Levi 12 - Tshwa Bible

¹ Jehova i lo wulawula ka Mosi, aku:

² Byela a vanana va ka Israeli, uku: Loku wasati a xura nyimba, a beleka mufana, i tava a nga hlazekangi ntlhanu ni mambiri masiku, i tava a nga hlazekangi kota masikwini ya tihweti takwe.

³ Hi siku ga wuntlhanu ni manharu, a nwanana i ta mahiwa nkwera; Gen. 17:12; Lu. 2:21; Joh. 7:22

⁴ na yena i ta tshama kaya 33 wa masiku lomu ka wungoza gakwe na kari a basiswa; na a nga khomi a xilo xa lezi zi basileko, na a ngayi lomu wutshanwini go basa, kala ku tatiseka a masiku ya kubasiswa kakwe.

⁵ Kanilezi loku a belekile a nhanyana, i tava a nga hlazekangi maviki mambiri, kota masikwini ya tihweti takwe; zonake i ta simamisa a tshama laha kaya 66 wa masiku, hi kota ya wungoza gakwe, na a kari a basiswa.

⁶ Zonake loku ma mbhelile a masiku ya kubasiswa kakwe, hambu loku a hi mufana kutani nhanyana, i ta neha ka mupristi laha nyangweni ya tabemakeli ga mutlhangano a yivana ya lembe ginwe a wukale, yi tava ya muphahlo wa kuhiswa, ni vinyani ga xipomba kutani i tuva, kasi ku maha a muphahlelo wa kuonha. Lu. 2:22

⁷ A mupristi i ta zi nyikela mahlweni ka Jehova, a mu mahela muphahlo wa nzhiho, zonake i ta basiswa lomu ka wungoza gakwe. Lowu hi nayo wa lava va belekako, hambu loku a hi nwanana wa mufana, hambu wa nhanyana.

⁸ Kanilezi loku a nga zi koti ku kuma a yivana, i ta neha matuva mambiri, kutani mavinyani mambiri ya zipomba; ginwani ga muphahlelo wa kuhiswa, ni ginwani ga muphahlelo wa kuonha. A mupristi i ta mu mahela a muphahlo wa nzhiho, zonake i ta basiswa.