Luka 5 - Tshwa Bible

Va kukuta zidluwani zo tala.

¹ Kota lezi a xidlemo xi nga tsimbeketana ka yena a kuzwa mhaka ya Nungungulu, na a yimile hi le tiveni ga Genesareta; Mat. 4:18 Mar. 1:16

² i lo wona tingalava timbiri ti nga wa chekamile mbhirini; kanilezi a vakukuti va wa humele ka tona, va kari va hlaza tikoka tabye.

³ I lo enghena ka yinwe ya tingalava, leyi yi nga hi ya Simoni, a mu kombela a kuva a yi nikinyela matini kutsongwani; zonake i lo tshama ngalaveni a gonzisa vanhu.

⁴ Laha na a mbhetile ku kanela aku ngalo ka Simoni: Nikinyela nonzweni, mu tlonweka tikoka ta nwina mu kukuta. Joh. 21:6

⁵ Simoni i lo hlamula, aku: Hosi, hi tirile wusiku gontlhe, a hi kumangi nchumu; kanilezi hi kota ya kulaya ka wena nzi ta tlonweka tikoka.

⁶ Laha na va mahile lezo, va lo kukuta zidluwani zo tala nguvu, laha ka kuva a tikoka tabye ti hanzuka.

⁷ Va lo khweneta a vakukuti-kulobye lava va nga hi ka yinwani ngalava, lezaku ngha vata va ta va vuna. Va lo ta tata a tingalava tontlhe, lezaku ti sangula ku mhemba.

⁸ Simoni Pedro loku a zi wonile, i lowa hasi madzolweni ya Jesu, aku: Hosi, suka ka mina, hakuva nzi muonhi. 2 Sam. 6:9; 1 Tih. 17:18

⁹ Hakuva i lo rewuka, zinwe ni vontlhe va nga wa hi naye, hi kota ya wunyingi ga zidluwani lezi va nga wa zi khomile.

¹⁰ Zi wa hi nghaho ha Jakobe na Johani, a vana va Zabedi, lava va nga hlengele na Simoni ntirweni. Jesu aku ka Simoni: U nga chavi; hakuva ku sukela lezi u ta kukuta vanhu. Mat. 4:19; Mar. 1:17

¹¹ Laha na va chekamisile tingalava tabye, va lo siya zontlhe, va mu lanzela. Mat. 4:20; 19:27; Mar. 1:18

Kuhanyiswa ka wa hlokonho.

¹² Laha a nga hi ka munwani muti, ku wa hi kona a munhu a nga tele hi hlokonho; laha a nga wona Jesu, i lowa hi nghohe yakwe, a mu khongotela, aku: Hosi, loku u zi ranza, u nga nzi basisa. Mat. 8:2; Mar. 1:40

¹³ Jesu i lo nawuluta a canja, a mu khumba, aku: Nza zi ranza, basiswa wena. Zalezo a hlokonho yakwe yi lo suka ka yena.

¹⁴ I lo mu laya a kuva a nga byeli munhu, aku: Famba, u ya ti kombisa ka mupristi, u nyikela hi kota ya kubasiswa ka wena lezi zi nga layiwa hi Mosi, kasi kuva wukustumunyu ka vona. Mat. 8:4; Levi 14:4, 10, 21, 22

¹⁵ Kanilezi hi kona gi nga hangalaka nguvu a wudumo ha yena; ni zidlemo za hombe zi lo tsombana kasi ku muzwa, ni ku hanyiswa wubabyini ga zona. Mat. 4:25; Mar. 3:7; Joh. 6:2

¹⁶ Kanilezi yena i lo famba xiwuleni, a ya khongela.

Kuhanyiswa ka loye a fileko reve ga tlhelo.

¹⁷ A siku ginwani laha Jesu a nga kari a gonzisa, ku wa tshamilewo laho a vaFarisi ni vagonzisi va nayo, lava va nga tile hi le mitini yontlhe ya le Galilea ni Judia ni Jerusalema; ni ntamu wa Hosi wu wa hi zinwe na yena a ku hanyisa.

