Joxua 8 - Tshwa Bible

A Kuhlulwa ka Ai.

¹ Makunu Jehova i te ngalo ka Joxua: U nga chavi, hambu ku mbhela ntamu! Famba ni vontlhe lava va hlomileko u yalwa ni Ai. Languta, mina nzi nyikele canjeni ga wena a hosi ya Ai zinwe ni vanhu va yona, ni muti wa yona ni tiko ga yona. Deut. 1:21; 7:17

² U taya maha le Ai ni hosi ya kona khwatsi hi lezi u mahileko le Jeriko ni hosi ya kona; mu ta phanga a wukosi ga kona ni zifuyo za kona ziva za nwina. Veka a vanhu va xijumani hi lenzhako ka muti va wu juma.

³ Zinghaho Joxua i lo suka ni vontlhe vavanuna va yimpi a ku yalwa ni va le Ai; na Joxua i lo hlawula 30,000 wa vavanuna, a vanhu va tinhenha ta kulwa, i lo va ruma ku famba ni wusiku,

⁴ a va leletela, aku: Cuwukani, mu taya maha xijumani hi lenzhako ka muti, mu ngayi kule nguvu ni muti, kanilezi nwina nwentlhe tshamani na mu longile.

⁵ Mina ni vontlhe vanhu lava va nga zinwe na mina, hi ta tshinela kusuhani ni muti, zonake loku hi wona ku ngalo va huma ku talwa na hina khwatsi hi kusanguleni, hi ta tsutsuma mahlweni ka vona.

⁶ Na vona va ta huma va hi lanza, kala hi va kokela kule ni muti; hakuva va ta ku ngalo: Va hi chava khwatsi hi kusanguleni. Hi zalezo hina hi ta chava mahlweni kabye.

⁷ Makunu nwina mu ta su vumbuluko hi xijumani xa nwina, mu so putsuketa a muti, na Jehova Nungungulu wa nwina i ta wu nyikela canjeni ga nwina.

⁸ Ni laha nwina na mu tekile muti, mu ta wu hisa hi nzilo. Mu maha khwatsi hi kuwula ka Jehova. Bo, mina nzi mu byelile.

⁹ Joxua i lo va rumela va famba, vona va lo ya maha xijumani xikari ka Beteli ni Ai, hi le Mupela-gambo wa Ai; kanilezi Joxua i lo etlela lego wusiku xikari ka vanhu.

¹⁰ Na Joxua i lo vuka ni mixo a tlhanganyisa vanhu, i lo famba a ku yalwa ni va le Ai, zinwe ni masingalakati ya ka Israeli, va wa hi mahlweni ka vanhu.

¹¹ Ni vontlhe a vanhu lava va hlomileko lava va fambileko zinwe na yena, va lo tshinela kusuhani ni muti, va lota gova hi le Nwalungu wa Ai; makunu ku wa hi kona a nzhelelo xikari ka vona ni va le Ai.

¹² Zonake i lo teka 5,000 wa vavanuna, i lo va veka va maha xijumani xikari ka Beteli ni Ai, hi tlhelo ga Mupela-gambo wa muti.

¹³ Zonake vontlhe vanhu va wa zumbile va ti longisela le Nwalungu wa muti, zinwe ni lava va nga mahile xijumani le Mupela-gambo wa muti, na Joxua i lo famba lego wusiku xikari ka nzhelelo.

¹⁴ Ni laha a hosi ya le Ai yi nga wa zi wonile, zalezo a vanhu va muti va lo vuka ni mixo, va hatlisa ku huma vaya tlhangana ni va ka Israeli valwa navo, va lo ya tsombana ka wutshamu gi yimisilweko mahlweni ka nzhelelo; kanilezi yena i wa nga zi tivi lezaku ku kona xijumani lenzhako ka muti.

¹⁵ Joxua ni vontlhe va ka Israeli va lo maha ku khwatsi vo hluliwa ha vona, va lo tsutsuma hi ndlela ya kuya le xiwuleni.

¹⁶ Zonake vontlhe vanhu lava va nga wa hi lomu mutini va lo ta tlhangana a ku va hlongola; va lo mu hlongola Joxua, na yena i lo va kokela kule ni muti.

¹⁷ Ku wa nga salangi hambu ni munhu munwe lomo Ai ni Beteli, vontlhe va lo huma ku hlongola va ka Israeli, va siya a muti na wu vululwe, va lanza va ka Israeli.

¹⁸ Jehova aku ka Joxua: Tlakusa hubhula legi gi nga canjeni ga wena ngomama ni Ai; zonake Joxua i lo tlakusa a hubhula gakwe legi gi nga wa hi canjeni ga yena ngomama ni muti.

