Luka 2 - Tshwa Bible

A kubelekiwa ka Jesu.

¹ Hi lawo masiku ku lo biwa hungu hi Kesari Augustu lezaku a matiko wontihe ma tsalelwa.

² A xitsalela lexi xo ranga xi lo mahiwa laha Kwiriniu a nga hi mwamangulu le Siria. Miti. 5:37

³ Vontlhe va lo famba a ku ya tsalelwa; a munwe ni munwani aya mutini wa ka kabye.

⁴ Na yena Josefa i lo suka hi le Nazareta wa le Galilea, aya Judia, a mutini wa Davida, lowu wu vitwako Betlehema, hakuva i wa hi wa yindlu ya Davida ni wa nyimba yakwe;

⁵ a ya tsalelwa zinwe na Maria, loyi a nga wutilwe hi yena; yena i wa sikile hi nyimba. Mat. 1:18

⁶ Kota lezi va nga hi leyo, a masiku yakwe ya ku hefemula ma lo chikela.

⁷ I lo beleka a nisanyana wakwe wa matewula; i lo mu petsela dzobyeni, a mu lata xigowolweni xa tihomu, hakuva a va nga hi na wutshamu lomo ndlwini ya vapfhumba.

⁸ A tikweni lego ku wa hi ni varisi va nga tshamile mikoveni, va lavelela a mitlhambi yabye ni wusiku.

⁹ A ngelosi ya Hosi yi lo woneka ka vona, ni kungangamela ka Hosi ku lo va ranzela; va wa la su ncu hi kuchava.

¹⁰ A ngelosi yiku ngalo ka vona: Mu nga chavi, hakuva nza mu bikela a mahungu ya kutsaka ka hombe, loku ku ta ngava ka vanhu vontlhe. Gen. 12:3; Mat. 28:19; Mar. 1:15

¹¹ Hi lezaku nyamutlha mu belekelwe a Muhanyisi le mutini wa Davida, loyi a nga Kristu a Hosi. Isa. 9:6; Mat. 1:21

¹² A xiwoniso xa nwina hi lexi: Mu ta ya kuma a xinwanana na xi petselwe dzobyeni, xi latiwa lomu xigowolweni xa tihomu.

¹³ Hi xitshuketi xa zalezo ku wa hi zinwe ni ngelosi a mabandla ya le tilweni, ma nga dumisa Nungungulu, maku: Gen. 28:12; Tis. 103:20; Dan. 7:10

¹⁴ A wudzunzo a give ka Nungungulu le hehla matilweni, Ni kurula misaveni xikari ka vanhu tava a xaleleko ha vona. Isa. 57:19; Joh. 3:16; Efe. 2:17; Kol. 1:20; Kuv. 5:13

¹⁵ Laha a tingelosi ti nga sukile ka vona ti tlhelela tilweni, a varisi vaku ka munwe ni munwani: A hi fambeni Betlehema, hi ya wona lexi xi mahekileko kona, lexi a Hosi yi xi tivekisileko ka hina.

¹⁶ Va lo famba hi kuhatlisa, va ya kuma Maria na Josefa, ni xinwanana na xi latilwe xigowolweni xa tihomu.

¹⁷ Laha na va xi wonile, va lo hlawutela a mhaka leyi va byelilweko yona xungetano ni xinwanana lexi.

¹⁸ Vontlhe tava va nga zizwa va lo hlamala hi timhaka leti ti wulawulileko hi varisi.

¹⁹ Kanilezi Maria i lo hlayisa tontlhe leto timhaka, a ti alakanyela mbilwini yakwe. Gen. 37:11

²⁰ A varisi va lo tlhela, na va dumisa va bonga Nungungulu hi kota ya zontlhe lezi va nga zi zwile va zi wona, khwatsi hilezi va byelilweko zona. Jesu a nyikelwa tempeleni.

²¹ Laha ma nga hunzile a ntlhanu wa masiku ni manharu kasi ku mu maha nkwera, va lo mu chula vito ga Jesu, legi a nga chulilwe hi ngelosi, a mamani wakwe na a nga se ku xura nyimba. Gen. 17:12; Levi 12:3; Mat. 1:21

²² Laha ma nga hunzile a masiku ya kubasiswa kabye hi ka nayo wa Mosi, va lo mu yisa Jerusalema, ku ya mu nyiketa ka Hosi, Levi 12:2

²³ kota lezi ku tsalilweko nayweni wa Hosi, lezaku vontlhelele a vanana va xinuna va matewula va ta basiselwa Hosi, Mitse. 3:13; 8:17

²⁴ va ya humesa a munyikelo kota lezi ku layilweko nayweni wa Hosi, ku ngalo: A patswa wa matuva, kutani mavinyani mambiri ya zipomba. Levi 12:2, 6, 8

²⁵ Ku wa hi kona a munhu le Jerusalema, loyi a vito gakwe a nga wa hi Simeoni; i wa lulamile hi kupinyama, na a langutela a kuchavelelwa ka Israeli, ni Moya wa ku Basa wu wa hi ka yena. Isa. 40:1; Mar. 15:43

