Kuvululelwa 12 - Tshwa Bible

A wasati ni drako.

¹ Zonake ku lo woneka a masingita ya hombe le tilweni, ya wasati loyi a nga ambele gambo, a hi ni hweti lahasi ka mikonzo yakwe, le hlokweni yakwe i wa hi ni xidlodlo xa khume ga tinyeleti ni timbiri.

² Yena i wa sikile, i loba huwa, a xaniseka hi kulunwa, ni kubayiseka ka kubeleka. Isa. 66:7

³ Ku lo woneka manwani masingita le tilweni, ya drako wa hombe wo pswhuka, a nga hi ni ntlhanu wa tihloko ni timbiri, ni khume ga timhonzo, ni ntlhanu wa zidlodlo ni zimbiri tihlokweni takwe. Xip. 13:1; 17:3, 9, 10

⁴ A nkila wakwe wu lo koka a xipanze xa wunharu xa tinyeleti ta tilo, a ti hoxa misaveni. A drako i lo yima mahlweni ka wasati loyi a nga lava ku beleka, kasi a fela ku khadamula nʼwana wakwe na a ha ku hefemula. Ekso. 1:16; Dan. 8:10; Xip. 17:18

⁵ Yena i lo beleka a nʼwana wa nisanyana, loyi a ta nga fumela matiko wontihe hi nhonga ya xiketse. A nʼwanana wakwe i lo tlakuselwa ka Nungungulu, le xitshanwini xakwe xa wuhosi. Tis. 2:9; Xip. 19:15

⁶ Ni wasati i lo chavela xiwuleni, laha ku nga ni wutshamu legi a longiselweko gona hi Nungungulu, lezaku a wundliwa kona a 1,260 wa masiku.

⁷ Ku wa hi kona kulwa le tilweni; Mikaeli ni tingelosi takwe va yalwa na drako, na drako alwa na hi ni tingelosi takwe; Dan. 12:1; Xip. 20:2

⁸ kanilezi ti lo hluliwa, a ta ha kumangi wutshamu le tilweni.

⁹ Zonake drako loyi wa hombe, a nga nyoka leyi ya kale, yi tibyako Muhlevi na Satani, a mukhohlisi wa tiko gontlhe, yena i lo hoxwa lahasi misaveni, ni tingelosi takwe ti lo hoxwa zinwe naye. Gen. 3:1; Lu. 10:18; Xip. 9:1

¹⁰ Nzi lozwa a gezu ga hombe le tilweni, giku: Makunu ku chikele a kuhanyiswa, ni ntamu, ni mufumo wa Nungungulu wa hina, ni ntamu wa Kristu wakwe; hakuva a muranisi wa vamakabye va hina i hoxilwe lahasi, loyi a nga va ranisa mumu ni wusiku mahlweni ka Nungungulu wa hina. Joba 1:9; Zak. 3:1; Xip. 11:15

¹¹ Va mu hlulile hi nkhata wa Yivana, ni mhaka ya wukustumunyu gabye; a va chavangi kufa hi kota ya ku ranza kuhanya kabye. Lu. 14:26; Rom. 8:37

¹² Hikwalaho, tsakani nwina matilo, na nwina lava mu tshamako ka wona. Kanilezi nwina misava ni bimbi mu na ni khombo, hakuva Satani i relele ka nwina, na a zangarile nguvu, hakuva wa zi tiva lezaku a xikhati lexi xi mu saleleko xi tsongwanyani. Tis. 96:11; Xip. 8:13; 10:6

¹³ Laha drako na a wonile lezaku i hoxilwe lahasi misaveni, i lo ya hlongolisa a wasati loyi a nga beleka nisanyana.

¹⁴ Ni wasati i lo nyikiwa a tipapa timbiri ta gama ga hombe, lezaku a fela ku purumela xiwuleni, a ka wutshamu legi a ta nga wundliwa kona a xikhati, ni zikhati zimbiri, ni khihlanya ga xikhati, a hi kule ni nyoka. Ekso. 19:4; Dan. 7:25; Xip. 17:3

¹⁵ Zonake a nyoka yi lo bukhula mati kanwini ka yona, khwatsi hi congo anzhako ka wasati, lezaku kasi wa kukuletwa ha wona. Isa. 59:9

¹⁶ Kanilezi a misava yi lo vuna wasati, yi ahlama nomu wa yona, yi mita a congo lowu wu nga bukhulwa hi nomu wa drako.

¹⁷ Zonake drako i lo zangarela nguvu a wasati, a suka a yalwa ni lava va nga sele va pswalo wakwe, lava va hlayisako milayo ya Nungungulu, va hi ni wukustumunyu ga Jesu. Gen. 3:15; Xip. 1:2, 9