisa kuyini; hakuva loyi a nga nazo, i ta nyikiwa zinwani; kanilezi loyi a nga hiko nazo, i ta tekelwa ni lezi a ngaku i nazo. Mat. 13:12; 25:29; Xip. 19:26

A nyine wa Jesu ni vanakulobye.

¹⁹ A nyine wa Jesu ni vanakulobye va lota kakwe, kanilezi a va zi kotangi ku tshinela ka yena hi kota ya xidlemo. Mat. 12:46; Mar. 3:31

²⁰ I lo byeliwa, aku: A nyine wa wena ni vanakuloni va yimile lahandle, va lava ku ku wona.

²¹ Kanilezi i lo hlamula, aku ngalo kabye: A nyine wa mina ni vanakulori hi vona lava va zwako a mhaka ya Nungungulu, va yi maha.

A bimbi gi miyetiwa.

²² Ku te hi ginwe ga lawo masiku, a enghena ngalaveni zinwe ni vapizani vakwe, aku ngalo kabye: A hi yeni tlhatuko wa tiva; va lo suka. Mat. 8:23; Mar. 4:35

²³ Kota lezi va nga kari va famba i lo etlela; zonake ku si huma a bhubhutsa ga mheho lomo tiveni; va wa talelwa hi mati, va hi mhangweni.

²⁴ Vona va lota kakwe, va ta mu vuxa, vaku: Hosi, Hosi, ha lova. I lo vuka, a kawuka a mheho ni kuvindluka ka mati; zi lo gawuka, kuva ni malenga.

²⁵ Aku ngalo kabye: Hi kwihi a kukholwa ka nwina ke? Va lo chava, va hlamala, vaku ka munwe ni munwani: Hi yena mani, loyi a layako a timheho ni mati, zi mu ingisa ke?

Munhu wa dimoni a hanyiswa le Gerasa.

²⁶ Zonake va lo chikela tikweni ga le Gerasa, lego gi cuwukeneko ni Galilea. Mat. 8:28; Mar. 5:1

²⁷ Laha Jesu na humele muhanzeni, i lo tlhangavetwa hi munhu wa le mutini, loyi a nga hi ni dimoni; xikhati xa hombe i wa nga ambalangi tinguwo, a nga tshami ndlwini, kanilezi a tshama zilahleni.

²⁸ Laha a nga wona Jesu, i loba huwa, awa lahasi mahlweni ka yena, aku ngalo hi gezu ga hombe: I mhaka muni nzi nga nayo na wena Jesu, Nʼwana wa Nungungulu loyi a nga Hehla-Hehla? Nza ku khongotela, u nga nzi xanisi.

²⁹ Hakuva Jesu i wa layile a moya wa kubiha a ku huma munhwini loye; hakuva wu wa mu xanisile hi kale. Va wa mu bohile hi mangenje ni makhotso, va mu lavelela; kanilezi i lo bhewula a ziboho, a yiswa xiwuleni hi dimoni.

³⁰ Jesu i lo wu wutisa, aku: Hi wena mani a vito ga wena ke? Wuku ngalo: Nzi Legioni; hakuva madimoni yo tala ma wa enghenile ka yena.

³¹ Ma lo mu khongotela lezaku a nga ma layi a kuya nkeleni wa lieswila. Kuv. 20:3

³² Ku wa hi kona a ntlhambi wa makhumba yo tala ma nga kari maga le xitsungeni; a madimoni ma lo mu khongotela lezaku a ma vumela a ku ya enghena ka wona; i lo ma vumela.

³³ Ma lo huma munhwini loye, ma ya enghena makhumbeni; ni ntlhambi wu lo tsutsumela nzhelelweni wu ya pfunwala tiveni, wu mhemba lomo.

³⁴ Laha a varisi va nga wonile lezi zi mahekileko, va lo tsutsuma va ya hlawutela mutini ni le tikweni.

³⁵ A vanhu va lo huma a ku ya wona lezi zi mahekileko; laha va nga chikela ka Jesu, va lo kuma a munhu loyi ma humileko ka yena a madimoni, na a tshamile mikonzweni ya Jesu, a ambele, a hi ni kupima kunene; va lo chava.

³⁶ Lava va nga zi wonile, va lo hlawutela lezaku i hanyisisilwe kuyini loyi a nga wa hi ni madimoni.

