Luka 1 - Tshwa Bible

¹ Kota lezi a vanyingi va ringileko a ku hlawutela hi ku longoloxa a mahungu laya ma humeleleko xikari ka hina,

² khwatsi hilezi ma nyikilweko ka hina hi lava va nga zi wona hi mahlo, na va hi malanza ya mhaka hi kusanguleni, Mar. 1:1; Joh. 15:27; Maheb. 2:3

³ na minawu na nzi hlolisisile a timhaka tontlhe hi le kusanguleni ka tona, nzi xuvile a ku ku tsalela tona hi ku longoloxa, wena Teofilu a dumileko nguvu; Miti. 1:1; 11:4

⁴ kasi wa fela ku tiva a kutiya ka timhaka leti u gonzisilweko tona.

A xitsumbiso xa kupswalwa ka Johani.

⁵ A masikwini ya Herodi, a hosi ya le Judia, ku wa hi kona a mupristi wo kari, a vitwako Zakaria, wa ntlawa wa Abija; a sati wakwe i wa hi wa vana va ka Aroni, a vito gakwe i wa hi Elizabeti. Mat. 2:1; Neh. 12:4

⁶ Hi wumbiri gabye va wa lulamile mahlweni ka Nungungulu, va gonga yontlhe milayo ni zileletelo za Hosi, va nga hi na nanzu. Gen. 11:1

⁷ Va wa nga hi na nʼwana, hakuva Elizabeti i wa hi ngonwa, hi wumbiri gabye va wa khosahele.

⁸ Ku te laha Zakaria na tira a ntiro wa wupristi mahlweni ka Nungungulu hi xikhati xa ntlawa wakwe, 2 Kro. 8:14

⁹ kota a mukhuwo wa wupristi, i lo khonʼwa hi hlolo ku enghena tempeleni ya Hosi a hisa libani. Ekso. 30:7, 8; 1 Sam. 2:28

¹⁰ A xidlemo xontlhe xa vanhu xi wa yimile lahandle xi khongela hi xikhati xa ku hiswa libani. Levi 16:17; Kuv. 8:3, 4

¹¹ Zonake a ngelosi ya Hosi yi lo woneka ka Zakaria, na yi yimile hi tlhelo ga xinene ga alati ga ku hisela a libani; Ekso. 30:1

¹² laha a nga yi wona i lo dzuka a chava.

¹³ Kanilezi a ngelosi yi te ngalo kakwe: U nga chavi, Zakaria; hakuva a xikombelo xa wena xi zwilwe; a sati wa wena Elizabeti i ta ku pswalela a nisanyana, u ta mu chula vito gakwe ku hi Johani.

¹⁴ U tava ni kutsaka ni kunengela ha yena, ni vanyingi va ta tsakela a kubelekwa kakwe; vesi 58

¹⁵ hakuva i tava wa hombe mahlweni ka Hosi. A nga tanwa a vinya ni byala, kanilezi i ta tala hi Moya wa ku Basa kusukela na hi lomo rumbyini ga nyine wakwe. Mitse. 6:3; Jer. 1:5; Gal. 1:15

¹⁶ I ta wuyiseta a vana vanyingi va ka Israeli ka Hosi Nungungulu wabye. Mal. 4:5, 6

¹⁷ Yena i ta ranga mahlweni kakwe hi moya ni ntamu wa Elija, a kuva a hunzulusa a timbilu ta vararu ka vana vabye, lava va hluwukileko a va tlhelisa wutlharini ga valulamileko; ni ku yi longisela Hosi a vanhu va longiselweko yona. Mal. 4:5; Mat. 11:14

¹⁸ Zakaria aku ngalo ka ngelosi: Nzi ta zi tiva hi yini ke? Hakuva nzi munhu wa kale ni sati wa mina i khosahele. Gen. 17:17

¹⁹ A ngelosi yi mu hlamula, yiku kakwe: Nzi mina Gabrieli, loyi a yimako mahlweni ka Nungungulu; nzi lo runwa a ku ta wulawula na wena, ni ku ku byela a mahungu laya yo saseka. Dan. 8:16; Maheb. 1:14

²⁰ Languta, u tava mbeveve u nga zi koti ku wulawula, ku kala ku chikela a siku lego lezi zi ta nga maheka ha gona, hakuva a ku kholwangi hi timhaka ta mina, leti ti ta nga tatiseka xikhatini xa tona.

²¹ Ni vanhu va lo lavelela Zakaria, va hlamala hilezi a nga hlwela lomo tempeleni;

²² laha a nga huma i wa nga zi koti ku wulawula na vona; zonake va wa zi tiva lezaku i wonile xiwoniso lomo tempeleni; yena i lo fananisela ka vona, a tshama na hi mbeveve.

²³ Laha a masiku ya kutira kakwe na ma mbhelile, i loya kaya kakwe.

