Luka 23 - Tshwa Bible

Jesu a yiswa mahlweni ka Pilatu.

¹ Zonake vona vontlhe va lo suka, va mu yisa ka Pilatu, Mat. 27:2; Mar. 15:1; Joh. 18:28

² va sangula ku mu kecara, vaku: Hi kumile loyi munhu na a kari a kucetela a tiko ga hina, a tsimbeta vanhu ku khupa khupo ka Kesari, na a ti wula lezaku yena i Kristu a hosi. Joh. 19:12; Miti. 17:7

³ Pilatu i lo mu wutisa, aku: Wena u hosi ya vaJuda ke? Yena i lo hlamula, aku: U wula zona. Mat. 27:11; 1 Tim. 6:13

⁴ Pilatu aku ngalo ka vapristi va hombe ni ka zidlemo: A nzi kumi nanzu ka loyi munhu. 1 Ped. 2:22

⁵ Kanilezi va lo hlohlotela nguvu, vaku: Wa vuxa pfilupfilu vanhwini, hi ku gonzisa Judia gontlhe; i sangule hi le Galilea, a kala a chikela ka legi wutshamu.

⁶ Kanilezi laha Pilatu a nga wa zi zwile, i lo wutisa lezaku kutani loyi munhu ngwa le Galilea.

Jesu a yiswa ka Herodi.

⁷ Laha a nga byeliwa lezaku ngwa mufumo wa Herodi, i lo mu rumela ka Herodi, loyi kambe a nga wa hi le Jerusalema hi lawo masiku. Xip. 3:1

⁸ Laha Herodi a nga mu wona Jesu; i lo tsaka nguvu; hakuva i wa xuvile hi kale a ku mu wona, hilezi i wa zwile ba yena; i lo tsumba ku wona xirewukiso na xi mahiwa hi yena. Mat. 14:1; Mar. 6:14; Xip. 9:9

⁹ I lo mu wutisa timhaka to tala, kanilezi Jesu a nga mu hlamulangi nchumu.

¹⁰ A vapristi va hombe ni vatsali na va yimile kwalaho, va lo mu kecara hi ntamu.

¹¹ Zonake Herodi ni masochwa yakwe va lo mu kanyisa, va mu tseketsela, na va mu ambexile a nguwo ya makanyekanye va lo mu tlhelisela ka Pilatu, Isa. 53:3

¹² Hi siku lego Herodi na Pilatu va lo zwanana, hakuva hi kale va wa hi nala ni nala xikari kabye. Miti. 4:27

Jesu a tlhela a yima mahlweni ka Pilatu.

¹³ Pilatu i lo tsombanyisa a vapristi va hombe ni manghanakana ya tiko ni vanhu, Mat. 27:23; Mar. 15:14; Joh. 18:38

¹⁴ aku ngalo kabye: Mu tisile loyi munhu ka mina, muku wa kucetela vanhu; kanilezi na nzi mu hlolile mahlweni ka nwina, a nzi kumangi nanzu ka yena ka zilo lezi mu mu kecarako ha zona. Mavesi 1, 2, 4

¹⁵ Ge, hambu Herodi kambe, hakuva i mu tlhelisile ka hina; langutani, a nga mahangi nchumu lexi a faneleko a kufa ha xona,

¹⁶ hikwalaho nzi ta muba, nzi mu tlhatlha. Mat. 27:61; Joh. 19:1

¹⁷ Hakuva i wa fanele ku va tlhatlhela munwe laha mubuzweni.

¹⁸ Kanilezi vontlhe va lo kanyuluka, vaku: Susa loyi munhu, u hi tlhatlhela Barabasi. Miti. 3:14

¹⁹ A munhu loye i wa valelwe paxweni hi kota ya mubango wu nga mahilwe mutini, ni kota ya kudaya.

²⁰ Pilatu i lo engeta a wulawula kabye, na a ranza ku tlhatlha Jesu;

²¹ kanilezi va lo kanyuluka, vaku: Mu belele, mu belele!

²² Pilatu aku ngalo kabye hi xikhati xa wunharu: Hikuyini, kubiha muni a ku mahileko ke? A nzi kumangi ka yena xigelo xaku i fanele kufa ha xona; hikwalaho nzi ta muba, nzi mu tlhatlha.

²³ Kanilezi vona va lo tsimbeketa hi magezu ya hombe, va kombela lezaku a belelwa; ni kukanyuluka kabye ku lo mu hlula.

A kubelelwa ka Jesu.

²⁴ Pilatu i lo tsema a mhaka lezaku a zi maheke kota xikombelo xabye. Mat. 27:24; Mar. 15:15; Joh. 19:16

²⁵ I lo tlhatlha loye a nga khotselwe paxweni hi kota ya mubango ni kudaya, loyi va nga mu kombela; kanilezi Jesu i lo mu nyikela kuranzeni kabye.

²⁶ Laha va nga kari va famba naye, va lo khoma munwe loyi a vitwako Simoni wa le Kirene loyi a nga wata hi lahandle ka muti; va lo mu rwexa a xihambano, a kuva a xi rwala hi lenzhako ka Jesu.

²⁷ A xidlemo xa hombe xa vanhu xi lo mu lanzela, zinwe ni vavasati lava va nga maha hlomulo, va mu rilela.

