Levi 22 - Tshwa Bible

¹ Anzhako ka lezo Jehova i lo wulawula ka Mosi, aku:

² Byela Aroni ni vana vakwe lezaku va ti wonela ka zilo lezi zi basileko za vanana va ka Israeli, ni lezaku va nga dzuki va nyenyezisa a vito ga mina go basa, a zilweni lezi va zi basiselako mina. Hi mina Jehova.

³ Va byele ku ngalo: Kani hi wihi munhu wa lixaka la nwina, ka zontlhe zizukulwana za nwina, a ta nga tshinela ka zilo lezi zi basileko, lezi a vanana va ka Israeli va zi basiseleko Jehova, na a nga hlazekangi, loye munhu i ta loviswa mahlweni ka mina. Hi mina Jehova.

⁴ Ni wihi munhu wa lixaka la Aroni, loyi a nga ni hlokonho, kutani loyi a nga ni ntungu wo huma wubovu, a ngagi a zilo lezi zi basileko na a nga se ku hlazeka. Kanilezi ni wihi loyi a henyako xilo xi nyenyezisilweko hi kufa, ni loyi ku humileko ka yena a mbewu ya libeleko,

⁵ kutani a khumbileko a xilo xi kokakokako lexi xi mu mahileko a nga hlazeki, hambu loku a khumbile loyi a mu mahileko a nga hlazeki hi kota ya chaka gi hambeneko,

⁶ yena i tava a nga hlazekangi kala laha gambyeni; a ngagi lezi zi basileko kala nzhako na a hlambile hi mati.

⁷ Kanilezi loku a gambo gi pelile i tava a hlazekile; zonake i taga a zilo lezi zi basileko, hakuva zakuga zakwe.

⁸ A ngagi a xihari xi fileko ha xoce, hambu lexi xi delweko hi zivanza, kasi a nga ti nyenyezisi ha zona. Hi mina Jehova. Ezek. 44:31

⁹ Hikwalaho va ta hlayisa milayo ya mina, kasi va nga kumi nanzu hi kota ya lezi zilo, vafa hi kota ya ku ti nyenyezisa kabye. Hi mina Jehova loyi a va basisako.

¹⁰ Loyi a nga hiko wa ngango wa mupristi, a nga dzuki aga a zilo lezi zi basileko; a mupfhumba loyi a tshamako ka mupristi, ni xitiri lexi xi nga ni hakhelo, va ngagi a zilo lezi zi basileko.

¹¹ Kanilezi a munhu loyi a xabyilweko hi mupristi hi mali yakwe, yena i taga lezi zilo, hambu ni loyi a pswalilweko lomu ndlwini yakwe; vona va taga zakuga zakwe.

¹² Loku a nhwana wa mupristi a tekilwe hi loyi a nga hiko mupristi, a ngagi lezi zi nyikelweko a kuva muphahlo.

¹³ Kanilezi a nhwana wa mupristi loyi a nga noni, hambu loyi a hambeneko ni nuna wakwe, na a nga hi na nʼwana, loyi a tlheleleko a ndlwini ya raru wakwe, aya tshama kota xikhatini xa wuswa gakwe, yena i taga zakuga za raru wakwe; kanilezi a muluveli ngha a ngagi.

¹⁴ Loku munhu aga lezi zi basileko hi kuhoxisa, i ta tlhelisa ka mupristi na a zi engetele hi xipanze xa wuntlhanu.

¹⁵ A vapristi va nga mahi zahava hi zilo lezi zi basileko za vanana va ka Israeli, lezi va zi nyikelako ka Jehova,

¹⁶ kasi va ti rwexa nanzu laha na vaga a zilo zabye za kubasa; hakuva hi mina Jehova loyi a va basisako.

¹⁷ Jehova i lo engeta a wulawula ka Mosi, aku;

¹⁸ Byela Aroni ni vana vakwe, ni vontlhe a vanana va ka Israeli, uku ka vona: Kani hi wihi wa yindlu ya ka Israeli, kutani wa valuveli va ka Israeli, loyi a nyikelako ka Jehova a munyikelo wa kuhiswa, wa ku tatisa xifungo lexi a fungileko ka Jehova, hambu ni wihi munyikelo wa kuranza kakwe,

¹⁹ loku a lava akuva a amukeleka, i ta teka a xifuyo xa matsune lomu ka ntlhambi wa tihomu, kutani lomu ka ntlhambi wa tiyivu, kutani wa timbuti, na xi hi xifuyo xi nga hiko na bawa.

²⁰ Mu nga nyikeli hi xihari xi nga ni bawa, hakuva mu nga ta amukeleka hi muphahlo wo maha lezo.

²¹ Loku munhu a nyikela ka Jehova a muphahlelo wa kurula hi xifuyo xa hombe kutani xa xitsongwani, a ku tatisa xifungo xakwe ka Jehova, kutani munyikelo wa kuranza kakwe, i ta nyikela xifuyo lexi xi mbheleleko, kasi xa amukeleka; ngha xi nga hi na bawa. Mal. 1:8, 13

²² Mu nga nyikeli ka Jehova a xifuyo lexi xi nga xikhumu, hambu xi tshovekileko xiro, hambu xa kulamala, hambu lexi xi nga ni tihlungu, hambu lexi xi nga ni xigwere, hambu loku xi hi ni sakaveti; mu nga mahi ha zona miphahlelo ya ku hiselwa Jehova laha alatini ga Jehova.

²³ Loku u hi ni homu, kutani i yivu yi nga ni xiro xo leha, kutani xo koma, u nga yi nyikela hi kuranza ka wena, kanilezi yi nga ta amukeleka kota muphahlo wa xifungo.

²⁴ Mu nga nyikeli ka Jehova a xifuyo lexi xi thenilweko hi ku pswinyiwa, kutani hi ku gandliwa, kutani ku tshobyiwa, hambu ku tsemiwa; mu nga mahi za kunghahi lomu tikweni ga nwina.

²⁵ Hambu ni xifuyo lexi xi humako mandleni ya valuveli, mu nga nyikeli a zakunghahi ku maha zakuga za Nungungulu wa nwina; hakuva zi bihile, zi na ni xixovo; cima zi nga ta amukeleka loku mu zi nyikela.

²⁶ Jehova i lo wulawula kambe ka Mosi, aku:

²⁷ Loku ku pswaliwa xirolana, kutani xiyivana, kutani ximhutana, xi ta tshama ni nyine wa xona ntlhanu wa masiku ni mambiri, zonake kusukela lego siku, loku xi nyikelwa ku maha muphahlelo wa ku hiselwa Jehova, xi ta amukeleka.

²⁸ Mu nga dayi xifuyo ni nʼwana wa xona hi siku ginwe, hambu yi hi homu, kutani yivu.

²⁹ Loku mu ranza ku nyikela ka Jehova a muphahlelo wa kubonga, nyikelani hi ndlela ya kululama, kasi mu ta amukeleka.

³⁰ A wu giwe hi siku gwalego; mu nga siyi nchumu kala siku gi gamelako. Hi mina Jehova.

³¹ Hikwalaho hlayisani milayo ya mina mu yi ingisa. Hi mina Jehova.

³² Mu nga nyenyezisi a vito ga mina go basa, hakuva nzi ta basiswa xikari ka vanana va ka Israeli.

³³ Hi mina Jehova loyi a mu basisako, loyi a mu humesileko tikweni ga le Gipite, kasi nzi maha Nungungulu wa nwina. Hi mina Jehova.