³⁷ A vanhu vontlhe va le Gerasa va lo mu kombela a kuva a suka ka vona; hakuva va wa khomilwe hi kuchava ka hombe; zonake Jesu i lo enghena ngalaveni, a tlhela. Mat. 8:34; Miti. 16:39

³⁸ Kanilezi a munhu ma nga humele ka yena a madimoni, i lo mu kombela lezaku a famba naye; kanilezi Jesu i lo mu tlhelisa, aku: Mar. 5:18

³⁹ Tlhelela kaya ka wena, u ya hlawutela lezaku zi kulisile kuyini lezi Nungungulu a ku maheleko zona. Yena i lo ti fambela, a yaba hungu mutini wontihe hi lezi Jesu a mu maheleko zona.

Jesu a vuxa nʼwana wa Jairo, ni kuhanyiswa ka wasati.

⁴⁰ Laha Jesu a nga wuya a xidlemo xi lo mu tlangela, hakuva vontlhe va wa mu cuwukele.

⁴¹ Zonake ku lota wanuna a vitwako Jairo, loyi a nga hi murangeli wa sinagoga; a tawa hasi mikonzweni ya Jesu, a mu khongotela a kuta le ndlwini yakwe; Mat. 9:18; Mar. 5:22

⁴² hakuva i wa hi ni nhanyana munwe ntsena a nga hi ni 12 wa malembe, loyi a nga kari a lava kufa; kanilezi laha Jesu a nga wa famba a zidlemo zi lo tsimbeketana ka yena.

⁴³ A wasati loyi a nga wa hi ni kuphophoma ka nkhata a khume ga malembe ni mambiri, na a xakele zontlhe lezi a nga hi nazo hi ku lava tinʼanga, a tsanzeka ku chumiwa, Mat. 9:20

⁴⁴ i lota hi lenzhako kakwe, a ta khumba a machakafula ya nguwo yakwe; khalekhale ku su khawuka a kuphophoma ka nkhata wakwe.

⁴⁵ Jesu i te ngalo: Himani a nzi khumbileko ke? Laha vontlhe va nga wa kanetile, Pedro ni vontlhe va nga wa hi naye, vaku: Hosi, a zidlemo za ku tsimbeketa, ni ku ku manya.

⁴⁶ Kanilezi Jesu aku ngalo: I kona a nzi khumbileko; hakuva nzi zwile a ntamu wu humele ka mina. Mar. 5:30; Xip. 6:19

⁴⁷ Laha a wasati loye a nga zi wonile lezaku a nga na ku fihlala, i lota na a rurumela, a tawa mahlweni kakwe, a wula mahlweni ka vanhu a xigelo a nga mu khumba ha xona, ni kuhanyiswa kakwe a xikavikavi xa zalezo.

⁴⁸ Jesu aku ngalo kakwe: Nwananga, a kukholwa ka wena ku ku hanyisile, famba hi kurula.

⁴⁹ Laha na a ha wulawula, ku lota munwe hi le ndlwini ya murangeli wa sinagoga, a taku: A nhanyana wa wena i file; u nga ha karati Mugonzisi. Mar. 5:35

⁵⁰ Kanilezi Jesu na a zizwa, aku kakwe: U nga chavi, kholwa ntsena, i ta hanya.

⁵¹ Laha na a chikele le ndlwini, a nga vumelangi munhu a kuva a enghena naye, ahandle ka Pedro, na Johani, na Jakobe, ni raru wa nhanyana ni nyine wakwe.

⁵² Vontlhe va wa hi xirilweni, va mu rilela; kanilezi Jesu i te ngalo: Mu nga rili; hakuva a nga fangi, i etlele. Joh. 11:11, 13

⁵³ Va lo mu hleka, na va zi tiva lezaku i file.

⁵⁴ Kanilezi yena i lo mu khoma hi canja, a vitana hi gezu ga hombe, aku: Nhanyana, vuka! Xip. 7:14; Joh. 11:43

⁵⁵ A moya wakwe wu lo wuya, a hatla a vuka; zonake Jesu i lo laya lezaku ngha a nyikiwa zakuga.

⁵⁶ Ni vabeleki vakwe va lo hlamala nguvu; kanilezi yena i lo va laya lezaku va nga byeli munhu hi lezi zi mahekileko. Mat. 8:4; 9:30; Mar. 5:43