¹⁸ A vavanuna vo kari va lo neha a munhu a nga file reve ga tlhelo na etlele lihlakeni; va ringa ku mu enghenisa ndlwini ni ku mu veka mahlweni ka Jesu. Mat. 9:2; Mar. 2:3

¹⁹ Na va nga zi kotangi ku mu enghenisa hi kota ya xidlemo, va lo kanziha hehla ka yindlu, va susa titeya, va mu relelisa ni lihlaka lakwe xikari mahlweni ka Jesu.

²⁰ Na a wona kukholwa kabye, aku ngalo: Xaka, a zionho za wena zi tsetselelwe.

²¹ A vatsali ni vaFarisi va lo sangula ku wulawulisana, vaku: Himani loyi a wulako nzhukano ke? Himani a nga tsetselelako zionho, saseka Nungungulu yece? Tis. 32:5; Isa. 43:25

²² Jesu na a tiva a maalakanyo yabye, i lo va hlamula, aku: Mu wulawulisana hikuyini a timbilwini ta nwina ke?

²³ Hi xihi xi hehukako, aku ngalo: A zionho za wena zi tsetselelwe, kutani ku ngalo: Suka, u famba?

²⁴ Kanilezi kasi mu fela ku zi tiva lezaku Nʼwana wa munhu i na ni ntamu misaveni ku tsetselela zionho, nziku ka wena u fileko reve ga tlhelo: Vuka, u teka lihlaka la wena, uya kaya ka nwina.

²⁵ Zalezo i lo vuka mahlweni ka vona, a teka lezi a nga etlele ka zona, aya kaya kakwe, na a dumisa Nungungulu.

²⁶ Vontlhe va lo rewuka, va dumisa Nungungulu, na va chava nguvu, vaku: Nyamutlha hi wonile zirewukiso.

A kuvitanwa ka Levi.

²⁷ Zonake i lo suka laho, a wona a muhlengisi, a vito gakwe hi Levi, na a tshamile wutshanwini go hlengisa, aku ka yena: Nzi lanzele. Mat. 9:9; Mar. 2:14

²⁸ Yena i lo siya zontlhe, a suka a mu lanzela.

²⁹ Na Levi i lo mu mahela a mubuzo wa hombe le ndlwini yakwe; ku wa hi ni xidlemo xa hombe xa vahlengisi ni vanwani va nga tshamile navo kugeni, Mat. 9:10; Mar. 2:15; Xip. 15:1

³⁰ A vaFarisi ni vatsali vabye va lo tsanwa, vaku ka vapizani vakwe: Hi yini mu gako ni kunwa zinwe ni vahlengisi ni vaonhi ke?

³¹ Jesu na a hlamula i te ngalo kabye: Lava va hanyako a va lavi nʼanga, kanilezi sine lava va babyako.

³² A nzi telangi ku ta vitana a valulamileko kuhunzulukeni, kanilezi a vaonhi. Mat. 9:13; 1 Tim. 1:15

A ku ti tsona zakuga.

³³ Vona vaku ngalo kakwe: A vapizani va Johani va tala ku yila ni ku khongela, zinghaho ni vapizani va vaFarisi; kanilezi a va wena voga vanwa.

³⁴ Jesu aku ngalo kabye: Ma zi kota ku maha vanghana va muteki va yila, na muteki a ha hi navo ke?

³⁵ Kanilezi a masiku ma tata, laha a muteki a ta nga suswa ka vona, hi ka lawo masiku va ta yila.

³⁶ I lo engeta a wula mufananiso ka vona, aku: A ku na munhu a hanzulako a xitiva ngubyeni yiswa, a xi rungela ngubyeni ya kale; hakuva a xitiva xiswa xi ta hanzula leyi ya kale, ni kambe xi nga ta vumelana ni nguwo ya kale. Mat. 9:16, 17; Mar. 2:21, 22

³⁷ A ku na munhu a chelako vinya giswa lomu mikwameni ya kale; loku ku mahiwa lezo a vinya giswa gi ta phuxuta mikwama, gi halaka, ni mikwama yi onheka.

³⁸ Kanilezi a vinya giswa gi yimelwe hi ku chelwa lomu mikwameni yiswa.

³⁹ A ku na munhu a nge loku a nwile a vinya ga kale, a ha lavako legi giswa; hakuva i ngalo; Legi ga kale gi nanziha ku hunza.