Levi 4 - Tshwa Bible

¹ Jehova i lo wulawula ka Mosi, aku:

² Wulawula ka vanana va ka Israeli, uku: Loku a munhu a hambunyeta a munwe wa milayo ya Jehova hi kuhoheta, a maha lezi zi nga faneliko ku mahiwa, kanilezi a maha xinwe xa zona;

³ loku a hi mupristi loyi a totilweko hi mafura yo basa a onhileko, a vangele vanhu kuonha, hi kota ya zionho lezi a zi mahileko i ta nyikela ka Jehova a honwana leyi yi nga hiko na bawa, yiva muphahlo wa kuonha.

⁴ I ta neha a honwana laha nyangweni ya tabemakeli ga mutlhangano, a mahlweni ka Jehova; i ta tlhateka a canja gakwe hlokweni ya honwana, zonake a yi tlhava mahlweni ka Jehova.

⁵ A mupristi loyi a totilweko hi mafura, i ta teka a nkhata wa honwana a wu neha lomu ka tabemakeli ga mutlhangano;

⁶ zonake a mupristi i ta peta a litiho lakwe lomu ka nkhata, a nwatsekela a ntlhanu wa zikhati ni zimbiri hi nkhata mahlweni ka Jehova, na a cuwukene ni xisirelo xa wutshamu go basa.

⁷ Ni mupristi i ta tota a timhonzo ta alati ga libani mahlweni ka Jehova, legi gi nga lomu ka tabemakeli ga mutlhangano; zonake a nkhata wontihe wa honwana i ta wu chulula laha zikhatelweni xa alati ga munyikelo wa kuhiswa, legi gi nga nyangweni ya tabemakeli ga mutlhangano.

⁸ A teka a mafura wontihe ya honwana ya munyikelo wa kuonha, ni mafura laya ma pomelako marumbu, ni wontihe mafura laya ma pambeleko marumbu,

⁹ ni tiswa timbiri, ni mafura laya ma ti pambeleko lomu xiwunwini, ni pambani wa zivinzi, a wu susa laha ka tiswa,

¹⁰ kota lezi va zi pambulako ka homu ya muphahlowa kurula. Ni mupristi i ta zi hisa alatini ga munyikelo wa kuhiswa.

¹¹ A bhebhe ga honwana ni yontlhe a nyama ya kona, ni hloko ni masonzo, ni marumbu ni swanyi wa kona,

¹² yontlhe homu i ta yi yisa le handle ka wugovelo, le tsenzeleni a taleni ga khuma, a yi hisa laho hehla ka tihunyi laha nzilweni; yi hiswa laha taleni ga khuma. Maheb. 13:11

¹³ Kanilezi loku a ntlhangano wontlhe wa ka Israeli va onhile hi kuhoheta, ni loku a mhaka leyo yi fihlele ka ntlhangano, na va hambunyetile a munwe wa milayo ya Jehova hi ku maha zinwani zilo lezi zi nga faneliko ku mahiwa, va ti vangela nanzu;

¹⁴ makunu loku a kuonha loku va ku mahileko ku tibyiwa, a ntlhangano wu ta humesa a nkuzi ya muphahlo wa kuonha, va yi neha mahlweni ka tabemakeli ga mutlhangano.

¹⁵ A masingalakati ya ntlhangano ma ta tlhateka a mandla yabye hlokweni ya nkuzi mahlweni ka Jehova, zonake yi tlhabyiwa mahlweni ka Jehova.

¹⁶ Ni mupristi loyi a totilweko hi mafura i ta neha a nkhata wa nkuzi lomu ka tabemakeli ga mutlhangano.

¹⁷ Ni mupristi i ta peta litiho lakwe lomu ka nkhata, a nwatsekela ntlhanu wa zikhati ni zimbiri mahlweni ka Jehova, na a cuwukene ni veli.

¹⁸ Zonake i ta tota hi nkhata lomu ka timhonzo ta alati legi gi nga mahlweni ka Jehova, lomu ka tabemakeli ga mutlhangano, zonake a chulula wontihe a nkhata lowu wu seleko laha zikhatelweni xa alati ga muphahlo wa kuhiswa, legi gi nga nyangweni ya tabemakeli ga mutlhangano;

¹⁹ zonake i ta pambula mafura wontihe ya nkuzi a ma hisa alatini.

