Luka 4 - Tshwa Bible

Jesu a ringiwa hi Satani.

¹ Jesu na a tele hi Moya wa ku Basa, i lo suka Jordani, a yiswa hi Moya le xiwuleni Mat. 4:1; Mar. 1:12

² na a ringwa hi Satani a 40 wa masiku. I wa nga gangi nchumu ka lawo masiku, kanilezi laha ma nga mbhelile i lozwa ndlala. Ekso. 34:28; 1 Tih. 19:8

³ Satani i te ngalo kakwe: Loku u hi Nhwana wa Nungungulu, laya lezaku a ribye legi gi maha xibaba.

⁴ Jesu i lo mu hlamula, aku: Ku tsalilwe ku ngalo: A munhu a nga ta hanya hi xibaba xoce. Deut. 8:3

⁵ Zonake Satani i lo mu yisa xitsungeni xo leha, a mu kombisa mifumo yontlhe ya misava hi xikhatanyana,

⁶ aku ngalo kakwe: Nzi ta ku nyika wontihe lowu ntamu, ni kungangamela ka matiko lawa; hakuva zi nyikilwe ka mina; nzi zi nyika ka loyi nzi ranzako ku mu nyika zona.

⁷ Hikwalaho, loku u nzi khizamela, zontlhe lezi zi tava za wena.

⁸ Jesu i lo mu hlamula, aku: Ku tsalilwe ku ngalo: U ta khozela Hosi Nungungulu wa wena, hi yena yece u to mu tirela. Deut. 6:13; 10:20

⁹ Zonake Satani i lo mu yisa Jerusalema, a mu yimisa xixungweni xa tempeli, aku: Loku u hi Nʼwana wa Nungungulu, ti tsikelete lahasi; Mat. 4:5

¹⁰ Hakuva ku tsalilwe ku ngalo: I ta ruma tingelosi takwe, ti ku hlayisa; Tis. 91:11

¹¹ Ni kambe: Ti ta ku angarela mawokweni ya tona, Kasi u nga gumuli a nkonzo wa wena laha ribyeni.

¹² Jesu i lo mu hlamula, aku: Ku wulilwe ku ngalo, U nga ringi Hosi Nungungulu wa wena. Deut. 6:16

¹³ Laha Satani na a mbhetile minzhingo yontlhe, i lo suka ka yena xikhatanyana, Joh. 14:30; Maheb. 4:15

Jesu a tilwa le Hoxetela.

¹⁴ Jesu i lo tlhelela Galilea hi ntamu wa Moya; ni wudumo ga yena gi la su ga fenemete tikweni gontlhe ga leyo. Mat. 4:12; Joh. 4:43; Miti. 10:37

¹⁵ I lo gonzisa masinagogeni yabye, na a dumiswa hi vontlhe.

¹⁶ Zonake i lo chikela Nazareta, laha a nga kulela kona, a enghena sinagogeni hi siku ga sabado khwatsi hi mukhuwo wakwe, a yima kasi ku gonza. Mat. 2:23; Mar. 6:1; Miti. 13:14

¹⁷ I lo nyikiwa a bhuku ga muprofeti Isaya; loku a vulule bhuku i lo kuma a wutshamu laha ku nga wa tsalilwe ku ngalo:

¹⁸ A Moya wa Hosi wu le hehla ka mina, Hakuva yi nzi totile a kuva nzi kanela a mahungu yo saseka ka lava va vumalako; Yi nzi rumile a kuba hungu hi kutlhatlhiswa ka laʼva bohilweko, Ni kutlheliselwa kuwona ka zikhumu, Ku tlhatlhisa lava va giswako mbhukutsa, Isa. 61:1

¹⁹ Ni ku tlhatlhambutela hi lembe ga tipswalo ta Hosi.

²⁰ Zonake i lo vala bhuku, a gi tlhelisela ka nanza, a tshama. Vontlhe lava va nga wa hi sinagogeni va lo mu cuwukisisa.

²¹ Yena i lo sangula ko kanela kabye, aku: Inyamutlha lowu mutsalo wu tatisekile tindleveni ta nwina.

²² Vontlhe va lo mu yimela, Va hlamaliswa hi timhaka ta tipswalo ti nga huma nonwini wakwe; vaku ngalo: Loyi a hi yena nʼwana Josefa ke? Tis. 45:2; Mat. 13:55; Joh. 6:42

²³ Aku ngalo kabye: Hakunene mu ta wula ka mina a vingu legi gi nge ngalo: Nʼanga, ti hanyise ha wece; zontlhe lezi hi zi zwileko zi tiriwa le Kapernaume, zi mahe ni laha tikweni ga nwina.

