Luka 15 - Tshwa Bible

A yivu yi lahlekileko.

¹ A vahlengisi vontlhe ni vaonhi va lo tshinela ka yena ku ta muzwa. Mat. 9:10

² Kanilezi a vaFarisi ni vatsali va lo tsanwa, vaku: Yena wa amukela vaonhi, aga navo. Miti. 11:3; Gal. 2:12

³ I lo kanela mufananiso lowu kabye, aku:

⁴ Hi wihi ka nwina, a na nga ni 100 ga tiyivu, loku a lahlekelwe hi yinwe ya tona, a nga siyiko leti ta 99 le xiwuleni, a famba a ya lava leyi yi lahlekileko, a kala a yi kuma ke? Mat. 18:12

⁵ Laha na a yi kumile, i yi rwala makatleni hi kutsaka.

⁶ Zonake loku a chikele kaya, a vitana a maxaka yakwe ni vaakelane vakwe, aku ka vona: Tsakani na mina, hakuva nzi yi kumile a yivu ya mina leyi yi nga lahlekile. 1 Ped. 2:10, 25

⁷ Nziku ka nwina: Zinghaho ku tava kona kutsaka le tilweni hi kota ya muonhi munwe loyi a hunzulukako, a ku hunza loku ku nga kona hi kota ya lava va 99 wa vanhu va lulamileko, lava ku nga lavekiko kabye lezaku va hunzuluka. Xip. 5:32

A cheleni gi lahlekileko.

⁸ Kutani a wasati loyi a na nga ni khume ga macheleni, loku a lahlekelwa hi cheleni ginwe, xana a nga lumeki kandiya, a swiyela yindlu, a lavisisa a kala a gi kuma ke?

⁹ Laha na a gi kumile, i vitana a maxaka yakwe ni vaakelane vakwe, aku: Tsakani na mina, hakuva nzi gi kumile a cheleni legi nzi nga lahlekelwe ha gona.

¹⁰ Nziku ka nwina: Zinghaho ku kona kutsaka mahlweni ka tingelosi ta Nungungulu, hi kota ya muonhi munwe loyi a hunzulukako,

A nʼwana a lahlekileko.

¹¹ I lo engeta aku: A munhu wo kari i wa hi ni vana vambiri.

¹² Loyi wa nzisana i te ngalo ka raru wakwe: Dada, nzi nyike a xiavelo xa tshomba lexi xi ta ngava xa mina. A raru i lo va avanyisela a tshomba yakwe. Mar. 12:44

¹³ Anzhako ka masiku ma tsongwani, a nʼwana loyi wa nzisana i lo hlengeletela zontlhe, a famba matiko wundle; a ya hangalasa a tshomba yakwe hi kuonhakala.

¹⁴ Laha na a hangalasile zontlhe, ku lo huma a ndlala ya hombe ka tiko lego, yena a sangula ku vumala.

¹⁵ I lo famba a ya khoza ka munhu wa tiko lego; loyi a nga mu ruma masinwini yakwe a ku ya risa makhumba.

¹⁶ I lo navela ku xura hi makamba lawa ma giwako hi makhumba; kanilezi a nga nyikwangi hi munhu.

¹⁷ Kanilezi laha a nga ti alakanya, aku ngalo: Nweno a zitiri leʼzinyingi za dadani zi na ni kuga ku eneleko ni ku hunza, kasi mina nzofa laha hi ndlala!

¹⁸ Nzi ta suka nziya ka dadani, nzi ya ku ngalo kakwe: Dada, nzi onhele tilo ni mahlweni ka wena;

¹⁹ a nza ha faneli ku vitanwa aku nzi nʼwana wa wena; nzi hlaye kota munwe wa zitiri za wena.

²⁰ Yena i lo suka, aya ka raru wakwe. Kanilezi na a ha hi kule, a raru wakwe i lo mu wona, a mu zwela wusiwana; i lo tsutsuma a ya mu wukarela nhanwini, a mu pswopswa. Miti. 2:39; Efe. 2:13, 17

²¹ Zonake a nʼwana aku ngalo kakwe: Dada, nzi onhele tilo, ni mahlweni ka wena; a nza ha faneli ku vitanwa aku nzi nʼwana wa wena. Tis. 51:4

²² Kanilezi a raru wakwe i te ngalo ka malanza yakwe: Hatlisani, mu neha a nguwo yo saseka nguvu, mu mu ambexa; mu mu mehela a phera litihweni lakwe, ni zilato mikonzweni yakwe;

²³ mu neha a role gi nonileko, mu gi tlhava; hi taga, hi tsaka:

²⁴ hakuva a nwananga loyi i wa file, kanilezi i tlhelile a hanya; i wa lahlekile, makunu i kumilwe. Va lo sangula ku tsaka. Efe. 2:1; 5:14; Kuv. 3:1

²⁵ Kanilezi a nʼwana wakwe loyi wa nhonzwa i wa hi le masinwini; ku te laha a nga kari a tshinela mutini, i lozwa kuyimbelela ni kukina.

²⁶ I lo vitana ginwe ga malanza, a wutisa, xana zilo muni lezo.

²⁷ Giku ngalo kakwe: Hi nakuloni a wuyileko; a raru Wa wena i tlhavile a role gi nonileko, hilezi i wuyile na a hanya khwatsi.

²⁸ Zonake i lo zangara, a ala ku enghena; a raru wakwe i lo huma a ya mu khongotela.

²⁹ Kanilezi i lo hlamula, aku ngalo ka raru wakwe: Wangabye, nzi ku tirele a malembe laya yo tala, cima a nzi hambunyetangi a xileletelo xa wena; hambu zi hi tano, a ku nzi nyikangi ni ximhutana, lezaku nzi tsaka ni vanghana va mina;

³⁰ kanilezi a nʼwana loyi wa wena, loyi a ngaga tshomba ya wena zinwe ni zibhayi, loku a wuyile, u mu tlhavele a role gi nonileko.

³¹ A raru wakwe aku ngalo kakwe: Nwananga, wena u tshama na mina xikhati xontlhe, ni zontlhe lezi nzi nga nazo, za wena.

³² Kanilezi zi wa fanele ku va hi tsaka ni ku nengela; hakuva a nakuloni loyi i wa file, kanilezi i tlhelile a hanya; i wa lahlekile, makunu i kumilwe.