¹⁹ Ni laha a nga wa tlakusile a canja gakwe, a xijumani xi lo hatlisa ku vumbuluka lomu va nga wa baramile kona, va lo tsutsuma vaya enghena mutini, va lo teka muti, va hatlisa ku wu hisa hi nzilo.

²⁰ Ni laha a vavanuna va le Ai va nga wa cuwukile lenzhako kabye, languta, a musi wa muti wu lo tuvikela le hehla tilweni, na vona va wa nga tivi lezaku va ta tsutsumela kwihi, hakuva a vanhu lava va nga tsutsumela xiwuleni, va lo hunzuluka va va hlongolawu.

²¹ Ni laha Joxua ni vontlhe va ka Israeli va nga wa wonile lezaku a xijumani xi enghenile mutini, ni lezaku a musi wa muti wu tuvikela hehla, va lo hunzuluka valwa ni vanhu va le Ai.

²² Ni vanwani va ka Israeli va lo huma hi lomu mutini va talwa navo, hikwalaho a vanhu va le Ai va lo ranzelwa hi va ka Israeli, vanwani vata hi tlhelo ginwe, ni vanwani hi tlhelo ginwani; zinghaho va lo va hihirita, a va siyangi hambu ni munwe wa ku pona. Deut. 7:2

²³ Va lo khoma a hesi ya le Ai na yi kari yi hanya, va yi yisa ka Joxua.

²⁴ Ni laha va ka Israeli va nga Wa mbhetile ku hlasela vanhu vontlhe va le Ai le handle ka muti ni le xiwuleni lomu va nga wa va hlongolele kona, ni loku vontlhe va wile hi wutlha ga tlhari kala ka loyi wo gumesa, zinghaho vontlhe va ka Israeli va lo tlhelela le Ai, va wu hlasela hi matlhari.

²⁵ Vontlhe vavanuna ni vavasati lava va lovileko lego siku va wa hi 12,000 wa vanhu, vontlhe vanhu va le Ai.

²⁶ Hakuva Joxua a nga kovetangi a canja gakwe legi a tlakusileko a hubhula gakwe kala ku lovile vanhu vontlhe va le Ai.

²⁷ Saseka lezaku a zifuyo ni wukosi ga muti lowo, a vaIsraeli va lo zi teka ziva muphango wabye, khwatsi hi kuwula ka Jehova na a leletela Joxua.

²⁸ Zinghaho Joxua i lo hisa Ai, wu maha rumbi kala legi siku.

²⁹ Kanilezi a hosi ya le Ai, va lo yi hayeka laha sinyeni kala laha gambyeni; zonake laha na gi pelile, Joxua i lo leletela lezaku va susa xirumbi xakwe va ya xi hoxa laha nyangweni ya muti, va lo biringetela a nhulu ya hombe ya maribye leyi yi nga kona kala inyamutlha. Deut. 21:22

Kugonziwa ka Bhuku ga Nayo.

³⁰ Zonake Joxua i lo aka a alati ga Jehova Nungungulu wa ka Israeli le xitsungeni xa Ebale, Ekso. 20:24, 25

³¹ khwatsi hi lezi Mosi, a nanza ga Jehova, a leleteleko a vanana va ka Israeli, kota lezi ku tsalilweko lomu bhukwini ga nayo wa Mosi; ku aka a alati ga maribye ma nga vatliwangiko hi xiketse, laho va ta nga nyikela munyikelo wa kuhiswa, ni miphahlo ya kurula. Ekso. 20:25

³² Na yena i lo tsala maribyeni ya alati a timhaka ta nayo wa Mosi lowu a wu tsalileko mahlweni ka vanana va ka Israeli. Deut. 31:9

³³ Zonake vontlhe va ka Israeli ni masingalakati yabye, ni tinduna tabye, ni valamuli vabye, va lo yima matlhelweni mambiri ya nghaxa na va cuwukene ni vapristi ni vaLevi lava va rwalako a nghaxa ya xivumelwano xa Jehova; ni valuveli va wa hi zinwe ni zisumbulwa. Zonake a khihlanya gi wa hi tlhelweni ga xitsunga xa Gerizima, ni khihlanya gi wa hi tlhelweni ga xitsunga xa Ebale, khwatsi hi lezi Mosi, a nanza ga Jehova, a leleteleko ku katekisa a vanhu va ka Israeli kusanguleni.

³⁴ Ni nzhako ka lezo i lo gonza tontlhe timhaka ta nayo, a zikatekiso ni makhombo, khwatsi hi lezi zi tsalilweko bhukwini ga nayo.

³⁵ Ku wa nga hi kona ni mhaka yinwe ka tontlhe timhaka leti ti leletelweko hi Mosi, yi nga kala ku gonziwa hi Joxua mahlweni ka tlhangano wontihe wa ka Israeli, ni mahlweni ka vavasati ni vanana ni valuveli lava va nga xikari kabye.