Levi 11 - Tshwa Bible

A milayo xungetano ni lezi zi nga hlazekangiko.

¹ Jehova i lo wulawula ka Mosi na Aroni, aku ka vona:

² Byelani a vanana va ka Israeli, muku: A zihari lezi mu ta ngaga xikari ka zihari zontlhe lezi zi nga laha misaveni, hi lezi:

³ Zontlhe lezi zi nga ni khanzu ga zinyonzwani zimbiri, lezi anzhako na zi gile zi bhisako zi hlafunha ga wumbiri, mu taga.

⁴ Kanilezi lezi mu to kala kuga hi lezi: Lezi zi hlafunhako khati ginwe, ni lezi zi nga ni khanzu ga zinyonzwani xinwe; a kameli hambu lezi gi hlafunhetako, a gi na khanzu ga zinyonzwani zimbiri. Ga yila ka nwina.

⁵ Ni manjhengwe hambu lezi a hlafunhetako, kanilezi a nga na zinyonzwani; wa yila ka nwina.

⁶ Ni vundla hambu lezi wu hlafunhetako, kanilezi a wu na khanzu ga zinyonzwani zimbiri; wa yila ka nwina.

⁷ Ni khumba, hakuva hambu lezi gi nga ni khanzu ga zinyonzwani zimbiri, kanilezi a gi hlafunheti; ga yila ka nwina.

⁸ Mu ngagi a nyama ya zona, hambu ni ku khumba zirumbi za zona; zi yilile ka nwina.

⁹ Xikari ka lezi zi nga lomu matini, mu taga lezi zi nga ni zipapilo ni magwaru: lezi za lomu matini ya bimbi, ni lomu micongweni: lezo ganani.

¹⁰ Kanilezi zontlhe lezi zi nga hiko na zipapilo ni magwaru, lezi za lomu bimbini ni lomu micongweni, xikari ka zontlhe lezi zi makanyako lomu matini, ni zontlhe lezi zi hanyako lomu matini, za yila ka nwina.

¹¹ Zi tava zo yila ka nwina; mu nga dzuki muga a nyama ya zona, hambu ni ku henya a zirumbi za zona; za yila ka nwina.

¹² Zontlhe lezi zi nga lomu matini, zi nga hiko na zipapilo ni magwaru, zi tava zo yila ka nwina.

¹³ Lezi zi ta nga yila xikari ka zinyanyani, hi lezi; mu nga dzuki mu ziga hakuva za yila: a gama, ni likotani, ni ximhungu.

¹⁴ Ni kiti, ni likoti hi tixaka ta lona;

¹⁵ ni zikunguwa zontlhe hi tixaka ta zona;

¹⁶ a mbhuwu, ni yinjo, ni nyawungonzwani, ni mangavi hi tixaka takwe tontlhe;

¹⁷ a xikotlwani ni gotso, ni xihuhuluhuhu;

¹⁸ ni khuhunhu, ni gumba, ni mbewulwani;

¹⁹ ni mariyani, ni maxomuxomu hi tixaka takwe tontlhe, ni dema, ni mangavilani.

²⁰ Zontlhe lezi zi fambako hi mune wa milenge na zi hi ni tipapa, za yila ka nwina.

²¹ Kanilezi xikari ka lezi zi purumako, lezi nga ni mune wa tizonzo, lezi zi nga ni milenge hehla ka tizonzo leyi zi tlulako ha yona laha misaveni, lezo mu taga.

²² A xikari ka zona mu taga tontlhe tixaka ta humbi, ni tixaka tontlhe ta timhera, ni tixaka tontlhe ta zidodwani, ni vanyatote hi tixaka tabye.

²³ Kanilezi a zinwani ziharana zi purumako, zi fambako hi mune wa tizonzo, za yila ka nwina.

²⁴ Na zona zi ta mu nyenyezisa; hakuva kani hi wihi loye a khumbako a xirumbi xa zona, i tava a nga hlazekangi kala gambyeni.

²⁵ Kanilezi kani hi wihi loye a rwalako a xirumbi xa zona, i ta hlaza tinguwo takwe; ni kambe i tava a nga hlazekangi kala gambyeni.

²⁶ Zontlhe zihari, hambu lezi zi nga ni makhanzu ya zinyonzwani zimbiri, ni lezi za makhanzu ya xinyonzwani xinwe, lezi zi nga hlafunhetiko, zi yilile ka nwina; kani hi wihi loye a zi khumbako, i tava a nga hlazekangiko.

