Joxua 5 - Tshwa Bible

Va ka Israeli va engheniswa wukwera.

¹ Na ku mahisile lezo laha a tihosi ta maAmori leti ti nga le Mupela-gambo wa Jordani, ni tihosi tontlhe ta maKanani, leti ti nga wa hi le mbhirini wa bimbi, na ti zwile lezaku Jehova i womisile a mati ya Jordani mahlweni ka vanana va ka Israeli, va kala va tlhatuka, a timbilu tabye ti lo nyeka, va tsemeka mihlana hi kota ya vanana va ka Israeli.

² Ka xwalexo xikhati Jehova i te ngalo ka Joxua: Maha mikwana hi maribye, u enghenisa wukwera kambe ka vanana va ka Israeli a khati ga wumbiri. Ekso. 4:25

³ Zonake Joxua i lo maha mikwana ya maribye, a enghenisa wukwera a vanana va ka Israeli le xitsungeni xa Dewu ga magumo.

⁴ Joxua i lo va enghenisa wukwera hi xigelo lexi. Vontlhe a vavanuna lava va nga huma hi le Gipite, a vavanuna lava va hlomako yimpi, vontlhe va wa file laha ndleleni lomu xiwuleni na vata hi le Gipite;

⁵ hakuva vontlhe vavanuna lava va nga huma hi le Gipite va wa enghenile wukwera; kanilezi vontlhe lava va belekilweko laha ndleleni lomu xiwuleni na vata hi le Gipite, a va engheniswangi wukwera.

⁶ Hakuva a vanana va ka Israeli va lo famba lomu xiwuleni 40 wa malembe, kala vontlhe vanhu va hetwa, ku mbhela vavanuna lava va hlomako yimpi, va mbhela vontlhe lava va nga huma hi le Gipite, lava va nga kala ku ingisa a gezu ga Jehova; hakuva i wa hlambanyile lezaku cima va nga ta wona a tiko legi a hlambanyileko ka vararu vabye ku va nyika gona, a tiko gi khulungako masi ni wulombe. Mitse. 14:21

⁷ Zonake i lo veka a vanana vabye matshanwini ya vona; hi valavoke Joxua a nga va enghenisa wukwera, hakuva va wa nga enghenangi wukwera, hi lezi a va engheniswangi laha ndleleni.

⁸ Ni laha va nga wa mbhetile ku enghenisa vontlhe vavanuna, va lo tshama matshanwini yabye lomu wugovelweni, va kala va hola.

⁹ Zonake Jehova aku ka Joxua: Inyamutlha nzi susile ka nwina tingana ta le Gipite. Hikwalaho a wutshamu legi gi ta vitanwa ku ngalo Gilgale kala legi siku.

¹⁰ Ni vanana va ka Israeli va lo gova le Gilgale, va maha Pasika laha gambyeni hi siku ga 14 ga hweti, le libaleni la Jeriko. Ekso. 12:2; Mitse. 9:5

¹¹ Hi siku gi gamelako siku ga Pasika, va loga mavele ya tiko: zi nga zibaba zi nga hiko na comelo ni zipfhaki zo wociwa.

¹² Zonake a manna ma lo gumesa hi siku gi gamelako legi va ngaga ha gona mavele ya tiko; ni vanana va ka Israeli cima a va ha kumangi kambe a manna. Kanilezi va loga lezi zi milako lomu tikweni ga Kanani lego lembe. Ekso. 16:35

Jehova a wulawula ka Joxua.

¹³ Ni laha Joxua a nga hi kusuhani ni Jeriko, i lo tlakusa a mahlo yakwe a cuwuka; languta, a wanuna a nga wa yimile mahlweni ka yena na a hi ni tlhari canjeni ga yena; na Joxua i loya ka yena aya ku ngalo: Wena u wa ka hina, kutani u nala wa hina ke? Ekso. 23:23

¹⁴ Na yena i lo hlamula aku ngalo: Eye, nza ha kuta lokuloku; nzi nduna ya yimpi ya Jehova. Zonake Joxua i lo khizama hi nghohe ya yena a korama, aku ka yena: Xana u yini hosi yanga ka nanza ga yona ke? Tis. 148:2

¹⁵ Ni nduna ya yimpi ya Jehova yi te ngalo ka Joxua: Susa a zilato Za wena mikonzweni ya wena, hakuva a wutshamu legi u yimileko ka gona mbutshamu go basa. Na Joxua i lo maha lezo.