Levi 2 - Tshwa Bible

¹ Loku a munhu a nyikela ka Jehova a munyikelo wa zakuga, a munyikelo lowo wu tava wa mapa yo saseka; i ta ma chela mafura ni libani lo nuhela.

² I ta zi yisa ka vapristi, a vana va Aroni; zonake va ta nusa a canja ga mapa laya yo saseka, ma chelilweko mafura, ni libani lo nuhela, zonake a mupristi a zi hisa alatini kota xialakanyiso, wuva muphahlelo wa nzilo wa masema yo saseka ka Jehova.

³ Lezi zi seleko ka munyikelo, za Aroni ni vana vakwe. Zilo lezi zi basileko nguvu xikari ka miphahlelo leyi yi hiselwako Jehova.

⁴ Loku u nyikela a munyikelo wa zakuga zi bhikilweko khombarini, u ta teka a mapa yo saseka, u ma vuva hi mafura, u maha zikhekhetselo zi nga comelwangiko, ni zimbunzu lezi zi nga hiko na comelo, zi totilweko mafura.

⁵ Loku a munyikelo wa wena wu hi wa lezi zi katingwako lomu panini, wu tava mapa yo saseka ma vuvilweko hi mafura, na ma nga hi na comelo.

⁶ U ta zi khemelela, u zi chela mafura; munyikelo wa zakuga.

⁷ Loku a munyikelo wa wena wu hi wa lezi zi bhikiwako lomu mbiteni, wu tava wa mapa yo saseka, ma bhikilweko hi mafura.

⁸ U ta neha ka Jehova a munyikelo wa zakuga, lowu wu ta nga longiswa hi leti tindlela; wu ta nyikiwa mupristi, yena i ta zi yisa laha alatini.

⁹ A mupristi i ta pambula a munyikelo wa xialakanyiso ka wona, a zi hisa alatini, wu tava muphahlelo wa nzilo, wu nga ni masema yo nanziha ka Jehova.

¹⁰ Lezi zi seleko ka munyikelo, za Aroni ni vana vakwe; zilo lezi zi basileko nguvu xikari ka miphahlo leyi yi hiselwako Jehova.

¹¹ A minyikelo yontlhe ya zakuga leyi mu nyikelako ka Jehova, yi nga dzuki yiva ya zibaba zi comelweko, hakuva mu nga dzuki mu hisela Jehova a comelo ni wulombe laha maganzelweni.

¹² Mu ta zi neha ka Jehova zinwe ni munyikelo wa mihanzu yo ranga, kanilezi ngha zi nga hiswi laha alatini, khwatsi hi munyikelo wa masema yo nanziha. 2 Kro. 31:5

¹³ Yontlhe minyikelo ya wena ya zakuga u ta lunga hi munyu; wu nga dzuki wu vumaleka a munyu wa xivumelwano xa Nungungulu wa wena laha ka munyikelo wa wena; u ta lunga hi munyu yontlhe minyikelo ya wena. Ezek. 43:24

¹⁴ Loku u nyikela ka Jehova a munyikelo wa mihanzu yo ranga, u ta nyikela miponwani yiswa leyi yi wocilweko nzilweni, na yi hi miponwani yi nene leʼyi tlokolilweko.

¹⁵ U ta wu chela mafura, u veka ni libani lo nuhela; hi wona a munyikelo wa zakuga.

¹⁶ A mupristi i ta pambula a tinzhoho leti ti tlokolilweko, a hisa xipanze xa tona; muphahlo lowu wu hiselwako Jehova.