²⁴ A engeta aku: Hizinene nziku ka nwina, A ku na muprofeti a amukeliwako tikweni ga le kabye.

²⁵ Mina nziku ka nwina: Ku wa hi kona tinoni to tala ka Israeli masikwini ya Elija, laha tilo gi nga wa valilwe a malembe manharu ni ntlhanu wa tihweti hi yinwe, kuva ni ndlala ya hombe tikweni gontlhe; 1 Tih. 17:9; 18:1; Jak. 5:17

²⁶ kanilezi Elija a nga rumiwangi ni ka munwe wa vona, saseka ka wasati wa noni le Sarepita, le tikweni ga Sidoni.

²⁷ Ku wa hi kona vanyingi va hlokonho ka Israeli xikhatini xa muprofeti Elixa: kanilezi ku wa nga basiswangi hambu munwe wa vona, sine Namana wa le Siria. 2 Tih. 5:14

²⁸ Na va zi zwile lezi, vontlhe lava va nga hi lomu sinagogeni va lo tatiswa hi zanga,

²⁹ va suka, va mu hlongolela lahandle ka muti, va mu yisa gwitsini ga xitsunga lexi wu akilweko kona a muti wabye, kasi va fela ku mu susumetela lahasi.

³⁰ Kanilezi yena i lo tsemakanya xikari kabye, a ti fambela. Joh. 8:59; 10:39

Jesu a hlongola dimoni.

³¹ I lo relela aya Kapernaume, a muti wa le Galilea, a ya gonzisa vanhu hi siku ga sabado. Mat. 4:13; Mar. 1:21

³² Va lo hlamala hi kugonzisa kakwe, hakuva a timhaka takwe ti wa hi ni ntamu.

³³ Lomo sinagogeni ku wa hi kona a munhu, loyi a nga hi ni moya wa dimoni go biha; yena i lo kanyuluka hi gezu ga hombe, aku: Mar. 1:23

³⁴ Hiye! I mhaka muni hi nga nayo na wena, wena Jesu wa le Nazareta ke? U tele ku ta hi lovisa ke? Nza ku tiva lezaku hi wena mani, u Loyi wa ku Basa wa Nungungulu. Xip. 1:35

³⁵ Jesu i lo mu kawuka, aku: Miyela, u huma ka yena! Laha dimoni na gi mu wisile lahasi xikari kabye, gi lo huma ka yena, na gi nga mu mahangi nchumu.

³⁶ Vontlhe va lo rewuka, va wulawula xikari kabye, vaku: I mhaka muni leyi ke? Hakuva hi xikosikosi ni ntamu wa taya a mimoya ya kubiha, yi huma.

³⁷ A wudumo gakwe gi lo zwakala wutshanwini gontlhe ga lego tiko. A kuhanyiswa ka mukokati wa Simoni.

³⁸ Zonake i lo huma sinagogeni, a ya enghena ndlwini ya Simoni; kanilezi a mukokati wa Simoni i wa babya hi feveri yo biha; ya lo mu khongotela ku mu vuna. Mat. 8:14; Mar. 1:29

³⁹ Jesu i lo korama hehla kakwe; a kawuka feveri; yi lo mu tsika, a suka zalezo, a va tirela.

⁴⁰ Loku gi pelile, vontlhe lava va nga babya hi tinghumbe ti tsalangeneko ya lo nehiwa kakwe; yena i lo tlhateka mandla ka munwe ni munwani wa vona, a va hanyisa. Mat. 8:16

⁴¹ Ni madimoni ma lo huma ka vanyingi, na ma kanyuluka, maku: Wena u Nʼwana wa Nungungulu. Kanilezi i lo ma kawuka, a nga ma vumeli ku wulawula, hakuva ma wa zi tiva lezaku hi Kristu. Mar. 1:25, 34; 3:11

⁴² Laha gi nga wa cile, i lo huma aya wutshanwini ga xiwula; kanilezi a zidlemo zi lo mu lava, zita ka yena, zi ta mu hungala lezaku kasi a nga suki ka vona.

⁴³ Kanilezi yena aku ngalo kabye: Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.

⁴⁴ Zonake i lo ya kanela a masinagogeni ya le Galilea.