Levi 10 - Tshwa Bible

¹ A vana va Aroni, Nadabe, na Abihu, loyi ni loyi i lo teka a xibya xakwe xa ku hisela libani, va lo oka a nzilo ka zona, va vekela a libani hehla ka zona, zonake va lo nyikela mahlweni ka Jehova a nzilo wu nga hiko wona, va maha lezi a nga va leletelangiko.

² Zoriake a nzilo wu lo huma hi le mahlweni ka Jehova, wu va hisa vafa mahlweni ka Jehova.

³ Zonake Mosi aku ka Aroni: Lezi hi lezi Jehova a leleteleko, aku ngalo: Nzi ta basiswa hi lava va tshinelako ka mina, nzi dumiswa mahlweni ka vanhu vontlhe. Kanilezi Aroni i la su tiwitiwi bhi!

⁴ Zonake Mosi i lo vitana Mixaeli na Elizafane, a vana va Uzieli, a rarutsongwani wa Aroni, aku ka vona: Tshinelani mu susa vanakuloni mahlweni ka wutshamu gi basileko, mu va yisa lahandle ka wugovelo.

⁵ Va lo tshinela, va va petsela lomu ka tinguwo tabye, va va yisa le handle ka wugovelo, kota lezi Mosi a va layileko.

⁶ Mosi aku ka Aroni, na Eliazare, na Itamare, vana va Aroni: Mu nga fununguli tihloko ta nwina, hambu ni ku hanzula tinguwo ta nwina, mu ngafa, mu neha a zanga hehla ka ntlhangano wontihe. Kanilezi a vamakabye va nwina, a yindlu ya ka Israeli, hi vona va ta nga rila hi kota ya nhova leyi yi hisilweko hi Jehova.

⁷ Kambe mu nga dzuki mu huma laha nyangweni ya tabemakeli ga mutlhangano, mu ngafa; hakuva a mafura ya ku tota ka Jehova ma le hehla ka nwina. Zonake va lo maha kota lezi Mosi a va layileko.

⁸ Jehova i lo engeta a byela Aroni, aku:

⁹ U nganwi a vinya ni byala, wena ni vana va wena, loku mu ta enghena lomu ka tabemakeli ga mutlhangano, mu ngafa. Lowu i nayo wa kala kupinzuka, wa zizukulwana zontlhe. Ezek. 44:21; 1 Tim. 3:3; Tit. 1:7

¹⁰ Kasi mu ta zi kota ku hambanyisa lezi zi basileko ni lezi zi nga basangiko, ni lezi zi nga hlazekangiko ni lezi zi hlazekileko;

¹¹ ni lezaku kasi ma zi kota ku gonzisa a vanana va ka Israeli a milayo yontlhe ya Jehova, leyi a leleteleko hi nomu wa Mosi.

¹² Mosi i lo wulawula ka Aroni, na Eliazare, ha Itamare, a vana vakwe lava va seleko, aku: Tekani lezi zi seleko za muphahlo wa zakuga, ka miphahlo ya ku hiselwa Jehova, muga na zi nga hi na comelo, mu gela kusuhani ni alati, hakuva zi basile nguvu.

¹³ Mu zi gela laha wutshanwini go basa, hakuva xiavelo xa wena ni vana va wena, zi humako lomu ka miphahlo ya ku hiselwa Jehova, hakuva nzi leletelwe kota lezo.

¹⁴ Kasike loku ku hi xifuva lexi xi nziwitelweko, ni nenge lowu wu pambulweko, u taya ziga wutshanwini gi hlazekileko, wena ni vana va wena va xinuna ni va xisati, hakuva mu nyikilwe akuva xiavelo xa wena ni vana va wena, zi humako miphahlweni ya kurula ya vanana va ka Israeli.

¹⁵ Va ta neha ni mafura laya ma faneleko ku hiswa hi nzilo, ni nenge lowu wu pambulweko, ni xifuva lexi xi nziwitelweko, va zi nziwitela mahlweni ka Jehova, zonake zi tava za wena ni vana va wena; i nayo wa kala kupinzuka, kota lezi Jehova a leleteleko.

¹⁶ Mosi i lo wutisisa hi lezi va mahileko hi mhongo ya muphahlo wa kuonha; languta, yona yi wa hisilwe. Hilezo i lo holovela Eliazare na Itamare, a vana va seleko va Aroni, aku ka vona:

¹⁷ Hikuyini mu nga kala kuga a muphahlo wa kuonha laha wutshanwini ga ku basa ke? Hakuva zilo za kubasa nguvu; mu nyikilwe zona kasi mu fela ku rwala kuonha ka ntlhangano, mu va mahela a nzhiho wa wuyiselelo mahlweni ka Jehova.

¹⁸ Cuwukani, a nkhata wa xifuyo xa muphahlo a wu yiswangi laha wutshanwini go basa, hikwalaho mu wa fanele a ku yiga laha wutshanwini go basa, kota lezi nzi mu leleteleko.

¹⁹ Zonake Aroni aku ka Mosi: Languta, inyamutlha va nyikele a muphahlo wa kuonha kabye, ni muphahlo wabye wa kuhiswa mahlweni ka Jehova; makunu lezi nzi humelweko hi za kunghahi, inyamutlha loku nzi wa gile a muphahlo wa kuonha, xana zi tava zi xalalisa mahlweni ka Jehova ke?

²⁰ Laha Mosi na zwile timhaka leti, i lo xalala.