Levi 26 - Tshwa Bible

¹ Mu nga ti maheli zifananiso za vanungungulu; mu nga ti yimiseli xifananisoxi vatlilweko, ni timhinga; ni lomu tikweni ga nwina mu nga yimisi a ribye legi gi nga ni xifananiso mu khizama ka gona, hakuva hi mina Jehova, Nungungulu wa nwina.

² Mu ta hlayisa a masabado ya mina, mu chava wutshamu ga mina ga kubasa. Hi mina Jehova.

³ Loku mu famba hi milayo ya mina, mu hlayisa zileletelo za mina, mu zi maha,

⁴ zonake nzi ta mu nyika tivula hi zikhati za tona; ni misava yi ta humesa a pfuno wa yona, ni tisinya ta lomu masinwini ti ta pswala mihanzu ya tona.

⁵ Lomu tikweni ga nwina, a xikhati xa ku hula xi ta chikela xikhatini xa ku kamela vinya; ni xikhati xa ku kamela vinya xi ta chikela xikhatini xa ku byala. Mu taga zakuga za nwina mu xura, mu tshameka khwatsi lomu tikweni ga nwina.

⁶ Nzi ta vanga kurula lomu tikweni ga nwina; mu ta etlela khwatsi na mu nga dzukiswi hi munhu. Nzi ta hetisa zivanza lomu tikweni ga nwina, ni supado yi nga ta enghena lomu tikweni ga nwina.

⁷ Mu ta hlongolisa a valala va nwina, va ta dawa hi tisupado ta nwina.

⁸ A ntlhanu wa vanhu va ka nwina va ta hlongolisa a zana ga vanhu, ni zana ga va ka nwina Va ta hlongolisa a zana ga mazana; a valala va nwina va ta dawa hi matlhari ya nwina. Jox. 23:10; 2 Kro. 14:9, 12

⁹ Nzi ta mu khatalela, nzi mu anzisa mu tala, nzi hlayisa a xivumelwano xa mina zinwe na nwina. Ezek. 37:26

¹⁰ Mu taga a mavele laya ma tshovelweko kale, kala mu ma humesa hi ku chela mavele ya maswa.

¹¹ Nzi ta aka a yindlu ya mina xikari ka nwina, ni muhefemulo wa mina wu nga ta swireka ha nwina. 2 Kor. 6:16

¹² Nzi ta fambafamba xikari ka nwina, nziva Nungungulu wa nwina, nwina muva vanhu va mina.

¹³ Hi mina Jehova, a Nungungulu wa nwina, loyi nzi mu humesileko tikweni ga le Gipite, kasi mu nga mahi tikhumbi tabye. Nzi tshovile a pingo wa makhotso ya nwina, nzi mu mahile mu famba na mu lulamile muku pswi.

¹⁴ Kanilezi loku mu nga nzi ingisi, ni loku mu nga gongi yontlhe milayo leyi,

¹⁵ ni loku mu kanyisa a zileletelo za mina, ni loku mihefemulo ya nwina yi nyenya a ziyimiso za mina, mu nga ha hlayisi milayo ya mina yontlhe, kanilezi mu tshova xivumelwano xa mina,

¹⁶ minawu nzi ta mu maha lezi: Nzi ta mu rumela a chawo, ni ndere, ni feveri, zi ta mbheta a mahlo ya nwina ni timbilu ta nwina; mu ta byala mahala timbewu ta nwina, hakuva ti ta giwa hi valala va nwina.

¹⁷ Nzi ta mu cuwukisa hi mahlo ya makayi, mu ta dawa hi valala va nwina, mu fumelwa hi lava va mu vengako; zonake mu ta tsutsuma na ku nga hi na muhlongolisi. Joba 36:12; Mav. 23:1

¹⁸ Ni loku mu nga nzi ingisi ni lezi, nzi ta mu tsayisa hi ku wuyeta ntlhanu wa makhati ni mambiri hi kota ya zionho za nwina.

¹⁹ Nzi ta tshova a kutikukumukisa ka ntamu wa nwina; nzi ta maha tilo ga nwina gi fanana ni xiketse, ni misava ya nwina yi fanana ni suku.

²⁰ Mu ta xakela mahala a ntamu wa nwina, hakuva a misava ya nwina yi nga ta humesa a pfuno wa yona, ni tisinya ta lomu tikweni ti nga ta pswala mihanzu ya tona.

²¹ Loku mu hambana na mina, mu nga nzi ingisi, nzi ta engeta nzi rumela makhombo hi ku wuyeta ntlhanu wa makhati ni mambiri, ku kheta hi zionho za nwina.

²² Nzi ta rumela zivanza xikari ka nwina; zi ta daya a vanana va nwina, zi mbheta a zifuyo za nwina, zi mu maha va tsongwani; zonake a tindlela ta nwina ti ta maha wuphupha.

²³ Loku mu nga vumeli ku lulekwa hi lezi zilo, kanilezi mu simamisa mu hambana na mina,

²⁴ minawu nzi ta hambana na nwina, nzi mu tsayisa hi ku wuyeta ntlhanu wa makhati ni mambiri hi kota ya zionho za nwina.

