Kuvululelwa 8 - Tshwa Bible

A ntlhanu wa mimpunzu ni mimbiri.

¹ Laha yi nga namula a xifungo xa wuntlhanu ni zimbiri, ku lo miyetwa le tilweni a xipimo xa khihlanya ga hora. Xip. 6:1

² Zonake nzi lo wona a ntlhanu wa tingelosi ni timbiri leti ti yimileko mahlweni ka Nungungulu, ti nyikwa a ntlhanu wa mimpunzu ni mimbiri. 2 Kro. 29:25-28; Mat. 18:10

³ Ku lota yinwani ngelosi yi ta yima laha alatini, na yi hi ni xibya xa nzalama xo hisela kona mpepo; yi lo nyikiwa mpepo wo tala, lezaku yi wu patsa ni mikhongelo ya vobasa vontlhe laha alatini ga nzalama legi gi nga mahlweni ka xitshamu xa wuhosi. Ekso. 30:1; Xip. 5:8; 6:9

⁴ A musi wa mpepo wu lo huma canjeni ga ngelosi, wu tuvikela mahlweni ka Nungungulu zinwe ni mikhongelo ya vobasa. Tis. 141:2; Lu. 1:10

⁵ Zonake a ngelosi yi lo teka a xibya, yi xi tatisa hi nzilo wa laha alatini, yi xi hoxa misaveni; laho ku wa hi kona a kudzinza, ni kuvuma, ni zingwalangwanza, ni kutsekatseka ka misava. 2 Sam. 22:8; 1 Tih. 19:11; Miti. 4:31

⁶ Ni ntlhanu wa tingelosi ni timbiri leti ti nga hi ni ntlhanu wa mimpunzu ni mimbiri ti lo ti longisela a kuba.

⁷ Leʼyo ranga yi loba a mpunzu wa yona, zonake kuna vula ya maralala ni nzilo, na zi patsilwe ni nkhata, zi hoxwa misaveni. Ku lo hiswa a xipanze xa wunharu xa misava, ku hiswa ni xipanze xa wunharu xa tisinya, ku hiswa ni byanyi gontlhe go nyuka. Isa. 2:13; Ezek. 38:22; Xip. 16:2

⁸ Ni ngelosi ya wumbiri yi loba mpunzu wa yona, ku lo woneka xo kari xo khwatsi xitsunga xa hombe xi vurako nzilo xi hoxwa bimbini. A xipanze xa wunharu xa bimbi xi lo hunzuka nkhata. Jer. 51:25; Ezek. 14:19; Xip. 16:3

⁹ Ku lofa a xipanze xa wunharu xa zivangwa lezi zi hanyako zi nga lomu bimbini; ku lobyiswa ni xipanze xa wunharu xa mataru.

¹⁰ Ni ngelosi ya wunharu yi loba mpunzu wa yona, ku lowa a nyeleti ya hombe hi le tilweni, yi vura kota xihlahle, yi wela ka xipanze xa wunharu xa micongo, ni lomu tihlobyeni ta mati. Isa. 14:12; Xip. 9:1; 16:4

¹¹ A vito ga nyeleti hi Manonwe. A xipanze xa wunharu xa mati xi lo hunzuka xi maha manonwe; ni vanhu vanyingi va lofa hi mati, hakuva ma wa hunzukile manonwe. Ekso. 15:23; Rute 1:20; Jer. 9:15

¹² Ni ngelosi ya wumune yi loba mpunzu wa yona, ku biwa xipanze xa wunharu xa gambo, ni xipanze xa wunharu xa hweti, ni xipanze xa wunharu xa tinyeleti; lezaku a xipanze xa wunharu xa zona xi phumiswa, a hlikanhi wu vumala a xipanze xa wunharu xa kuwonekela ka wona, ziva tano ni wusiku. Isa. 13:10; Am. 8:9

A makhombo manharu.

¹³ A muwonisweni wa mina nzi lozwa a gama na gi kari gi puruma ndengelengeni ya tilo, giku hi gezu ga hombe: Khombo, khombo, khombo a give ka lava va akileko misaveni, laha ku ta nga biwa a mimpunzu ya tingelosi leti tinharu leti ta ha lavako kuba. Xip. 9:12; 11:14; 14:6; 19:17