Levi 7 - Tshwa Bible

¹ Lowu hi nayo wa muphahlelo wa milanzu; wu basile nguvu.

² Laha ka wutshamu legi ya tlhavako miphahlo ya kuhiswa, hi kona laho ku ta nga tlhabyiwa kona a xifuyo xa muphahlo wa milanzu. Ku ta nwatsekelwa lomu matlhelweni ya alati hi nkhata wa kona.

³ Ku ta nyikelwa wontihe mafura, ni nkila ni mafura ya pambani,

⁴ ni tiswa timbiri ni mafura ya tona laya ma pomelako xiwunu, ni pambani wa zivinzi; a zi suswe zinwe ni tiswa.

⁵ A mupristi i ta zi hisa alatini, a ku maha muphahlo lowu wu hiselwako Jehova. Wona muphahlo wa milanzu.

⁶ A vavanuna vontlhe xikari ka vapristi va taga a nyama ya kona. Va ta yi gela wutshanwini ga kubasa; yi basile nguvu.

⁷ A muphahlo wa milanzu wa fanana ni muphahlo wa kuonha; a nayo wa kona munwe. A xifuyo xa muphahlo xi tava xa mupristi loye a nga maha nzhiho ha xona.

⁸ A mupristi loye a nyikeleko a muphahlo wa kuhiswa, a bhebhe ga xifuyo xa kona gi tava gakwe.

⁹ Zonake a miphahlo ya zakuga lezi zi bhikilweko laha khombarini, kutani lomu mbiteni, hambu lomu ka pani, yi tava ya mupristi loye a yi nyikeleko.

¹⁰ Kanilezi a miphahlo yontlhe ya zakuga leyi yi vuvilweko hi mafura, hambu loku ku hi leyi ya kuwoma, yi tava ya vontlhe vanana va Aroni, va maha lipimo linwe.

¹¹ Lowu hi nayo wa muphahlelo wa kurula, lowu wu ta nga nyikelwa ka Jehova.

¹² Loku munhu a wu nyikela kota munyikelo wa kubonga kakwe, zinwe ni muphahlo wa kubonga i ta nyikela ni zikhekhetselo zi nga hiko na comelo, na zi totilwe mafura, ni zibaba za mapa yo saseka ma katingilweko, na ma chelilwe mafura.

¹³ I ta neha kambe a zibaba zi nga ni comelo, zinwe ni xifuyo xa muphahlo wa kurula muphahlweni wakwe wa ku khesa.

¹⁴ A ka muphahlo lowu i ta pambula xibaba xinwe kada lixaka, a kuva munyikelo wa ku tlakuselwa mahlweni ka Jehova; zi ta lumba a mupristi loye a nwatsekelako alatini a nkhata wa muphahlo wa kubonga.

¹⁵ Kasike a nyama ya xifuyo xa muphahlo wa kurula xa munyikelo wakwe wa kukhesa, yi ta giwa gona siku lego va phahlelako ha gona, va nga siyi nchumu kala manziko.

¹⁶ Kanilezi loku muphahlo wu humeswa hi kota ya xifungo, kutani ku mahiwa hi kuranza kakwe ntsena, wu ta giwa gona siku lego va phahlelako ha gona, ni lezi zi ta nga sala zi ta ta giwa a siku gi lanzelako.

¹⁷ Kanilezi a nyama ya muphahlo loku yi sala kala siku ga wunharu, yi ta hiswa hi nzilo.

¹⁸ Hakuva loku yi giwa a nyama leyo ya muphahlo wa kurula, leyi yi chikeleko siku ga wunharu, loyi a nga wu nyikela cima a nga ta amukelwa, cima wu nga ta hlayelwa nchumu ka yena; zi tava zilo za manyala. Loyi a ta nga yiga i ta rwala a nanzu wa kona.