²⁵ Nzi ta rumela hehla ka nwina a matlhari ya ku ta photela a xivumelwano xa mina; zonake ku taku loku mu tsombene lomu mitini ya nwina, nzi rumela a ntungu xikari ka nwina, mu nyikelwa mandleni ya nala.

²⁶ Nzi ta mu wutlela a zibaba za nwina; a khume ga vavasati va ta mu bhikela zibaba za nwina lomu ka mbita yinwe, va mu phamela zibaba za nwina hi ku mu pimela; mu taga kanilezi mu nga ta xura.

²⁷ Kusukela laho, loku mu nga nzi ingisi, kanilezi mu hambana na mina,

²⁸ zonake nzi ta mu vukela hi zanga, nzi mu tsayisa kambe ntlhanu wa makhati ni mambiri hi kota ya zionho za nwina.

²⁹ Mu taga a nyama ya varisanyana va nwina, muga a nyama ya vanhanyana va nwina. 2 Tih. 6:29; Jer. 19:9

³⁰ Nzi ta hahlula matshamu ya nwina ma tlakukileko, nzi wisa a timhinga ta nwina ta gambo, nzi hoxa zirumbi za nwina hehla ka zirumbi za zifananiso za vanungungulu va nwina; ni muhefemulo wa mina wu ta swireka ha nwina.

³¹ Nzi ta hahlula a miti ya nwina, yi maha marumbi; nzi ta hangalasa matshamu ya nwina yo basa; cima nzi nga ta ha nuhetela a masema ya minyikelo ya nwina. Isa. 1:13

³² Nzi ta hangalasa a tiko, laha kaku a valala va nwina lava va tshamako ka gona va hlamala nguvu, Jer. 19:8; 25:9

³³ Na nwina nzi ta mu hangalasa lomu matikweni, nzi mu hlongorisa hi matlhari, a tiko ga nwina gi sala gi maha xiwula, ni miti ya nwina yi maha marumbi.

³⁴ Zonake a tiko gi ta ti tsakela hi masabado ya gona ka xikhati xontlhe lexo gi ta ngava gi hahlukile, na mu kari mu hangalakile matikweni ya valala va nwina; hi laho a tiko gi ta nga humula gi ti tsakela hi masabado ya gona. 2 Kro. 36:21

³⁵ Gi ta humula ka masiku wontihe ya kuhahluka ka gona, hakuva gi wa nga humulangi ka masabado ya nwina, a xikhatini lexi mu nga tshamile ka gona.

³⁶ Kasike lava va ta nga pona, nzi ta va maha va tsemeka mihlana lomu matikweni ya valala vabye. A guwa ga tluka gi ta va hlongola, va tsutsuma khwatsi hi loku va tsutsuma mahlweni ka matlhari, va tawa na va nga hlongolwi hi munhu. Isa. 30:17

³⁷ Va ta philinganyetana a munwe a wela hehla ka munwani, khwatsi hi loku va dawa hi matlhari, kanilezi na va nga hlaselwi hi munhu; cima mu nga ta yima mahlweni ka valala va nwina.

³⁸ Mu taya lova le matikweni, mu giwa hi tiko ga valala va nwina.

³⁹ Lava va ta nga sala xikari ka nwina, va ta hleleleka hi kota ya kuonha kabye le matikweni ya valala va nwina; va ta hleleleka hi kota ya kuonha ka vadadani vabye loku va seleko nako.

⁴⁰ Kanilezi loku vona va wulela kuonha kabye, ni kuonha ka vadadani vabye loku va nzi goheleko; va vumela lezaku va hambene na mina;

⁴¹ kota lezi minawu nzi hambene navo, nzi va yisa matikweni ya valala vabye; loku a timbilu tabye leti ti nga hiko minkwera ti ti solisa, ni loku va amukela zitsayiso za kuonha kabye,

⁴² zonake nzi ta alakanya a xivumelwano xa mina na Jakobe, ni kambe nzi ta alakanya a xivumelwano xa mina na Isaka, ni xivumelwano xa mina na Abrahama, nzi ta alakanya ni tiko.

⁴³ A tiko va ta gi siya goce, gi sala gi ti tsakela hi masabado ya gona, ka xikhati lexo gi ta nga tshama phanga, vona na va hi hava, na vona va taya amukela a tsayiso wa kuonha kabye, hakuva va kanyisile kuleletela ka mina, ni mihefemulo yabye yi nyenyile milayo ya mina.

⁴⁴ Kanilezi hambu loku va hi lomu ka matiko ya valala vabye, cima nzi nga ta va hoxa, hambu ni ku va tsika go kala nzi va mbheta, nzi tshova xivumelwano xa mina zinwe na vona; hakuva hi mina Jehova, Nungungulu wabye. Isa. 59:20; Rom. 11:26

⁴⁵ Hi kota ya vona nzi ta alakanya xivumelwano xa mina lexi nzi mahileko ni vararu vabye, lava nzi va humesileko tikweni ga le Gipite kuwoneni ka vamatiko, kasi nziva Nungungulu wabye. Hi mina Jehova.

⁴⁶ Lezi hi ziyimiso, ni zileletelo, ni milayo leyi Jehova a yi yimisileko ha Mosi, a xikari ka yena ni vanana va ka Israeli, le xitsungeni xa Sinai.