²⁰ I ta maha hi nkuzi leyi kota lezi va mahileko hi nkuzi ya muphahlelo wa kuonha; ku ta mahiwa zalezo ha yona. A mupristi i ta va mahela a nzhiho, zonake va ta tsetselelwa.

²¹ I ta yisa a nkuzi lahandle ka wugovelo, a yi hisa laha va hisileko a nkuzi yo ranga. Lowu muphahlelo Wa kuonha ka mutlhangano.

²² Loku yi hi hosana yi onhileko hi kuhoheta, yi hambunyeta a munwe wa milayo ya Jehova, Nungungulu wa yona, yi maha a zilo lezi zi nga faneliko ku mahiwa, yi ti vangele nanzu;

²³ ku taku loku yi tibyisilwe hi nanzu wa yona, yi ta neha a mhongo yi nga hiko na bawa, a kuva munyikelo wa yona.

²⁴ Yi ta tlhateka a canja ga yona hlokweni ya mhongo, yi yi tlhava laha wutshanwini legi va tlhavelako kona miphahlo ya kuhiswa mahlweni ka Jehova; muphahlo wa kuonha.

²⁵ Ni mupristi i ta teka a nkhata wa muphahlo wa kuonha hi litiho, a tota ha wona a timhonzo ta alati ga munyikelo wa kuhiswa, a chulula a nkhata laha xikhatelweni xa alati ga munyikelo wa kuhiswa.

²⁶ I ta hisa laha alatini mafura wontihe, kota mafura ya muphahlo wa kurula. A mupristi i ta mahela a hosana leyo a nzhiho wa kuonha ka yona, hikwalaho yi ta tsetselelwa.

²⁷ Loku ku hi munhu ntsena loyi a onhileko hi kuhoheta, a hambunyeta a munwe wa milayo ya Jehova hi ku maha lezi zi nga faneliko ku mahiwa, a kuma nanzu;

²⁸ loku a tivile a nanzu lowo, i ta humesa a mbuti ya kati yi nga hiko na bawa, hi kota ya kuonha kakwe.

²⁹ I ta tlhateka a canja gakwe hlokweni ya mbuti leyo, a tlhava a muphahlo lowo wa kuonha laha wutshanwini legi va tlhavelako kona a miphahlo ya kuhiswa.

³⁰ Ni mupristi i ta peta litiho lakwe lomu ka nkhata wa mbuti, a tota lomu ka timhonzo ta alati ga munyikelo wa kuhiswa, zonake a chulula a nkhata wontihe laha xikhatelweni xa alati.

³¹ Mupristi i ta susa mafura wontihe hi ndlela leyi va susako ha yona a mafura ya miphahlo ya kurula, zonake i ta ma hisa alatini, akuva masema yo nanziha ka Jehova. Lezo loku mupristi a maha a muphahlo wa nzhiho wa munhu loye, zonake i ta tsetselelwa.

³² Kanilezi loku a neha a yivana kasi ku maha ha yona muphahlo wa kuonha kakwe, i ta neha ya kati yi nga hiko na bawa.

³³ I ta tlhateka a canja gakwe hlokweni ya yivu ya muphahlo wa kuonha kakwe zonake a yi tlhava a kuva muphahlo wa kuonha kakwe, ka wutshamu legi ku tlhabyelwako miphahlo ya kuhiswa.

³⁴ Zonake mupristi i ta peta litiho lakwe lomu nkhateni wa muphahlo wa kuonha, a tota ha wona a timhonzo ta alati ga muphahlelo, zonake a chulula a nkhata wontihe lowu wu seleko laha ka xikhatelo xa alati.

³⁵ I ta susa mafura wontihe hi ndlela leyi va susako ha yona a mafura ya yivu ya muphahlo wa kurula, zonake a mupristi a ma hisa alatini, hehla ka miphahlelo leyi yi hiselwako Jehova. A mupristi i ta mu mahela a nzhiho wa kuonha kakwe, zonake i ta tsetselelwa.