²⁴ Anzhako ka masiku laya, a sati wakwe Elizabeti i lo xura nyimba, a ti fihla ntlhanu wa tihweti, aku:

²⁵ Hi lezi Hosi yi nga nzi mahela zona a masikwini laya yi nzi cuwukileko, kasi ku susa a tingana ta mina xikari ka vanhu. Gen. 30:23; Isa. 54:1, 4

Maria a byeliwa hi kubelekiwa ka Jesu.

²⁶ Hi hweti ya wuntlhanu ni yinwe a ngelosi Gabrieli yi lo runwa hi Nungungulu a kuya mutini wa le Galilea, wu vitwako Nazareta,

²⁷ ka nhwana a wutilweko hi wanuna loyi a vito gakwe a nga Josefa, wa yindlu ya Davida; a vito ga nhwana i wahi Maria. Mat. 1:18; Xip. 2:4, 5

²⁸ A ngelosi yi lo ta enghena, yiku kakwe; Xewe, wena loyi u kumileko thomo, a Hosi yi na wena. Dan. 9:23; 10:19; Vala. 6:12

²⁹ Kanilezi i lo dzukiswa nguvu hi kuwula ka yona, na a alakanyela lezaku kuloswa loku ku wula yini.

³⁰ A ngelosi yiku ngalo kakwe: U nga chavi. Maria; hakuva u kumile thomo ka Nungungulu.

³¹ U ta xura nyimba, u beleka a nisanyana, u mu chula vito gakwe aku hi Jesu. Isa. 7:14; Mat. 1:21; Xip. 2:21

³² I tava wa hombe, i ta vitanwa aku Nʼwana wa loyi a nga Hehla-Hehla; Hosi Nungungulu i ta mu nyika a xitshamu xa wuhosi xa Davida raru wakwe. 2 Sam. 7:11; Tis. 132:11; Isa. 9:6, 7; Jer. 23:5

³³ I ta fumela yindlu ya Jakobe kala kupinzuka; a mufumo wakwe cima wu nga ta gumelwa. Dan. 2:44; Obad. 21; Mika 4:7

³⁴ Maria aku ngalo ka ngelosi: Zi ta mahisa kuyini lezo, lezi nzi nga tiviko wanuna?

³⁵ A ngelosi yi lo hlamula yiku ka yena: A Moya wa ku Basa wu tata hehla ka wena, ni ntamu wa loyi a nga Hehla-Hehla wu ta ku fenengeta; hikwalaho a nʼwana wo basa loyi a ta nga belekiwa i ta vitanwa a Nʼwana wa Nungungulu. Mat. 1:20; Joh. 1:34; Rom. 1:4

³⁶ Languta, a xaka ga wena Elizabeti, yenawu i xure nyimba ya nisanyana wukhosaneni gakwe; leyi hi hweti ya wuntlhanu ni yinwe ka yena loyi va ngaku i ngonwa.

³⁷ Hakuva a ku na xilo xi nga mu tsanzako Nungungulu. Gen. 18:14; Jer. 32:17; Rom. 4:21

³⁸ Maria aku ngalo: Hizona, nzi nanza ga Hosi; a zi maheke ka mina kota lezi u wulileko. Ni ngelosi yi lo suka ka yena,

Maria a enzela Elizabeti.

³⁹ Hi walawo masiku Maria i lo suka a famba hi kuhatlisa mutini wa ka Juda, lomu tikweni ga zitsunga;

⁴⁰ a ya enghena ndlwini ya Zakaria, a losa Elizabeti.

⁴¹ Laha Elizabeti a ngazwa kulosa ka Maria, a xinwanana xi lo tshukuma rumbyini gakwe; zonake Elizabeti i lo tala hi Moya wa ku Basa,

⁴² a tlakusa gezu, aku: U katekile wena xikari ka vavasati, yi katekile ni mbeleko ya nyimba ya wena. Vala. 5:24

⁴³ Zi maheka hikuyini lezi ka mina, lezaku a nyine wa Hosi ya mina ata ka mina ke?

⁴⁴ Hakuva laha a gezu ga kulosa ka wena na gi zwele tindleveni ta mina, a xinwanana xi lo tshukuma hi kutsaka rumbyini ga mina.

⁴⁵ U katekile wena loyi u nga kholwa, lezaku zi ta tatiseka lezi zi wulawulileko ka wena hi Hosi.

⁴⁶ Zonake Maria i te ngalo: A muhefemulo wa mina wa dumisa Hosi,

⁴⁷ Ni moya wa mina wa tsaka ha Nungungulu a Muhanyisi wa mina;

⁴⁸ Hakuva i cuwukile a wulahasi ga nanza gakwe. Kusukela lezi a zizukulwana zontlhe zi taku ngalo nzi katekile. 1 Sam. 1:11; Mal. 3:12

⁴⁹ Hakuva Loyi a nga ni ntamu i nzi mahele zilo za hombe; Gi basile a vito gakwe. Tis. 71:19; 111:9

⁵⁰ A zizukulwaneni zontlhe a wuxinji gakwe gi ka lava va mu chavako.