¹⁹ A nyama leyi yi khumbileko a xilo xi nga hlazekangiko, kani hi xihi, cima yi nga ta giwa; yi ta hiswa nzilweni. Kanilezi a nyama yona, ni wihi loyi a hlazekileko i ta yiga;

²⁰ kanilezi kani hi wihi loye a nga hlazekangiko, loku aga a nyama ya muphahlo wa kurula, lowu wu nga wa Jehova, a munhu loye i ta susiwa ka va ka kabye.

²¹ Loku munhu a khumbile a xilo xi nga hlazekangiko, kutani munhu a nga hlazekangiko, hambu ku hi xifuyo xi nga hlazekangiko, kutani xilo xinwani xo nyenyeza, a yaga a nyama ya muphahlo wa kurula, lowu wu nga wa Jehova, a munhu loye i ta susiwa ka va ka kabye.

²² Jehova i lo wulawula ka Mosi, aku:

²³ Byela a vanana va ka Israeli, uku: Mu ngagi mafura ya homu, hambu ya yivu, hambu ya mbuti.

²⁴ A mafura ya xifuyo xo ti fela, hambu mafura ya lexi xo dawa hi zivanza, mu ta ma tirisa ka yontlhe mi-tiro; kanilezi mu nga dzuki mu maga.

²⁵ Hakuva kani hi wihi loye a gako a mafura ya xifuyo lexi va mahako ha xona miphahlo leyi va hiselako Jehova, a munhu loye i ta susiwa ka va ka kabye.

²⁶ Mu ngagi a nkhata, hambu wa zinyanyani kutani wa zifuyo, lomu wuakelweni gontlhe ga nwina. Miti. 15:20

²⁷ Kani hi wihi loye a gako a nkhata, hambu wu hi wa lixaka muni, i ta suswa ka va ka kabye.

²⁸ Jehova i lo wulawula ka Mosi, aku:

²⁹ Byela a vanana va ka Israeli, uku: Loye a ranzako ku nyikela a muphahlo wa kurula ka Jehova, a nehe ka Jehova a xipanze lexi xi yimiselweko yena muphahlweni wa kurula.

³⁰ A nehe hi mandla yakwe yena nwinyi lezi zi ta nga nyikelwa ka Jehova akuva munyikelo wa kuhiswa. I ta neha mafura ni xifuva; a xifuva xi ta nziwitelwa mahlweni ka Jehova.

³¹ A mupristi i ta hisa mafura laha alatini, kanilezi a xifuva xi tava xa Aroni ni vana vakwe.

³² A miphahlweni ya nwina ya kurula, mu ta nyika xinyikiwo ka mupristi lexi xi pambulweko, wu nga wona a nenge wa xinene.

³³ A nʼwana Aroni loyi a ta nga nyikela a nkhata ni mafura ya muphahlo wa kurula, hi yena a ta nga nyikiwa a nenge wa xinene a kuva xiavelo xakwe.

³⁴ Hakuva a xifuva xa kunziwitela, ni nenge lowu wu pambulweko, nzi tekile ka yontlhe miphahlo ya kurula ya vanana va ka Israeli, nzi nyika mupristi Aroni ni vana vakwe; lezi zi tava nayo wa kala kupinzuka xikari ka vanana va ka Israeli.

³⁵ Hi xona xiavelo xa Aroni ni vana vakwe ka yontlhe miphahlo leyi yi hiselwako Jehova, va nga nyikwa xona a sikwini va nga wumbelwa ntirweni wa wupristi ka Jehova.

³⁶ Lexi Jehova a leleteleko a vanana va ka Israeli lezaku va va nyika, kusukela gona siku lego va totiwako ha gona, xi tava xiavelo xabye xa kala kupinzuka ka zizukulwana zontlhe.

³⁷ Lowu hi wona a nayo wa munyikelo wa kuhiswa, ni wa munyikelo wa zakuga, ni wa munyikelo wa kuonha, ni wa munyikelo wa milanzu, ni wa ku wumbela mupristi, ni wa kurula.

³⁸ Jehova i lo leletela Mosi nayo lowu le xitsungeni xa Sinai, a siku lego a nga leletela a vanana va ka Israeli a ku nyikela a miphahlo yabye ka Jehova, le xiwuleni xa Sinai.