²⁷ Zontlhe lezi zi fambako hi zirenze, a xikari ka zontlhe zihari za mune wa milenge, zi yilile ka nwina,

²⁸ Kani hi wihi loyi a khumbako a zirumbi za zona, i ta hlaza tinguwo takwe, hambu lezo i tava a nga hlazekangiko kala laha gambyeni; lezi zihari za yila ka nwina.

²⁹ Xikari ka lezi zitsongwani zi kokakokako laha misaveni, lezi zi yilako ka nwina hi lezi: nyacoloti, mabhonyani hi tixaka ta wona, a futsu hi tixaka ta yona,

³⁰ tshukunyani, ni kwahle, ni cibaratata, ni halavumba, ni livani.

³¹ Hi zalezi zi yilako ka nwina, xikari ka zontlhe lezi zi kokakokako laha misaveni. Kani hi wihi a ta nga zi khumba na zi file, i tava a nga hlazekangi kala laha gambyeni.

³² Loku a xihari xa kunghahi xi file, xi dzuka xi wela lomu ka zilo, zi tava zi nga hlazekangi, hambu loku zi wela lomu ka zibya lezi mu gelako ka zona, kutani ka nguwo, kutani ka bhebhe, kutani ka sakwa, hambu ni ka xihi lexi mu tirako ha xona, xi ta hlaziwa, lomu matini, hambu lezo xi tava xi nga hlazekangi kala gambyeni; zonake xi tava xi hlazekile.

³³ Kasike loku a xinwe xa zona xi dzuka xi wela lomu ka xibya xa wumba, zontlhe lezi zi nga lomo xibyeni zi tava zi nyenyezile, mu ta faya ni xibya lexo.

³⁴ Ni zakuga zontlhe lezi zi nga ka xona, zi nyenyezile; ni zakunwa zontlhe, hambu loku zi hi lomu ka xibya xo maha lezo, za yila ka nwina.

³⁵ Ka zontlhe zilo, loku za nga welwa hi zirumbi za zona, zi tava zi yilile. Hambu loku ku hi khombari, kutani xitofu, a zi khungumulwe; zi nyenyezile, zi tava lezi zi yilako ka nwina.

³⁶ Kanilezi a xibuka, kutani i hlowo leyi yi teleko hi mati, zona zi ta sala zi hlazeka; hambu lezo, loyi a khumbako a xirumbi xa zona lezi zi fileko, i tava a nga hlazekangi.

³⁷ Kasi loku ku wile a xirumbi xa xona le hehla ka mbewu leyi yi byalilweko, yi ta tshama yi hlazekile.

³⁸ Kanilezi loku a mbewu yi lovekilwe, zonake ku dzuka ku wela a xirumbi xa lezi zi fileko, a mbewu yi tava leyi yi yilako.

³⁹ Loku kufa a xifuyo xa nwina lexi mu gako, loye a khumbako a xirumbi xa xona, i tava a nga hlazekangi kala gambyeni.

⁴⁰ Loye a ta ngaga a nyama ya xirumbi xa kona, i ta hlaza a tinguwo takwe, hambu lezo i tava a nga hlazekangi kala laha gambyeni. Ni loye a ta nga rwala a xirumbi xa kona, i tava a nga hlazekangi kala laha gambyeni.

⁴¹ Zontlhe ziharana lezi zi kokakokako laha misaveni za yila, ngha zi nga giwi.

⁴² Hambu lezi zi kokakokako hi rumbu, hambu lezi zi fambako hi mune wa milenge, kutani lezi zi fambako hi milenge yo tala, mu nga zigi, hakuva za yila.

⁴³ Mu nga ti nyenyezisi hi zontlhe zikokakoka; mu nga ti nyenyezisi hi ku zi khumba; mu ngava lava mu nga hlazekangiko.

⁴⁴ Hakuva hi mina Jehova, Nungungulu wa nwina; hikwalaho mu ta ti basisa, muva lava va basileko, hakuva mina nzi basile. Mu nga ti nyenyezisi mimiri ya nwina hi ziharana lezi zi kokakokako laha misaveni. 1 Ped. 1:16

⁴⁵ Hakuva hi mina Jehova loyi a mu humesileko tikweni ga le Gipite, kasi nzi fela maha Nungungulu wa nwina. Hikwalaho basani, hakuva mina nzi basile.

⁴⁶ Lowu hi nayo wu vekilweko xungetano ni lezi zi fambako hi mune wa milenge, ni zinyanyani, ni zilo zontlhe lezi zi hanyako lomu matini, ni zilo zontlhe lezi zi kokakokako laha misaveni.

⁴⁷ Lezaku kasi mu fela ku hambanyisa xikari ka lezi zi nyenyezileko, ni lezi zi hlazekileko, ni zihari lezi zi giwako ni lezi zi nga giwiko.