²⁸ Kanilezi Jesu na a hunzuluka kabye, aku ngalo: Vanhanyana va Jerusalema, mu nga nzi rileli mina, kanilezi rilelani a wutsumbu ga nwina, ni vanana va nwina;

²⁹ hakuva ma hata masiku, laha va ta ngaku ngalo: Ti katekile a tingonʼwa, ni marumbu laya ma nga belekangiko, ni mavele ma nga anwisangiko. Mat. 24:19; Xip. 21:23

³⁰ Xikhatini lexo va ta sangula ku wula ka zitsunga, vaku: Welani hehla ka hina; ni ka zitsungana: Hi khubhunyeteni. Isa. 2:19; Hos. 10:8; Kuv. 6:16

³¹ Hakuva loku va maha lezi ka sinya yo nyuka, ku taku yini ka leyi yi womileko ke? Mav. 11:31; Jer. 25:29; 1 Ped. 4:17

³² Ku wa hi ni vanwani vambiri, va nga zigohi, va fambiswa a ku ya dayiwa zinwe na Jesu. Isa. 53:12; Mat. 27:38

³³ Laha na va chikele wutshanwini gi vitwako, A xikodo, va lo mu belela kona, zinwe ni zigohi; xinwe hi le canjeni ga xinene ni xinwani ka ga xibhabha. Mat. 27:33; Mar. 15:22; Joh. 19:17

³⁴ Jesu aku ngalo: Dada, va tsetselele, hakuva a va zi tivi lezi va zi mahako. Zonake va lo avelana tinguwo takwe xikari kabye hi ku hlahluva. Mat. 5:44; Miti. 7:60; Mar. 15:24

³⁵ A vanhu va wa yimile va cuwuka; ni tihosi ti lo mu tseketsela, tiku: I hanyisile vanwani, a ti hanyise loku a hi Kristu wa Nungungulu, a hlawulilweko wakwe. Tis. 22:17; Zak. 12:10; Mat. 27:39

³⁶ Ni masochwa kambe va lo mu tseketsela, na vata kakwe, va mu nyika viniga,

³⁷ vaku: Loku wena u hi hosi ya vaJuda, ti hanyise.

³⁸ Kambe ku wa hi ni mutsalo hehla kakwe, wu nge ngalo: Loyi hi hosi ya vaJuda. Mat. 27:37; Mar. 15:26; Joh. 19:19

³⁹ Ni xinwe xa zigohi lezi zi nga wa hayekilwe laho xi lo mu rukatela, xiku: A hi wena Kristu ke? ti hanyise zinwe na hina.

⁴⁰ Kanilezi a xinwani xi lo mu kawuka, xiku: Kasi a ku chavi ni Nungungulu ke, na u wona lezaku u konekile zinwe naye?

⁴¹ Hina zi hi ringene, hakuva hi amukela a nchachazelo wa mitiro ya hina; kanilezi loyi munhu a nga gohangi nchumu.

⁴² Xi engeta xiku: Jesu, nzi alakanye loku u chikele mufunweni wa wena.

⁴³ Jesu aku ngalo kakwe: Hizinene nziku ka wena; Inyamutlha u tava na mina Paradiseni.

⁴⁴ Hi xikhati xa wuntlhanu ni xinwe ku lota munyama tikweni gontlhe, wuva kona kala a xikhati xa wuntlhanu ni mune, Mat. 27:45; Mar. 15:33

⁴⁵ hakuva a gambo gi lo maha ntima. A xisirelo xa tempeli xi lo hanzuka hi laha xikari. Mat. 27:51; Mar. 15:38

⁴⁶ Zonake Jesu i lo vitana hi gezu ga hombe, aku: Dada, nza nyikela moya wa mina mandleni ya wena. Na a wulile lezo i lofa. Tis. 31:5; 1 Ped. 2:23

⁴⁷ Laha a nduna ya zana yi nga wa wonile lezi zi mahekileko, yi lo dumisa Nungungulu, yiku: Hakunene, loyi i wa hi munhu a lulamileko. Mat. 27:54; Mar. 15:39

⁴⁸ Ni vanhu vontlhe lava va nga wa tsombene kasi ku ta wona, loku va wonile lezi zi mahekileko, va lo tlhelela kaya na va tiba zifuva.

⁴⁹ Ni vontlhe lava va nga wa tolovelene naye, ni vavasati lava va nga wa mu lanzele vata hi le Galilea, va lo yima kule, va wona lezi zilo. Tis. 38:11; Mat. 27:55; Mar. 15:40

Kulahliwa ka Jesu.

⁵⁰ Ku wa hi kona a nghanakana gi vitwako Josefa, a munhu wo saseka, a lulamileko,

⁵¹ loyi a nga vumelangiko a khungo gabye ni ximaho xabye. I wa hi wa le Arimatea, a muti wa vaJuda, loyi a nga kari a cuwukela a mufumo wa Nungungulu. Mar. 15:43; Xip. 2:25, 38

⁵² Yena i loya ka Pilatu, a ya kombela xirumbi xa Jesu.

⁵³ I lo xi chisa, a xi petsela hi nguwo ya wukene, a xi veka nkeleni lowu wu nga kehlilwe ribyeni, lowu cima ku nga vekwangiko munhu kona.

⁵⁴ Ku wa hi siku ga Kulongisela, ni sabado gi wa tshinele.

⁵⁵ A vavasati lava va nga tile naye hi le Galilea, va lo lanzela hi lenzhako, va ya wona a nkele, ni mavekela ya xirumbi xa Jesu. Xip. 8:2; Mar. 15:47

⁵⁶ Zonake va lo tlhela, va ya longisa a makha ni mafura yo nuhela. Hi siku ga sabado va lo humula kota nayo. Ekso. 20:10; Mar. 16:1