²⁶ I wa wonisilwe hi Moya wa ku Basa, lezaku a nga tafa na a nga se nga wona Kristu wa Hosi. Tis. 89:48; Maheb. 11:5

²⁷ Yena i lo yiswa tempeleni hi Moya; ni laha a vapswali va nga enghenisile a nwanana Jesu, kasi va fela ku maha ha yena kota a mukhuwo wa nayo, Mat. 4:1

²⁸ Simeoni i lo mu amukela mawokweni yakwe, a bonga Nungungulu, aku:

²⁹ Makunu Hosi, tsika a nanza ga wena gi famba hi kurula, Khwatsi hi mhaka ya wena; Fil. 1:23

³⁰ Hakuva a mahlo ya mina ma wonile a kuhanyisa ka wena, Isa. 52:10; Xip. 3:6

³¹ Loku u ku longisileko kuwoneni ka matiko wontihe;

³² A kuwonekela ka ku woninga a vamatiko, Ni wudzunzo ga vanhu va wena va Israeli. Isa. 9:2; 60:1, 2, 3; Miti. 13:47

³³ A raru wakwe ni nyine va lo hlamala hi kota ya lezi zi nga wulawulilwe ha yena.

³⁴ Simeoni i lo va katekisa, aku ka Maria a nyine wakwe: Languta, loyi nwanana i yimiselwe a kuwa ni kuvuka ka vanyingi ka Israeli, ni ku maha xikombiso xi ta nga kanetiwa; Isa. 8:14; Miti. 28:22; Rom. 9:32

³⁵ ina, ni supado yi ta tlhava a muhefemulo wa wena, kasi ku wonekeliswa a maalakanyo ya timbilu tinyingi. Tis. 42:10; Joh. 19:25

³⁶ Kambe ku wa hi kona a muprofeti wa xisati, Ana nʼwana wa Fanueli, wa lixaka la Axeri. Yena i wa khosahele nguvu; i wa tekilwe na hi nhwana, a tshama ni nuna wakwe ntlhanu wa malembe ni mambiri;

³⁷ zonake i wa tshamile a hi noni a 84 wa malembe. I wa nga suki le tempeleni, na a khozela hi ku yila ni mikhongelo a wusiku ni mumu. Miti. 26:7; 1 Tim. 5:5

³⁸ Na ata hi xwalexo xikhati, i lo bonga Nungungulu, a wulawula hi nwanana ka vontlhe lava va nga cuwukela a kutirulwa ka Jerusalema.

³⁹ Laha ne va mbhetile zontlhe lezi zi layilweko nayweni wa Hosi, va lo tlhelela Galilea, vaya mutini wabye wa Nazareta.

⁴⁰ A nwanana i lo kula, a ngangamukelana hi ntamu, na a tele hi kutlhariha; ni tipswalo ta Nungungulu ti wa hi ka yena. vesi 52; Xip. 1:80

Jesu aya Jerusalema na hi mufana.

⁴¹ A vapswali vakwe va waya Jerusalema a malembe ni malembe mubuzweni wa Pasika. Ekso. 23:15, 17; Deut. 16:1, 16

⁴² Laha a nga wa hi ni khume ga malembe ni mambiri va lo kanziha kona kota a mukhuwo wa mubuzo.

⁴³ Loku va hetile a masiku ya mubuzo, na va kari va tlelela kaya, a mufana Jesu i lo sala le Jerusalema, a vapswali vakwe na va nga zi tivi.

⁴⁴ Kanilezi na va alakanya lezaku i kona xikari ka lava va nga longoloka navo, va lo famba a pfhuka wa siku; zonake va lo mu lava xikari ka maxaka yabye ni ka vativanako navo.

⁴⁵ Laha na va nga mu kumangi, va lo tlhelela Jerusalema, na va kari va mu lava.

⁴⁶ Anzhako ka masiku manharu va lo mu kuma tempeleni, na a tshamile xikari ka vagonzisi, a vazwa ni ku va wutisa ziwutiso;

⁴⁷ ni vontlhe lava va nga muzwa va lo hlamala hi kutlhariha kakwe ni mihlamulo yakwe. Mat. 7:28; Mar. 1:22; Joh. 7:15, 46

⁴⁸ Laha a vapswali vakwe na va mu wonile, va lo hlamala nguvu; a nyine wakwe aku ngalo ka yena: Nwananga, u hi mahele yini a za kunghahi ke? Hi nga wona, a raru wa wena na mina hi wa ku lava na hi xaniseka.

⁴⁹ Yena aku ngalo kabye: Mu wa nzi lavela yini ke? Xana mo wa nga zi tivi lezaku nzi fanele a kuva nzi hi ndlwini ya Dadani ke? Joh. 2:16

⁵⁰ Kanilezi a va pimangi a mhaka leyi a nga wula ka vona.

⁵¹ Zonake i lo relela navo, aya Nazareta; yena i wa va ingisa; kanilezi a nyine wakwe i lo hlayisa timhaka leti tontlhe mbilwini yakwe.

⁵² Jesu i lo enzelekelana hi kutlhariha ni kukula, ni tipswalweni mahlweni ka Nungungulu ni vanhu.