⁵¹ I tirile hi ntamu hi woko gakwe; I hangalasile lava va ti kukumukisako kualakanyeni ka timbilu tabye. Tis. 98:1; 33:10; 1 Ped. 5:5

⁵² I wisile tihosi zitshanwini za tona za wuhosi, A tlakusa lava va tsongwani.

⁵³ Lava va nga ni ndlala i va xurisile hi lezi zo nanziha; A tlhelisa lava va fumileko na Va nga hi na nchumu.

⁵⁴ I vunile Israeli a nanza gakwe, Na a alakanya a wuxinji gakwe

⁵⁵ Ka Abrahama ni pswalo wakwe kala kupinzuka, Kota lezi a nga tsumbisa a vararu yahina. Gen. 17:19; Tis. 132:11; Gal. 3:16

⁵⁶ Maria i lo tshama na Elizabeti a tihweti tinharu, zonake i lo tlhelela kaya.

A kubelekiwa ka Johani Mubapatizi.

⁵⁷ A xikhati xa Elizabeti xi wa chikele xa kuva a hefemula; i lo beleka a nisanyana.

⁵⁸ Laha a vaakelane vakwe ni maxaka yakwe va ngazwa lezaku a Hosi yi mu mahele a wuxinji ga hombe, va lo tsaka zinwe naye.

⁵⁹ Hi siku ga wuntlhanu ni manharu, laha va ngata ku mu maha a nkwera a nwanana, a va lava ku mu chula a vito ga Zakaria, a raru wakwe. Gen. 17:12; Levi 12:3

⁶⁰ Kanilezi a nyine wakwe i lo hlamula, aku: Kokwihi; i ta vitanwa aku hi Johani. vesi 13

⁶¹ Vaku kakwe: A nga kona wa xaka ga nwina a vitanwako hi vito legi.

⁶² Va lo wutisa raru wakwe hi ku fananisela, lezaku i ranza a ku ngha a vitanwa aku hi yena mani.

⁶³ Yena i lo kombela a pedra go tsalela kona, a tsala, aku: A vito gakwe hi Johani. Vontlhe va lo hlamala.

⁶⁴ Zalezo wu lo vululeka a nomu wakwe, ni lirimi lakwe li tlhatlheka; i lo wulawula a bonga Nungungulu. vesi 20

⁶⁵ A vaakelane vabye vontlhe va wa chava, ni timhaka tontlhe leti ti wa lo ga fenemete tikweni gontlhe ga zitsunga ga le Judia.

⁶⁶ Vontlhe lava va nga tizwa va lo ti hlayisa timbilwini tabye, vaku: Xana a nwanana loyi i ta maha wa kuyini ke? Hakuva a canja ga Hosi gi wa hi zinwe naye. Gen. 39:2; Xip. 2:19

⁶⁷ Na Zakaria a raru wakwe i lo tatiswa hi Moya wa ku Basa, a profeta, aku: Joeli 2:28

⁶⁸ A yi khesiwe Hosi, a Nungungulu wa Israeli, Hakuva i enzele a vanhu vakwe ni ku va tirula. 1 Tih. 1:48; Tis. 72:18

⁶⁹ I hi vuxela a limhonzo la kuhanyisa A ndlwini ka Davida a nanza gakwe, Tis. 132:17

⁷⁰ Kota lezi a nga tsumbisa kaleloko hi milomu ya vaprofeti vakwe vo basa,

⁷¹ A ku hi hanyisa valaleni va hina, ni mandleni ya vontlhe lava va hi vengako;

⁷² Kasi ku va mahela wuxinji a vararu va hina, Ni ku alakanya a xivumelwano xakwe xo basa, Levi 26:42; Tis. 98:3; Ezek. 16:60

⁷³ Lexi a nga funga hi ku hlambanya ka Abrahama a raru wa hina, Gen. 12:3; 22:17, 18

⁷⁴ A ku hi nyika lezaku laha na hi tlhatlhekile mandleni ya valala va hina Hi ta mu tirela na hi nga chavi nchumu, Rom. 6:18

⁷⁵ Hi kubasa ni kululama mahlweni ka yena masikwini wontihe ya hina.

⁷⁶ Na wena nwanana, u ta vitanwa aku muprofeti wa loyi a nga Hehla-Hehla, Hakuva u ta famba mahlweni ka Hosi a ku longisa a tindlela ta yona, Isa. 40:3; Mal. 3:1

⁷⁷ A kuva u tivisa vanhu va yona hi kuhanyiswa Kutsetselelweni ka zionho zabye,

⁷⁸ Hi kota ya wuxinji ga hombe ga Nungungulu wa hina, Lego a kuca ka le hehla ku ta nga hi enzela ha gona,

⁷⁹ A ku va woninga lava va tshamileko munyameni ni le nzhutini wa kufa, Ni ku rangela a mikonzo ya hina ndleleni ya kurula. Isa. 9:2; Mat. 4:16

⁸⁰ A nwanana i lo kula, a ngangamukelana hi ntamu moyeni; zonake i wa hi le xiwuleni ku kala siku lego a nga huma ha gona xikari ka vaIsraeli. Xip. 2:40